រដ្ឋមន្ត្រីការបរទេសរុស្ស៊ី តួកគី និងអ៊ីរ៉ង់បានរួមប្រជុំនៅមូស្គូពិភាក្សាបញ្ហាស៊ីរី
ថ្ងៃសៅរ៍ ទី២៨ មេសា ប្រមុខការទូតរុស្ស៊ី តួកគី អ៊ីរ៉ង់ បានជួបជុំគ្នានៅទីក្រុងមូស្គូដើម្បីផ្តល់សន្ទុះថ្មីដល់ការស្វែងដំណោះស្រាយឲ្យជម្លោះនៅស៊ីរី ជាទីដែល ៣ ប្រទេសនេះ បន្កដើរតួចម្បង។ ជំនួប ត្រីភាគីនេះ ប្រព្រឹត្តទៅជាលើកដំបូង ក្រោយពី សម្ព័ន្ធអាមេរិក-បារាំង និងអង់គ្លេស បានវាយប្រហារទៅលើស៊ីរី កាលពីកន្លះខែមុន ដើម្បីសងសឹករបបក្រុងដាម៉ាស់ ដែលត្រូវគេចោទថា បានប្រើអាវុធគីមី ប្រឆាំង បណ្តាជនស៊ីវិល។
ចុះផ្សាយនៅថ្ងៃ៖
ស្តាប់ - ០២:៣៨
ជាតុល្យាការជំនួបនៅមូស្គូ រសៀលម្សិលមិញ រដ្ឋមន្ត្រីការបរទេសទាំងបីប្រទេស បានចេញ សេចក្តីថ្លែងការណ៍រួម ដែលសង្កត់ធ្ងន់ថា រុស្ស៊ី តួកគី និងអ៊ីរ៉ង់ចាត់ទុកជាការមិនអាចទទួលយកបានឡើយ សកម្មភាពណា ដែលសំដៅពុះចែកប្រទេសស៊ីរី ។ រុស្ស៊ី តួកគី និងអ៊ីរ៉ង់នឹងប្រឈមប្តូរប្តេជ្ញ ទល់នឹងការ ប៉ុនប៉ងណា បំផ្លិចបំផ្លាញលទ្ធផលដ៏ស័ក្តិសិទ្ធិហុចមកដោយ កិច្ចចរចាអន្តរស៊ីរី នៅក្រុង Astana ។ រុស្ស៊ី តួកគី និងអ៊ីរ៉ង់ ថ្លែងជាថ្មីអំពី សារសំខាន់នៃការប្រយុទ្ធឥតសម្រុះសម្រួល ទល់នឹងពួកភេរវជន ដោយឈរលើ គោរពតាមបទឈប់បាញ់ នៅតាមតំបន់សន្តិសុខចំនួន ៤ ដែលមានបង្កើតបាននៅស៊ីរី ពិតជា ដោយសារ ជំនួបនៅ រដ្ឋធានីកាហ្សាក់ស្ថាននោះ។
សេចក្តីថ្លែងការណ៍រួមនេះ ត្រូវ ៣ ប្រទេសផ្ញើជូន អសប។ ថ្លែងក្នុងសន្និសីទសារព័ត៌មានរួម ដែលប្រព្រឹត្តទៅបន្ទាប់មក លោករដ្ឋមន្ត្រីការបរទេសរុស្ស៊ី Serguei Lavrov លើកឡើងជាអាទិ៍ ដូចដែលព្រឹត្តិការណ៍ប៉ុន្មានសប្តាហ៍ចុងក្រោយបង្ហាញឲ្យឃើញស្រាប់ មិនមែន គ្រប់គ្នាទេ ដែលត្រូវការឲ្យមានសន្តិភាពនៅស៊ីរី។ រៀងរាល់តែលើក កាលណាក្នុងដំណោះស្រាយស៊ីរីមានលេចចេញមកជាក្តីសង្ឃឹម គឺ វាតែងរងនូវព្រនង់ទូង។ ដូច្នេះ ពេលដែលយើងស្រាក់កម្លាំងគ្នា បង្កបង្កើត និងកសាង ដៃគូឯទៀតរបស់យើង បែរទៅជាខិតខំកំទេចចោល ការប្រឹងប្រែងរបស់យើងស្ថាបនារួមគ្នា ដោយគេមិនខ្វល់ឡើយ ទោះបីទង្វើគេបំពានលើច្បាប់អន្តរជាតិក្តី ហើយទង្វើបែបនេះ គឺ ការវាយប្រហារ ទៅលើស៊ីរី កាល ពី ថ្ងៃ ១៤ មេសា ដោយ អាមេរិក អង់គ្លេស និងបារាំង។
ចំណែកលោករដ្ឋមន្ត្រីការបរទេសអ៊ីរ៉ង់ Mohammad Javal Zarif កត់សម្គាល់ថា ដំណើរវិវឌ្ឍទៅ នៃ ព្រឹត្តិការណ៍នៅស៊ីរី ជាពិសេស សកម្មភាពយោធា របស់ សរអា និង សម្ព័ន្ធមិត្តឯទៀត ទល់ នឹងស៊ីរី គឺបាន បង្កលក្ខណៈស្មុគស្មាញ លុះទាល់តែ បន្ទាបលទ្ធភាពសម្រាប់រកដំណោះស្រាយតាមផ្លូវនយោបាយ ឲ្យវិបត្តិ នៅស៊ីរី។ ដោយឯកភាពនឹង ប្រមុខការទូតអ៊ីរ៉ង់ លោក រដ្ឋមន្ត្រីការបរទេសតួកគី Mevlut Cavusoglu ថ្លែងថា ដំណោះស្រាយដ៏ល្អប្រសើរបំផុត គឺ ដំណោះស្រាយតាមផ្លូវនយោបាយ។ ដំណោះស្រាយណាក៏ដោយ តាមផ្លូវប្រើកម្លាំងអាវុធ គឺ ខុសច្បាប់ និងពាំនាំតែ ក្តីអន្តរាយ។
ប្រមុខការទូតទាំង ៣ ប្រទេស ជាបង្ហើយកិច្ចបានឯកភាពគ្នាថា ក្នុងដំណាក់ឥឡូវ គ្មានជម្រើសណាផ្សេង ក្រៅពី កិច្ចចរចានៅក្រុង Astana ដែលនឹងប្រព្រឹត្តទៅនៅ កណ្តាលខែឧសភា ដើម្បីដោះស្រាយបញ្ហា ផ្តល់ ជំនួយមនុស្សធម៌ឡើងវិញ និងបញ្ហាដោះដូរឈ្លើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ