លោកប្រធានាធិបតីតួកគីអ៊ែរដូហ្កានចោទលោកនាយករដ្ឋមន្រ្តីអ៊ីស្រាអែលនេតាន់យ៉ាហ៊ូជាភេរវជន
ទំនាក់ទំនងតានតឹងរវាងប្រទេសតួកគី និងប្រទេសអ៊ីស្រាអែលដែលកំពុងមានស្រាប់នឹងឡើងខ្លាំងមួយកម្រិតទៀត។ នេះក៏ដោយសារថានៅថ្ងៃអាទិត្យ ទី១ មេសា លោកប្រធានាធិបតីតួកគីអ៊ែរដូហ្កានបានចោទលោកនាយករដ្ឋមន្រ្តីអ៊ីស្រាអែលនេតាន់យ៉ាហ៊ូថាជាភេរវជន។ ការចោទរបស់ប្រធានាធិបតីតួកគីយ៉ាងដូចនេះបានធ្វើឡើង បន្ទាប់ពីលោកនេតាន់យ៉ាហ៊ូបានទាត់ចោលការផ្តល់មេរៀនសីលធម៌របស់លោកអ៊ែរដូហ្កាននៅក្នុងអំពើហិង្សារវាងពលរដ្ឋប៉ាឡេស្ទីននៅតំបន់ហ្កាហ្សា និងទាហានអ៊ីស្រាអែលកាលពីថ្ងៃសុក្រ ទី៣០ មីនា។ អំពើហិង្សាដែលបានបណ្តាលឲ្យស្លាប់ជនជាតិប៉ាឡេស្ទីនយ៉ាងតិច ១៦នាក់។
ចុះផ្សាយនៅថ្ងៃ៖
ស្តាប់ - ០២:០០
គឺនៅក្នុងសុន្ទរកថាតាមទូរទស្សន៍ថ្លែងទៅកាន់ក្រុមសកម្មជននៅក្នុងទីក្រុងអាដាណាស្ថិតប៉ែកខាងត្បូងតួកគីដែលលោកប្រធានាធិបតីអ៊ែរដូហ្កានបានវាយប្រហារពាក្យសម្តីត្រង់ៗលើលោកនាយរដ្ឋមន្រ្តីអ៊ីស្រាអែលនេតាន់យ៉ាហ៊ូ។ តាមលោកអ៊ែរដូហ្កាន លោកនេតាន់យ៉ាហ៊ូមិនត្រឹមតែជាអ្នកឈ្លានពានលើទឹកដីគេប៉ុណ្ណោះទេ តែជាភេរវជនតែម្តង។ « អ្វីដែលលោកឯងបានធ្វើទៅលើប្រជាជនប៉ាឡេស្ទីននឹងត្រូវកត់ត្រាទុកនៅក្នុងប្រវត្តិសាស្រ្ត ហើយគ្មានថ្ងៃដែលយើងអាចបំភ្លេចបានទេ។ ចំណែកប្រជាជនអ៊ីស្រាអែលពិតជាមិនសប្បាយចិត្តនឹងអំពើដែលលោកឯងបានធ្វើដែរ » នេះជាការថ្លែងរបស់លោកអ៊ែរដូហ្កាន។
ប្រតិកម្មខ្លាំងៗរបស់លោកអ៊ែរដូហ្កានពេលនេះបានធ្វើឡើង បន្ទាប់ពីលោកនេតាន់យ៉ាហ៊ូបានអះអាងថា អ៊ីស្រាអែលមិនត្រូវការទទួលមេរៀនសីលធម៌ពីមនុស្សដែលបានទម្លាក់គ្រាប់បែកសម្លាប់ជនស៊ីវិលស្ងាត់ៗអស់ជាច្រើនឆ្នាំនោះទេ។ មនុស្សដែលលោកនេតាន់យ៉ាហ៊ូចង់និយាយសំដៅ គឺរូបលោកអ៊ែរដូហ្កានក្នុងសំណុំរឿងវិបត្តិនៅក្នុងប្រទេសស៊ីរី។ សូមជម្រាបជូនថា សង្រ្គាមពាក្យសម្តីរវាងលោកអ៊ែរដូហ្កាន និងលោកនេតាន់យ៉ាហ៊ូបានកើតមានឡើង បន្ទាប់ពីមានការប៉ះទង្គិចគ្នាយ៉ាងហិង្សារវាងប្រជាជនប៉ាឡេស្ទីននៅតំបន់ហ្កាហ្សា និងទាហានអ៊ីស្រាអែលកាលពីថ្ងៃសុក្រ ទី៣១ មីនាដែលបានបណ្តាលឲ្យស្លាប់ពលរដ្ឋប៉ាឡេស្ទីនយ៉ាងតិច ១៦នាក់ និងរបួសជាង ១ ៤០០នាក់។
លោកអ៊ែរដូហ្កានបានចាត់ទុកការបាញ់គ្រាប់កាំភ្លើងពិតពីសំណាក់ទាហានអ៊ីស្រាអែលលើប្រជាជនប៉ាឡេស្ទីនថាជាទង្វើអមនុស្សធម៌។ តែលោកនេតាន់យ៉ាហ៊ូបានសម្តែងសាទរចំពោះទាហានអ៊ីស្រាអែលដោយចាត់ទុកជាទង្វើការពារខ្លួន និងការពារទឹកដីអ៊ីស្រាអែល។ នរណាក៏ដឹងដែរថា លោកអ៊ែរដូហ្កានជាសកម្មជនម្នាក់ដែលចេញមុខការពារបុព្វហេតុរបស់ប្រជាជនប៉ាឡេស្ទីន។ គឺជំហររបៀបនេះហើយដែលបានធ្វើឲ្យទំនាក់ទំនងរវាងតួកគី និងអ៊ីស្រាអែលបន្តល្អក់ កករ នោះបើទោះបីជាទីក្រុងអង់ការ៉ា និងទីក្រុងតេឡាវីមានកិច្ចព្រមព្រៀងទំនាក់ទំនងធម្មតារវាងគ្នាចុះហត្ថលេខាក្នុងឆ្នាំ ២០០៦ ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ