លោក Carles Puigdemont ថា ឯករាជ្យភាពនៃតំបន់កាតាឡូញ៉ាមិនមែនជាដំណោះស្រាយតែមួយទេ
មួយថ្ងៃក្រោយពីតុលាការអាល្លឺម៉ង់ដោះលែង លោក Carles Puigdemont អតីតមេដឹកនាំតំបន់កាតាឡូញ៉ានៃប្រទេសអេស្ប៉ាញបានធ្វើសន្និសីទកាសែតមួយនាថ្ងៃសៅរ៍ ទី៧ មេសាក្នុងទីក្រុងប៊ែរឡាំង ប្រទេសអាល្លឺម៉ង់។ នៅក្នុងសន្និសីទកាសែតនោះ លោក Puigdemont បានធានាច្បាស់ៗថា ឯករាជ្យភាពនៃតំបន់កាតាឡូញ៉ាមិនមែនជាដំណោះស្រាយតែមួយទេ និងថាលោកត្រៀមខ្លួនរួចជាស្រេចដើម្បីធ្វើការជាមួយរដ្ឋាភិបាលអេស្ប៉ាញ។
ចុះផ្សាយនៅថ្ងៃ៖
ស្តាប់ - ០២:១២
« ខ្ញុំតែងតែនិយាយថា ឯករាជ្យភាពនៃតំបន់កាតាឡូញ៉ាមិនមែនជាដំណោះស្រាយតែមួយទេ ហើយយើងបានត្រៀមខ្លួនដើម្បីស្តាប់ និងធ្វើការជាមួយរដ្ឋអំណាចអេស្ប៉ាញ ប្រសិនបើទីក្រុងម៉ាឌ្រីដមានផែនការជាក់ច្បាស់មួយសម្រាប់តំបន់កាតាឡូញ៉ា » នេះជាការថ្លែងរបស់លោក Carles Puigdemont នៅក្នុងសន្និសីទកាសែតជា ៣ភាសា គឺកាតាឡូញ៉ា អង់គ្លេស និងភាសាអេស្ប៉ាញ។ តែលោក Puigdemont ក៏បានឆ្លៀតព្រមានថា គេត្រូវចាប់ផ្តើមសារភាពការពិតដែលថា ឯករាជ្យនិយមតាមបែបប្រជាធិបតេយ្យនៅកាតាឡូញ៉ាជារឿងពិតមិនអាចប្រកែកបាន។
បន្ទាប់មកទៀត លោក Puigdemont បានប្រាប់ពីជំហររបស់ក្រុមអ្នកទាមទារឯករាជ្យនិយមនៅកាតាឡូញ៉ាដែលចង់ឲ្យអន្តរជាតិធ្វើជាអាជ្ញាកណ្តាលជួយដោះស្រាយវិបត្តិរវាងតំបន់កាតាឡូញ៉ា និងរដ្ឋាភិបាលអេស្ប៉ាញ។ នៅក្នុងន័យនេះ លោក Puigdemont បានអំពាវនាវដល់ក្រុងម៉ាឌ្រីដឲ្យទទួលយកអន្តរការីអន្តរជាតិ។ សូមជម្រាបជូនថា លោក Puigdemont ត្រូវបានរដ្ឋអំណាចអាល្លឺម៉ង់ចាប់ខ្លួនក្នុងថ្ងៃទី២៥ មីនាដោយផ្អែកតាមដីការអឺរ៉ុបធ្វើឡើងដោយរដ្ឋអំណាចអេស្ប៉ាញ។ តែបន្ទាប់ពីបានជាប់ឃុំរយៈពេល ១០ថ្ងៃមក តុលាការអាល្លឺម៉ង់ក៏បានសម្រេចដោះលែងលោក Puigdemont ឲ្យនៅក្រៅឃុំនាថ្ងៃសុក្រ ទី៦ មេសាជាមួយនឹងការតម្កល់ប្រាក់ចំនួន ៧៥ ០០០អឺរ៉ូ។
ការដោះលែងដែលតុលាការអាល្លឺម៉ង់យល់ថា ខ្លួនមិនអាចទទួលយកបានទេលើការចោទលោក Puigdemont ជាមេឧទ្ទាមពីសំណាក់រដ្ឋអំណាចអេស្ប៉ាញ។ ខណៈនេះ តុលាការអាល្លឺម៉ង់កំពុងបន្តពិនិត្យលើការចោទប្រកាន់មួយទៀតពីសំណាក់រដ្ឋអំណាចអេស្ប៉ាញលើលោក Puigdemont ថាជាអ្នកលួចបង្វែរលុយរដ្ឋ។ គេនៅមិនទាន់ដឹងថា តើអាល្លឺម៉ង់នឹងបញ្ជូនលោក Puigdemont ទៅឲ្យអេស្ប៉ាញ ឬអត់ទេ តែក្នុងពេលរង់ចាំ លោក Puigdemont នឹងបន្តឋិតក្រោមការឃ្លាំមើលពីតុលាការអាល្លឺម៉ង់។ យ៉ាងណាក៏ដោយ លោក Puigdemont បានអះអាងថា លោកមានបំណងបន្តស្នាក់នៅក្នុងប្រទេសអាល្លឺម៉ង់ និងថា ក្រោយពីនីតិវិធីតុលាការបានចប់រួចរាល់ និងមានសេរីភាពពេញទី លោកនឹងត្រឡប់ទៅរស់នៅក្នុងប្រទេសបែលហ្ស៊ិកដែលជាទីកន្លែងជ្រកកោណដំបូងរបស់ដើម្បីបន្តការតស៊ូជាបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ