គ្មានទេ រង្វាន់ណូបែលសម្រាប់អក្សរសិល្ប៍ ឆ្នាំ២០១៨
រាជបណ្ឌិតសភាស៊ុយអែត នៅថ្ងៃសុក្រនេះបានប្រកាសលើកពេល ប្រគល់ពានរង្វាន់ណូបែលសម្រាប់អក្សរសិល្បិ៍ ទៅឆ្នាំក្រោយ។ ជាច្រើនសប្តាហ៍មកហើយ វិទ្យាស្ថានកំពូលមួយនេះរបស់ស៊ុយអែត បានរងរញ្ជួយដោយសាររឿងអាស្រូវរំលោភផ្លូវភេទ ដែលបានជំរុញឲ្យសមាជិកចំនួន ៦នាក់ក្នុងចំណោម ១៨នាក់ សុំលាលែងចេញពីតំណែង។
ចុះផ្សាយនៅថ្ងៃ៖
ស្តាប់ - ០១:៥៧
នៅក្នុងសេចក្តីថ្លែងការណ៍នៅថ្ងៃសុក្រនេះ រាជបណ្ឌិតសភា ស៊ុយអែត បានពន្យល់ថា ការលំបាករបស់ស្ថាប័ន ហើយនិងការខ្វះជំនឿទុកចិត្តពីសាធារណជន គឺជាហេតុផលចំបងដែលធ្វើឲ្យរាជបណ្ឌិតសភា សម្រេចចិត្តមិនប្រគល់ពានរង្វាន់ណូបែលសម្រាប់អក្សរសិល្បិ៍នៅឆ្នាំនេះ។ នេះជាលើកទី១ នៅក្នុងរយៈពេល ជិត ៧០ឆ្នាំចុងក្រោយនេះ ដែលការប្រគល់ពានរង្វាន់ណូបែលសម្រាប់អក្សរសិល្បិ៍ត្រូវបានលើកពេលយ៉ាងដូច្នេះ។
នៅក្នុងសេចក្តីថ្លែងការណ៍របស់ខ្លួន រាជបណ្ឌិតសភាស៊ុយអែតបានអះអាងថា វិទ្យាស្ថានត្រូវការពេលវេលា ដើម្បីស្តារទំនុកចិត្ត ក្នុងចំណោមសមាជិកអចិន្ត្រៃយ៍របស់វិទ្យាស្ថាន នៅមុននឹងអាចជ្រើសរើសបេក្ខជនដែលសក្តិសមនឹងទទួលបានពានរង្វាន់ណូបែលសម្រាប់អក្សរសិល្បិ៍ ដែលរាជបណ្ឌិសភា ស៊ុយអែត បានបង្កើតឡើង តាំងពីឆ្នាំ ១៩០១។
បង្កើតឡើងនៅឆ្នាំ ១៧៨៦ រាជបណ្ឌិតសភាស៊ុយអែត ស្ថាប័នដ៏មានកិត្តិនាម លើលោក ចាប់រង្គោះរង្គើ ចុះខ្សោយ ដោយសារតែរឿងអាស្រូវផ្លូវភេទ របស់ប្រធានមជ្ឈមណ្ឌលវប្បធម៌មួយកន្លែង ដែល ឧបត្ថម្ភ គាំទ្ររាជបណ្ឌិតសភាស៊ុយអែត។ លោកJean Claude Arnault ស្វាមីរបស់លោកស្រី Katarina Frostenson សមាជិកម្នាក់របស់រាជបណ្ឌិតសភា បានរងការប្តឹងផ្តល់ពីមនុស្សស្រី ១៨នាក់ ពីបទ រំលោភ បំពារបំពានផ្លូវភេទ។
ប៉ុន្មានសប្តាហ៍នេះ សមាជិករបស់វិទ្យាស្ថាន បានប្រកាសដើរចេញ ពីមុខតំណែងមួយជីវិតរបស់ខ្លួន ជាបន្តបន្ទាប់ ដើម្បីបរិហារ រាជបណ្ឌិតសភា ដែលអសកម្ម មិនដោះស្រាយរឿងអាស្រូវផ្លូវភេទលើកនេះ។ រឿងអាស្រូវលើកនេះ បានធ្វើឲ្យរាជបណ្ឌិតសភា បាត់បង់សមាជិករបស់ខ្លួន៧នាក់ ក្នុងចំណោម១៨នាក់។ មានសមាជិកនៅសល់តែ ១១នាក់ វិទ្យាស្ថាន គ្មានសំឡេងគ្រប់គ្រាន់ ដើម្បីបោះឆ្នោត ជ្រើសរើសអនាគតជ័យលាភីណូបែលអក្សរសិល្បិ៍។ នៅក្នុងសេចក្តីថ្លែងការណ៍របស់ខ្លួន រាជបណ្ឌិតសភា អះអាងថា ដំណើការជ្រើសរើសបេក្ខជននៅតែប្រព្រឹត្តទៅធម្មតា។ ប៉ុន្តែ ការប្រគល់ពានរង្វាន់ណូបែលអក្សរសិល្ប៍សម្រាប់ឆ្នាំ ២០១៨ នឹងត្រូវលើកទៅធ្វើសរុប នៅឆ្នាំ ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ