បារាំង៖ប៉ូលិសឃាត់ជនសង្ស័យពីរនាក់ ក្រោយពីបុរសម្នាក់បានបរឡានសំដៅលើក្រុមទាហាន
នៅប៉ែកខាងត្បូងប្រទេសបារាំង បុរសអ្នកបើករថយន្តម្នាក់អមដោយស្រ្តីម្នាក់បានបើកឡានសំដៅលើហ្វូងទាហាននៅក្នុងស្រុកវ៉ាក្ស ស្ថិតក្នុងអ៊ីស៊ែរនាព្រឹកថ្ងៃព្រហស្បតិ៍ ទី២៩ មីនា។ ឧប្បត្តិហេតុនេះមិនបានបណ្តាលឲ្យមានអ្នកស្លាប់ និងរបួសទេ។ ប៉ុន្មានម៉ោងក្រោយមក មានជនសង្ស័យពីរនាក់ត្រូវបានចាប់ខ្លួន ក្នុងនោះបុរសម្នាក់ និងស្រ្តីម្នាក់ជាម្ចាស់រថយន្ត។ តែគេនៅមិនទាន់ដឹងថា តើបុរសចាប់ខ្លួនរូបនោះជាអ្នកបើករថយន្តឬ ហើយតើស្រ្តីចាប់ខ្លួនរូបនោះពិតជាអ្នកដែលបានជិះក្នុងរថយន្តនាពេលកើតហេតុឬទេ។ តើរឿងរ៉ាវមួយនេះបានកើតឡើងយ៉ាងដូចម្តេចខ្លះ?
ចុះផ្សាយនៅថ្ងៃ៖
ស្តាប់ - ០១:៣៤
« នៅព្រឹកមិញវេលាម៉ោង ៨ និង ១៥នាទីនៅពីមុខបន្ទាយទាហាននៃកងពលថ្មើរជើងតំបន់ភ្នំក្នុងស្រុកវ៉ាក្ស មានក្រុមទាហានបានចេញ ចូលក្នុងមូលដ្ឋាន។ ក្រុមខ្លះបានចេញហាត់ប្រាណ ហើយក្រុមខ្លះទៀតក៏បានត្រឡប់ចូលបន្ទាយវិញ។ ក្រុមទី១ ដែលទើបបានត្រឡប់ពីធ្វើកីឡាត្រូវបានរថយន្តមួយគ្រឿងបរកាត់ពីមុខ ហើយត្រូវបានបុរសអ្នកបើករថយន្តនោះជេរប្រមាថ។
បន្ទាប់មក រថយន្តនោះក៏បានបន្តដំណើរទៅមុខ រួចក៏បានជួបនឹងទាហានមួយក្រុមទៀតដែលកំពុងដើរឆ្លងថ្នល់ ហើយរូបបុរសអ្នកបើករថយន្តដដែលនោះក៏បានជេរប្រមាថ ព្រមទាំងធ្វើការគំរាមកំហែងលើក្រុមទាហានទី២ នោះទៀត។
បន្ទាប់មកទៀត និងក្រោយពីបានបើកទៅមុខបានបន្តិច បុរសអ្នកបើករថយន្តនោះក៏បើករថយន្តត្រឡប់ក្រោយដោយមានចេតនាបរសំដៅកិនក្រុមទាហាននោះតែម្តង។ សំណាងល្អ ក្រុមទាហានបានរត់គេចទាន់ដោយអ្នកខ្លះបានឡើងទុំលើដំបូលឡាន។ កាយវិការរហ័សរហួននេះបានធ្វើឲ្យទាហានទាំងនោះរួចផុតពីការស្លាប់។
នាពេលកន្លងមក ក៏ធ្លាប់កើតមានករណីដូចគ្នានេះទៅលើកម្លាំងទាហានផ្សេងទៀតដែរ។ វាច្បាស់ណាស់ថាសព្វថ្ងៃនេះ ស្ថានភាពសន្តិសុខត្រូវបានតាមដានយ៉ាងយកចិត្តទុកដាក់ជាទីបំផុតពីគ្រប់ស្ថាប័នស៊ើបការណ៍សម្ងាត់ និងពីគ្រប់ស្ថាប័នកងទ័ព ពិសេសកងទ័ពថ្មើរជើង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ