មេដឹកនាំប្រឆាំងអាមេនីក្លាយជានាយករដ្ឋមន្ត្រី
មេក្រុមប្រឆាំងនៅអាមេនី លោក Nikol Pachinian ថ្ងៃអង្គារ ៨ ឧសភា ត្រូវបានរដ្ឋសភា អតីតសាធារណរដ្ឋសូវៀតនេះ នៃតំបន់ភ្នំកូកាសខាងត្បូង បោះឆ្នោតជ្រើសតាំង ជានាយករដ្ឋមន្ត្រី ដែលជា ការបោះឆ្នោតលើកទី២ បើគិតក្នុងមួយសប្តាហ៏កន្លងទៅ ក្រោយពីប្រទេសនេះ បោកកញ្ជ្រោក អស់ជាង ២០ ថ្ងៃ ដោយរលកបាតុកម្មប្រឆាំងរដ្ឋាភិបាល។ ម៉ូស្គូក៏ បានសំដែងដែរ ការអបអរសាទរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
ជាបេក្ខជនឈរឈ្មោះតែម្នាក់ឯងដែលតាមសំដីលោក Nikol Pachinian ក្នុងឋានៈជាតំណាងរាស្ត្រខាងបក្សប្រឆាំងនិងជាអតីតអ្នកកាសែតគឺជា”បេក្ខជនរបស់ប្រជាជន“ក្នុងការបោះឆ្នោតនៅរដ្ឋសភាបាន ទទួលសម្លេងគាំទ្រពីតំណាងរាស្ត្រដល់ទៅ ៥៩នាក់គឺលើសពីចំនួន ៥៣ នាក់ដែលត្រូវការជាចាំបាច់ចំណែកសម្លេងជំទាស់មានតែ៤២ប៉ុណ្ណោះ។
នេះជាការបោះឆ្នោតលើកទី២ បន្ទាប់ពីបេក្ខភាពគាត់ក្នុងការបោះឆ្នោតលើកមុនគឺថ្ងៃ ១ឧសភាបានទទួលសម្លេងគាំទ្ពីតំណាងរាស្ត្រតែ៤៥នាក់ពីព្រោះសម្លេងដែលប្រឆាំងនឹងរូបគាត់កាលណោះមានដល់ទៅ៥៨ សម្លេង ជាសម្លេងរបស់តំណាងរាស្ត្រខាងបក្សកាន់អំណាច -បក្សសាធារណរដ្ឋអារមេនី។ លោក Pachinian ជាប្រធានក្រុមអ្នកតំណាងរាស្ត្រខាងបក្សប្រឆាំងក្រោមឈ្មោះថា “ ច្រកចេញ “ដែលមានតែ ៩ អាសនៈប៉ុណ្ណោះពីក្នុងចំណោមអាសនៈសរុបចំនួន ១០៥ ក្នុងរដ្ឋសភា។ ដោយស្រេកឃ្លានចង់ដឹកនាំរដ្ឋាភិបាលក្រោយពីឃើញលទ្ធផលនៃការបោះឆ្នោតថ្ងៃ១ឧសភានោះ គាត់ប្រកាសថាមានតែមហាជននៅតាមទីលាននិងផ្លូវថ្នល់ដែលបំពាក់ទៅដោយសិទ្ធជ្រើសរើសនាយករដ្ឋមន្ត្រី។ ពិតជាឃ្លានេះ ដែលជាសញ្ញាសម្រាប់បក្សពួកគាត់ទាំងពាន់ៗនាក់ដែលបះបោរគ្មានឈប់បន្តធ្វើបាតុកម្មនិងកូដកម្មប្រឆាំងនឹងអំពើពុករលួយដែលដុះស្លែក្នុងមជ្ឈដ្ឋានដឹកនាំនៅអារមេនីហេតុដែលនាំឲ្យពិការដល់ចរាចរណ៍ផ្លូវរថយន្ដផ្លូវដែកនិងថែមទាំងអាកាសយានដ្ឋានទៅផង។ ម៉្លោះហើយបានជាដើម្បីបង្វែរជីវភាពសង្គមឲ្យមានប្រក្រតីភាពវិញតំណាងរាស្ត្រខ្លះខាងបក្សកាន់អំណាចដាច់ចិត្តបោះឆ្នោតគាំទ្រមេប្រឆាំងនេះ។
មិនមែនចៃដន្យទេដែលក្នុងសេចក្តីថ្លែងការណ៍បន្ទាប់ពីជាប់ឆ្នោតជានាយករដ្ឋមន្ត្រី លោក Pachinian គូសបញ្ជាក់ថាក្នុងសមាសភាពរដ្ឋាភិបាលគាត់នឹងពុំមានឡើយ ពួកមហាសេដ្ឋីដែលកាន់អំណាចផងមានទ្រព្យសម្បត្តិកប់ពពកផង។
ដើម្បីឲ្យម៉ូស្គូស្ងប់ចិត្តក្នុងសុន្ទរកថាថ្លែងថ្ងៃ ៨ ឧសភានៅពីមុខពួកអ្នកតំណាងរាស្ត្រ លោក Pachinian សង្កត់ធ្ងន់ថា ៖ ភាពជាដៃគូយោធាជាមួយរុស្ស៊ីគឺជាទិសដៅមួយជាអាទិភាពនៃនយោបាយអារមេនីនិងជាកត្តាសំខាន់សម្រាប់ធានាសន្តិសុខដល់អារមេនី។ ជាការកត់សម្គាល់នៅអារមេនីមានមូលដ្ឋានទ័ពជើងគោករុស្ស៊ីប្រមាណ ៥.០០០ នាក់ស្ថិតនៅប្រចាំការ។
អារមេនីជាសមាជិកនៃអង្គការសន្ធិសញ្ញាដើម្បីសន្តិសុខរួមនិងសហភាពសេដ្ឋកិច្ចអឺរ៉ុបអាស៊ី ដែលសុទ្ធតែនាំមុខដោយរុស្ស៊ី។
ក្នុងសារអបអរផ្ញើជូនលោកនាយករដ្ឋមន្ត្រីអារមេនី Nikol Pachinian លោកប្រធានាធិបតីរុស្ស៊ី វ៉្លាឌីមៀរ ពូទីន សំដែងសេចក្តីសង្ឃឹមថា រដ្ឋាភិបាលក្រោមការដឹកនាំលោក Pachinian មុខជានឹងចេះពង្រឹងទំនាក់ទំនងមិត្តភាពនិងសម្ព័ន្ធមិត្តរវាងប្រទេសទាំងពីរដែលបច្ចុប្បន្នរឹតដោយចំណងសេដ្ឋកិច្ចយ៉ាងមាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ