នៅរុស្ស៊ី Messenger Telegram មានពេល១៥ថ្ងៃសម្រាប់ប្រគល់កូនសោសម្ងាត់ទៅអាជ្ញាធរ
អាជ្ញាធររុស្ស៊ី ថ្ងៃអង្គារ២០ មិនា បានបញ្ជាទៅ Messenger Telegram ឲ្យក្នុងរយៈពេល១៥ថ្ងៃ ប្រគល់ទៅស្ថាប័នសន្តិសុខជាតិFSB នូវកូនសោ ដែលអនុញ្ញាតឲ្យអានអ្វីៗជាសម្ងាត់ នៅក្នុងសារឆ្លើយឆ្លងរវាងពួកអ្នកប្រើប្រាស់សេវាអេឡេចត្រូនិកនេះ ពុំនោះសោតទេ នឹងត្រូវទីភ្នាក់ងាររដ្ឋរុស្ស៊ីខាងត្រួតពិនិត្យលើប្រព័ន្ទទូរគមនាគមន៍បិទខ្ទប់ មិនឲ្យពួកអ្នកប្រើប្រាស់មានលទ្ធភាពផ្ញើ សារឆ្លើយឆ្លងគ្នាទៀតឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ក្នុងសេចក្តីថ្លែងការណ៍ ចេញផ្សាយលើវេបសៃខ្លួន ទីភ្នាក់ងាររដ្ឋរុស្ស៊ីខាងត្រួតពិនិត្យលើប្រព័ន្ធ ទូរគមនាគមន៍ ហៅកាត់ថា Roskomnadzor ទាមទារពី Messenger Telegram ឲ្យក្នុងរយៈពេល ១៥ ថ្ងៃ “ ប្រគល់ទៅឲ្យ ស្ថាប័នសន្តិសុខជាតិ FSB នូវ ពត៏មានដែលត្រូវការជាចាំបាច់ សម្រាប់បើក និង ស្រាយ មើលខ្លឹមសារ នៃ សារអេឡេចត្រូនិកទាំងឡាយដែលមានទទួលបាន ដែលឆ្លើយឆ្លងគ្នា និងដែល កំពុងផ្ញើ តាមរយៈសេវានេះ។ Telegram ត្រូវគេស្គាល់ដោយសារ ចេះលាក់ការណ៍សម្ងាត់កម្រិតខ្ពស់ចំពោះ សារឆ្លើយឆ្លង ផ្ញើដោយ បណ្តាចលនាពួកជីហាដ ហេតុដែលក្នុងប៉ុន្មានឆ្នាំចុងក្រោយ ញ៉ាំងឲ្យកើតឡើងជា ការជជែកគ្នា រកខុសត្រូវ ជារឿយៗ។
ការព្រមាននេះ លេចចេញមក ក្រោយពីតុលាការកំពូល បានច្រានចោលពាក្យបណ្តឹង របស់ Telegram ដែល ប៉ុនប៉ងលុបទៅវិញ ការផ្តន្ទាទោសខ្លួនកាលពីលើកមុន។ “ ការកំញើញបិទខ្ទប់ Telegram ប្រសិនបើ Messenger នេះ មិនព្រមផ្តល់ទិន្នន័យសម្ងាត់ផ្ទាល់ខ្លួន របស់ ពួកអ្នកប្រើប្រាស់ គឺមុខជាឥតប្រយោជន៍ទេ ដ្បិត Telegram ប្តេជ្ញាការពារសេរីភាព និង អ្វីៗជា អាថ៏កំបាំង របស់ពួកអ្នកប្រើប្រាស់ - ប្រតិកម្មនេះ បញ្ចេញ លើ Twitter ដោយសហស្ថាបនិក Messenger Telegram គឺ លោក Pavel Dourov ។
កាលពីកណ្តាលខែតុលា តុលាការរុស្ស៊ី បានផ្តន្ទាទោស Telegram ដោយតម្រូវឲ្យបង់ប្រាក់ពិន័យ ៨ សែន រូប្ល ឫ ស្មើនឹង ១ម៉ឺន ៨ ពាន់អឺរ៉ូ ចំពោះការប្រកែកមិនព្រមសហការជាមួយ FSB។ លោក Dourov បានចាកចេញពីរុស្ស៊ី ក្នុងឆ្នាំ ២០១៤ បណ្តាលឲ្យកើតឡើងជាភាពតានតឹងជាមួយអាជ្ញាធរ -អាជ្ញាធរ ដែលត្រូវគាត់ចោទថា រំលោភបំពានលើរដ្ឋធម្មនុញ្ញរុស្ស៊ី ពីព្រោះច្បាប់គោលនេះ ការពារទេតើ សិទ្ធិដើម្បិរក្សាទុកអាថ៏កំបាំងនៃការសរសេរឆ្លើយឆ្លងគ្នា។
ក្រោយពីមានការវាយប្រហារបំផ្ទុះគ្រាប់បែក ក្នុងមេត្រូក្រុង Saint-Petyersbourg ថ្ងៃទី៣ មេសា ឆ្នាំមុន បណ្តាលឲ្យស្លាប់អ្នកធ្វើដំណើរអស់ ១៦ នាក់ ស្ថាប័នសន្តិសុខជាតិរុស្ស៊ី FSB បានអះអាងថា អ្នកប្រព្រឹត្ត ភេរវកម្មនេះ និងពួកចូលដៃជាមួយវា បានប្រើពិតជា Messenger Telegram នេះឯង “ ដើម្បី លាក់បំបាំងផែនការឧក្រិដ្ឋរបស់វា” ។
Messenger នេះ ចេះគេចផុតពីការបិទខ្ទប់កាលពីខែមិថុនា គឺក្រោយពីសុខចិត្តផ្តល់ទៅ Roskomnadzor នូវ ពត៏មាន ដើម្បីអាចចុះឈ្មោះខ្លួន ក្នុងបញ្ជីសម្រាប់ផ្សព្វផ្សាយពត៌មាន ដែលពីមុនៗ តែងបានប្រកែកមិនព្រមផ្តល់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ