បារាំង៖មន្រ្តីរដ្ឋការ និងបុគ្គលិកដឹកជញ្ជូនផ្លូវដែករៀបចំក្បួនបាតុកម្មប្រឆាំងកំណែទម្រង់របស់រដ្ឋាភិបាល
នៅថ្ងៃព្រហស្បតិ៍ ទី២២ មីនានេះ មហាបាតុកម្មមួយរបស់មន្រ្តីរដ្ឋការ និងបុគ្គលិកដឹកជញ្ជូនផ្លូវដែកក្នុងប្រទេសបារាំងរៀបចំធ្វើនៅទូទាំងប្រទេស។ គោលដៅនៃបាតុកម្ម គឺដើម្បីប្រឆាំងនឹងគម្រោងកំណែទម្រង់របស់រដ្ឋាភិបាលក្នុងវិស័យដឹកជញ្ជូនផ្លូវដែក និងលក្ខន្តិកៈរបស់មន្រ្តីរដ្ឋការ។ ពេញមួយថ្ងៃព្រហស្បតិ៍នេះ មានសេវាសាធារណៈជាច្រើនត្រូវផ្អាកដំណើរការទាំងស្រុង ឬមួយក៏មានដំណើរការរអាក់រអួល ដូចយ៉ាងសេវាដឹកជញ្ជូនអ្នកដំណើរជាដើម។ ចំណែកសាលារៀនភាគច្រើនក៏ត្រូវបិទទ្វារដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
មហាបាតុកម្មថ្ងៃទី២២ មីនានេះត្រូវបានជ្រើសរើស និងរៀបចំដោយក្រុមសហជីពនៃមន្រ្តីរដ្ឋការចំនួន ៧ និងអង្គការចំនួន ៤ ដែលតំណាងឲ្យវិស័យដឹកជញ្ជូនផ្លូវដែក SNCF។ ក្រុមសហជីព និងអង្គការទាំងនេះបានអំពាវនាវឲ្យមន្រ្តីរដ្ឋការទាំង ៥លាន ៤សែននាក់នៅទូទាំងប្រទេសបារាំងចុះផ្លូវធ្វើបាតុកម្មដោយរៀបចំជាក្បួនដង្ហែជាង ១៥០ នៅទូទាំងប្រទេស។ នៅក្នុងទីក្រុងប៉ារីស ក្បួនដង្ហែត្រៀមរៀបចំជាពីរក្បួនដាច់គ្នា តែត្រូវហែទៅជួបជុំគ្នានៅទីលាន Bastille។
ក្បួនបាតុកម្មរបស់មន្រ្តីរដ្ឋការពេលនេះធ្វើឡើង ដើម្បីការពារលក្ខន្តិកៈរបស់មន្រ្តីរដ្ឋការ ពិសេសការពារការងាររបស់មន្រ្តីក្នុងក្របខ័ណ្ឌរដ្ឋមួយនេះដែលលោកប្រធានាធិបតីបារាំងម៉ាក្រុងបានសន្យានាសម័យឃោសនាបោះឆ្នោតថា លោកនឹងលុបចោលការងាររបស់មន្រ្តីរដ្ឋការចំនួន ១២០ ០០០ការងារ។ នាខែតុលា ឆ្នាំ ២០១៧ ក្រុមមន្រ្តីរដ្ឋការក៏ធ្លាប់បានចុះផ្លូវធ្វើបាតុកម្មប្រឆាំងនឹងគម្រោងផែនការរបស់លោកម៉ាក្រុងនេះម្តងហើយ។
ចំណែកក្បួនបាតុកម្មរបស់បុគ្គលិកដឹកជញ្ជូនផ្លូវដែក SNCF ពេលនេះធ្វើឡើង មួយថ្ងៃបន្ទាប់ពីគម្រោងកំណែទម្រង់លើក្រុមហ៊ុនសាធារណៈមួយត្រូវបានបញ្ជូនដល់ដៃរដ្ឋាភិបាល។ គឺជាគម្រោងកំណែទម្រង់ដែលមាន ៤៣សំណើតាក់តែងឡើងដោយលោក Jean-Cyril Spinetta មន្រ្តីរដ្ឋការជាន់ខ្ពស់ និងជាអតីតចៅហ្វាយក្រុមហ៊ុនអាកាសចរណ៍ Air France-KLM។ អ្វីដែលក្រុមសហជីពប្រឆាំងនឹងគម្រោងកំណែទម្រង់នោះ គឺការប្តូរលក្ខន្តិកៈរបស់អ្នកបើកបររថភ្លើង លុបចោលការងារ និងការបើកឲ្យមានទីផ្សារប្រកួតប្រជែងក្នុងវិស័យដឹកជញ្ជូនផ្លូវដែក។
បន្ទាប់ពីកូដកម្មក្នុងថ្ងៃទី២២ មីនានេះ ក្រុមសហជីពតំណាងឲ្យក្រុមហ៊ុន SNCF បានរៀបចំក្បួនកូដកម្មរយៈពេលយូរចាប់ពីថ្ងៃទី៣ មេសាដល់ថ្ងៃទី២៨ មិថុនាខាងមុខដោយរៀបចំ ២ថ្ងៃ ឬ ៣ថ្ងៃក្នុងមួយសប្តាហ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ