ថ្ងៃ៤ និង៥មេសា ឆ្នាំ ២០១៨ ទីក្រុងមូស្គូបានទទួលសន្និសីទស្តីអំពីសន្តិសុខអន្តរជាតិ
ចុះផ្សាយនៅថ្ងៃ៖
ស្តាប់ - ០៦:៥៩
ជាលើកទី៧ដែលរដ្ឋធានីរុស្ស៊ី បានក្លាយជាម្ចាស់ផ្ទះ ទទួលឲ្យប្រព្រឹត្តទៅអស់ពីរថ្ងៃជាប់ គឺ ថ្ងៃ ទី៤និងទី៥មេសា សន្និសីទអន្តរជាតិស្តីអំពីសន្តិសុខអន្តរជាតិ។ បានមានមុខចូលរួមក្នុងការងារសន្និសីទ គឺ ប្រតិភូយោធាគ្រាក់ៗចំនួន ៨៥០ នាក់ មកពី ៩៥ ប្រទេស ក្នុងនោះ មានរដ្ឋមន្ត្រីការពារជាតិ ៣០ ប្រទេស និង នាយអគ្គសេនាធិការដ្ឋានកងទ័ព ១៥ ប្រទេស។ ដោយហេតុថា សន្និសីទនេះ ចាត់ចែងឡើង ដោយរុស្ស៊ីបានជា បណ្តាប្រទេសបក្សសម្ព័ន្ធអូតង់ នាំមុខដោយ សរអា ដែលសត្រូវនឹងមូស្គូ តាមគ្រប់ មុខព្រួញ ប្រកែកមិនមកចូលរួមទេ លើកលែងតែ ប្រទេស ស្លូវ៉ាគី មួយគត់ ដែលចង់ឲ្យមានការចរចា ប្រព្រឹត្តទៅ រវាងរុស្ស៊ី និង បស្ចិមលោក។ កម្មវត្ថុមួយដ៏ចម្បងនៃសន្និសីទ គឺអំពីការប្រយុទ្ធទល់នឹង ភេរវនិយមអន្តរជាតិ។
ថ្លែងពីលើវេទិកាសន្និសីទក្រុងមូស្គូស្តីអំពីសន្តិសុខអន្តរជាតិ ហៅកាត់ថា MCIS រដ្ឋមន្ត្រីការពារជាតិ រុស្ស៊ី លោក Serguei Shoigu បានលើកឡើង អំពី លទ្ធផលនៃប្រតិបត្តិការបំពេញដោយពួកយោធារុស្ស៊ី នៅស៊ីរី ដោយសហការជាមួយ តួកគី និង អ៊ីរ៉ង់ បានវាយកំចាត់បែកខ្ចាយទៅហើយ សំបុកពួកភេរវជន នៃ អង្គការដ្ឋអ៊ីស្លាម និងអង្គការភេរវនិយមផ្សេងទៀត ដោយកំទេចពួកនោះ អស់ ៦៥.០០០ នាក់ ហើយ ពួកកាកសំណល់វា ប្រមាណ ៥.៤០០ នាក់ ឥឡូវ បានរើទីតាំងវា ទៅកសំបុកថ្មីនៅឯដែនដីអាហ្វហ្កានីស្ថាន។ គាត់បានដៀមដាមឲ្យ សម្ព័ន្ធនៃរដ្ឋចំនួនជាង ៣០ នាំមុខដោយ សរអា មានកម្លាំងយោធាហំហួន បូកទាំងកងអាកាស និងទ័ពពិសេសទៅផង ប៉ុន្តែលទ្ធផលដែលគេសម្រេចបាន ដូចជាមិនលេចធ្លោសោះ។ ប្រមុខយោធារុស្ស៊ី រៀបរាប់ថា ដែនដីស៊ីរីភាគច្រើន រំដោះទៅហើយពីពួកភេរវជន ចំណែកនៅលើដែនដី សល់ពីនេះ បន្តប្រព្រឹត្ត ទៅ កិច្ចចរចា ដើម្បីឲ្យពួកគេដាក់អាវុធចុះ។ នាយកស្ថាប័នសន្តិសុខជាតិរុស្ស៊ី FSB លោក Alexandre Bortnikov ពីចំណែកគាត់ គូសបញ្ជាក់ថា ការប្រយុទ្ធទល់នឹងភេរវនិយមអន្តរជាតិ អាចមានប្រសិទ្ធិភាពទៅកើត លុះតែរួមកម្លាំងគ្នា។
ម៉្លោះហើយ បានជាមូស្គូស្នើទៅកាន់ចារកិច្ចប្រទេសនានា ឲ្យសម្របសម្រួលសកម្មភាពជាមួយ ដៃគូរុស្ស៊ីទៅ។ FSB រុស្ស៊ី ត្រៀមធ្វើសហប្រតិបត្តិការបែបនេះ ហើយអំពាវនាវ ចារកិច្ចប្រទេសប្លែកៗ ឲ្យរួមគ្នាពង្រីក លំហប្រឆាំង ភេរវនិយម គឺបង្កើតជា ឃ្លាំងស្តុករួម សម្រាប់រក្សាទុកទិន្នន័យស្តីអំពីភេរវនិយមអន្តរជាតិ។ មកទល់ថ្ងៃនេះ បានភ្ជាប់ខ្លួនទៅហើយមកនឹងឃ្លាំងស្តុកទុន្នន័យនេះ មាន៤១ ចារកិច្ចបរទេស តំណាងឲ្យ ៣៤ ប្រទេស ទ្វីប អឺរ៉ុប អាស៊ី និង អាហ្វ្រិក។ តាមសំដីលោក Bortnikov ក្នុងឆ្នាំមុន នៅរុស្ស៊ី FSB ចេះទប់ស្កាត់បានដូចចិត្ត គឺ ភេរវកម្មចំនួនដល់ទៅ ២៥ ករណី។ ពីក្នុងនោះ ការវាយប្រហារភេរវនិយម ចំនួន ២ លើក ត្រូវបានព្រមានឲ្យយើងដឹង គឺដោយ តួកគី និង សរអា។ FSB ពីខាងខ្លួនតែងត្រៀមរួមវិភាគទានបែបនេះជានិច្ច ដ្បិតសហប្រតិបត្តិការក្នុងទ្រង់ ទ្រាយយ៉ាងនេះ ត្រូវតែក្លាយជាគ្រឹះមូលដ្ឋាននៃ ទំនាក់ទំនង រវាងចារកិច្ចយើង។
គួរនិយាយថា បានមកកាន់ក្រុងមូស្គូ គឺពួកអ្នកតំណាងនៃបណ្តាប្រទេស ដែលសុទ្ធតែមានទម្ងន់នយោបាយ នៅ តាមតំបន់ខ្លួន បែបយ៉ាង ចិន ឥណ្ឌា ប៉ាគីស្ថាន អារ៉ាប៊ីសាអ៊ូឌីត អ៊ីរ៉ង់ អ៊ីរ៉ាក់ ។ល។ រដ្ឋមន្ត្រីការពារជាតិ ចិនប្រជាមានិត លោក Wei Fenghe ក្នុងបទអន្តរាគមន៍ខ្លួន លើកឡើងថា វត្តមាន គណៈប្រតិភូចិន គឺចង់បង្ហាញឲ្យ សហគមន៍ពិភពលោក រួចជាបឋម សរអា បានឃើញ តើចំណង ស្អិតរមួតយ៉ាងណា ដែលតភ្ជាប់មហាប្រទេស ចិន និង រុស្ស៊ី។ ស្តីអំពីការប្រយុទ្ធទល់នឹងភេរវនិយម លោក Wei Fenghe កត់សម្គាល់ថា ទោះប្រទេសណាក៏ដោយ បើតែម្នាក់ឯង គឺមិនអាចប្រឈមនឹង រាល់ការ គម្រាម ដែល ស្ថិតនៅពីលើមនុស្សជាតិឡើយ។ មានតែផ្លូវសហប្រតិបត្តិការប៉ុណ្ណោះ ដែលនាំមកនូវ គុណប្រយោជន៍ ដូចគ្នា ចំណែក ការប្រឈមមុខដាក់គ្នា គឺនាំទៅកាន់តែ ការបង់ខាតប៉ុណ្ណោះ។
ប្រធាននៃ គណៈកម្មាធិការរដ្ឋសភាសាធារណរដ្ឋស្លូវ៉ាគីខាងការពារប្រទេសនិងសន្តិសុខ លោក Anton Grinko ក្នុងបទអន្តរាគមន៍ខ្លួន លើកឡើងជាអាទិ៍ថា យើងចង់ឲ្យមានការសន្ទនាគ្នាបន្តទៅ ពីព្រោះនៅ ស្លូវ៉ាគី មានអ្នកស្រុកច្រើនណាស់ ដែលយល់ថា ត្រូវតែមានទំនាក់ទំនងល្អ ជាមួយសហព័ន្ធរុស្ស៊ី ហើយត្រូវ តែធ្វើសព្វបែបយ៉ាង ដើម្បីឲ្យមានការនិយាយគ្នាបន្តប្រព្រឹត្តទៅ រវាងប្រទេសយើង រវាងលោកខាងលិច និង លោកខាងកើត។ យើងរស់នៅ ក្នុងទ្វីបអឺរ៉ុបរួមជាមួយគ្នា ហើយយើងមិនចង់ធ្លាក់ខ្លួនស្លាប់ ក្នុងសង្គ្រាម នុយក្លេអ៊ែរណាឡើយ យើងត្រូវតែសហការគ្នា និង ត្រូវតែចេះឮគ្នាទៅវិញទៅមក។ ទាំងប្រតិភូឯទៀតនៃសន្និសីទ ក៏ក្នុងបទអន្តរាគមន៍ខ្លួន បាននិយាយអំពី នយោបាយសរអា ដែលអង្រុន ប្រព័ន្ធសន្តិសុខក្នុងលោក ឲ្យរង្គោះរង្គើ។ យ៉ាងណាមិញ លោកនាយកចារកិច្ចក្រៅប្រទេសរុស្ស៊ី Serguei Naryshkine ក្នុងសុន្ទរកថាខ្លួន កត់សម្គាល់ជាអាទិ៍ថា ស្លន់ស្លោនៅពីមុខចរន្ដផ្លាស់ប្តូរក្នុងលោក បស្ចិមលោក ត្រៀមសង់ឡើងនៅជុំវិញខ្លួន គឺ រនាំងដែកថ្មី។
ការប្រយុទ្ធទល់នឹង អ្វីដែលហៅថា ការគម្រាមពីខាងរុស្ស៊ីដែលគេប្រឌិតឡើងក្លាយទៅជាគំនិតចាក់ឬសជាប់ក្នុងនយោបាយក្រុងវ៉ាស៊ីនតោន។ គំនិតនេះ រីកផុសផុលដល់ទំហំ និងកម្រិតលែងទំនងសោះ លុះទាល់តែគេអាចនិយាយទៅហើយ អំពី ការវិលត្រឡប់ទៅកាន់ កាលសម័យដ៏អាប់អួរ នៃ សង្គ្រាមត្រជាក់ តែម្តង។ ថ្លែងក្នុងថ្ងៃចុងក្រោយនៃការងារសន្និសីទ លោករដ្ឋមន្ត្រីការបរទេសរុស្ស៊ី Serguei Lavrov ចង្អុលឲ្យឃើញថា សម្រាប់បង្ខូចឈ្មោះប្រទេសរុស្ស៊ីតទៅទៀត បស្ចិមលោក ចាត់ចែងគ្មានឈប់ជា អំពើបង្កហេតុ នយោបាយយ៉ាងកម្រោល។ ជាក់ស្តែង របស់ដែលហៅថា សំណុំរឿង Skripal គឺជាលេសប្រឌិតឡើង សម្រាប់បណ្តេញពួកមន្ត្រីទូតរុស្ស៊ី ដោយគ្មានអ្វីជាសំអាងសោះ មិនគ្រាន់តែចេញពី សរអា និង អង់គ្លេស ប៉ុណ្ណោះទេ តែក៏ទាំងពីប្រទេសឯទៀត ដែលត្រូវគេមួលដៃឲ្យធ្វើ។
ការប្រមាថត្រង់ៗបែបនេះ លើច្បាប់ អន្តរជាតិ និងលើ សីលធម៌ការទូត រុស្ស៊ីមិនដែលបានឃើញយូរមកហើយ។ រុស្ស៊ីនឹងបន្តប្រតិកម្មបកវិញ ទល់នឹងជំហានប្រភេទនេះ ប៉ុន្តែព្រមជាមួយនេះ រុស្ស៊ីចង់កំណត់ឲ្យបានដូចចិត្ត តើអ្វីជាការដែលមានមែនពិត។ ម៉្លោះហើយបានជារុស្ស៊ី ទទូច ឲ្យធ្វើអង្កេតយ៉ាងល្អិតល្អន់ និង ស្គាល់ការទទួលខុសត្រូវ ដោយស្រប ទាំងស្រុងនឹង អនុសញ្ញាស្តីអំពីការហាមឃាត់អាវុធគីមី។ លោក Thomas Greminger អគ្គលេខាធិការនៃ អង្គការដើម្បីសន្តិសុខនិងសហប្រតិបត្តិការនៅអឺរ៉ុប OSCE រំលឹកថា ១០ ឆ្នាំមុន ពេលថ្លែងក្នុងសន្និសីទក្រុង Munich ស្តីអំពីសន្តិសុខ លោកប្រធានាធិបតីរុស្ស៊ី វ៉្លាឌីមៀរ ពូទីន បានព្រមានអំពីផលវិបាក ប្រសិន បើរដ្ឋទាំងឡាយមិនចេះគន់គិតដល់ ផលប្រយោជន៍គ្នា ទៅវិញទៅមកទេ។ កាលណោះលោកពូទីន បានព្រមានថា បាតុភាពនេះអាចនាំទៅកាន់ការរត់ប្រណាំងគ្នា បំពាក់សព្វាវុធ។ គួរឲ្យក្រៀមក្រំ ដែលយើងឃើញពាក្យព្រមានទាំងនេះ មួយភាគធំក្លាយទៅជាការពិត ទៅហើយ ដោយ លេចចេញមកជា អស្ថិរភាព ជំរុញយើងឲ្យសង្កេតឃើញថា ជញ្ជាំងដែលខ័ណ្ឌ សន្តិភាព ពី សង្គ្រាមចេះតែ រួញខើចស្តើងទៅៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ