លោក វ៉្លាឌីមៀរ ពូទីន ឡើងកាន់តំណែងជាផ្លូវការជាប្រធានាធិបតីរុស្ស៊ីអាណត្តិទី៤
នៅរុស្ស៊ី ពិធីទទទួលសច្ចាប្រណិធានដោយលោក វ៉្លាឌីមៀរ ពូទីន ឡើងកាន់មុខតំណែងជាប្រធានាធិបតីសម្រាប់អាណត្តិទី៤ បានប្រព្រឹត្តទៅថ្ងៃចន្ទនេះ នៅវេលាម៉ោង ១២ថ្ងៃត្រង់។ បុរសខ្លាំងនៃវិមានក្រេមឡាំង បានទទួលជ័យជំនះដ៏ត្រចះត្រចង់ដោយសម្លេងគាំទ្រដល់ទៅជាង ៧៦%ក្នុងការបោះឆ្នោតជ្រើសរើសប្រធានាធិបតីកាលពីថ្ងៃ ១៨ មីនាកន្លងទៅ។
ចុះផ្សាយនៅថ្ងៃ៖
ស្តាប់ - ០២:១៤
លើកនេះ លោកពូទីន បានសម្រេចថាមិនយាត្រាទៅកាន់វិមានក្រេមឡាំង ដោយខាឃាំងវិថីជាច្រើនក្នុងរដ្ឋធានីនាំឲ្យស្ទះចរាចរណ៍ដូចកាលពី ៦ឆ្នាំមុនឡើយ។ ក្នុងឆ្នាំ ២០១២ រូបភាពបង្ហាញពីក្បួនរថយន្ដ លោកប្រធានាធិបតីនៅតាមផ្លូវដែលសំអាតពីចរាចរណ៍ពីបណ្តាជន បានញ៉ាំងឲ្យភ្នែកនៅបរទេសក៏ដូចជានៅរុស្ស៊ីផ្ទាល់មានចំណាប់អារម្មណ៍ថា មេដឹកនាំរុស្ស៊ីរូបនេះ ហាក់បី ញែកខ្លួនឯង ឲ្យនៅដាច់ឯកោពីប្រជាជន។
ឆ្នាំនេះ លោកពូទីនបានវត្តមានជាស្រេចក្នុងបរិវេណនៃកំពែងវិមានក្រេមឡាំង។ ពិធីទទួលសច្ចាប្រណិធានបានប្រព្រឹត្តទៅក្នុងមហាសាលដ៏សែនអ៊ឹកធឹកនៃវិមានក្រេមឡាំង ដោយមានការចូលរួមនៃ ឥស្សរជនដ៏ល្បីៗនៃប្រទេសប្រមាណ ៥.០០០ នាក់ដែលក្នុងនោះមានគ្រប់តែសមាជិកនៃសភាទាំងពីរថ្នាក់គ្រប់តែសមាជិករដ្ឋាភិបាលគ្រប់តែអភិបាលខេត្តចំណុះសហព័ន្ធរុស្ស៊ី ប្រធានតុលាការធម្មនុញ្ញប្រធានតុលាការកំពូលបណ្តាតំណាងនៃគ្រប់មជ្ឈដ្ឋានសាសនាក្នុងប្រទេស។ល។
ស្របនឹងមាត្រាទី៨២ នៃរដ្ឋធម្មនុញ្ញដោយយោងទៅលើលទ្ធផលបោះឆ្នោត លោកប្រធានតុលាការធម្មនុញ្ញបានប្រកាសយ៉ាងឧឡារឹក អំពីការចូលកាន់តំណែងជាផ្លូវការនៃលោក វ៉្លាឌីមៀរ ពូទីន ជាប្រធានាធិបតីអាណត្តិទី៤។ នាទីគន្លឹះនៃពិធីគឺលោក ពូទីនបានដាក់បាតដៃស្តាំរបស់គាត់លើក្រាំងរដ្ឋធម្មនុញ្ញទាំងបន្លឺឡើងនូវពាក្យសម្បថមាន ៣៣ ព្យាងដូចតទៅ ៖
-“ខ្ញុំសូមស្បថថាក្នុងដំណើរបំពេញមុខងារជាប្រធានាធិបតីសហព័ន្ធរុស្ស៊ីគោរពនិងការពារសិទ្ធិនិងសេរីភាពពលរដ្ឋ,គោរពនិងការពាររដ្ឋធម្មនុញ្ញសហព័ន្ធរុស្ស៊ី ,ការពារអធិបតេយ្យនិងឯករាជ្យសន្តិសុខនិងបូរណភាពរដ្ឋ , បម្រើប្រជាជនដោយស្មោះត្រង់”។
បន្ទាប់មក ក្នុងសុន្ទរកថាខ្លួន លោកប្រធានាធិបតីពូទីន ថ្លែងថា មនៈសិការគាត់ជ្រួតជ្រៀបទៅដោយនាទីទទួលខុសត្រូវនៅពីមុខពលរដ្ឋម្នាក់ៗ នៅពីមុខប្រជាជនពហុជាតិនៃប្រទេសរុស្ស៊ី - ប្រទេស ដែលមានប្រវត្តិខ្លួនជារដ្ឋចាស់ឆ្នាំច្រើនសតវត្សរ៍មកហើយដែលធ្លាប់ដណ្តើមបានជ័យជំនះនិងសមិទ្ធិផលដ៏សំបើមៗ។
លោក ពូទីន គូសបញ្ជា្កក់ថាគាត់ចាត់ទុកករណីយកិច្ចគាត់និងអត្ថន័យនៃជីវិតគាត់ទាំងមូលគឺធ្វើសព្វបែបយ៉ាងសម្រាប់ប្រទេសរុស្ស៊ីសម្រាប់បច្ចុប្បន្នកាលនិងអនាគតកាលប្រទេសនេះក្នុងឋានៈជាប្រទេសមានសេចក្តីសុខនិងចម្រើនរុងរឿងដើម្បីសុខុមាលភាពក្នុងគ្រួសាររុស្ស៊ីនិមួយៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ