សមិទ្ធិករអេហ្ស៊ីប៖ ឃ្លង់មិនមែនជាបញ្ហាសុខភាព ប៉ុន្តែជាបញ្ហាសង្គមរើសអើងរូបសម្បត្តិ
បន្ទាប់ពីរឿង អ្នកណាក៏ដឹង Everybody knowរបស់សមិទ្ធិករអ៊ីរ៉ង់ ដែលនិយាយពីអាថ៌កំបាំងរឿងសម្ងាត់ក្នុងគ្រួសារ មហោស្រពកាន នៅយប់ម្សិលមិញបានចាក់បញ្ចាំងកុនមួយទៀត រឿងYomeddine ដែលនិយាយពីសង្គមរើសអើងទៅលើអ្នកកើតជម្ងឺឃ្លង់ នៅ ប្រទេសអេហ្ស៊ីប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ជាភាសាអារ៉ាប់ Yomeddine មានន័យថា ការកាត់ទោសចុងក្រោយ ទៅតាមកម្ពីរបស់ព្រះយេស៊ូ ជាខ្សែភាពយន្តខ្នាតវែងលើកដំបូង របស់សមិទ្ធិករអេហ្ស៊ីប Abu Bakr Shawky។ ជាមួយការជ្រើសរើសរឿង Yomeddine សម្រាប់ប្រកួតប្រជែងដណ្តើមតាល់ប័ត្រមាស សមិទ្ធិករជាតិអេហ្ស៊ីបបានឱកាសមកបង្ហាញមុខជាលើកទី១ នៅក្នុងមហោស្រពកាន។
Yomeddine និយាយពីលក្ខខណ្ឌជីវិត និងការរើសអើងក្នុងសង្គមទៅលើអ្នកកើតជម្ងឺឃ្លង់ នៅប្រទេសអេហ្ស៊ីប។ Beshay មានមុខមាត់អាក្រក់ រើកកាយគំនរសំរាមដើម្បី រើសបានរបស់ល្អខ្លះ យកទៅលក់ឲ្យឈ្មួញ។ ពីឈុតមួយទៅឈុតមួយ គេឃើញថា Beshay កើតជម្ងឺឃ្លង់ រស់នៅ ក្នុងមណ្ឌលមួយ ដែលគេបង្កើតឡើងសម្រាប់អ្នកកើតជម្ងឺឃ្លង់ និង ស្ថិតនៅមិនឆ្ងាយប៉ុន្មានពី វាលខ្សាច់រហោឋាន។ នៅក្រោយប្រពន្ធស្លាប់ បាត់ទៅ Beshay ដែលបានជួបម្តាយក្មេក មកគោរពផ្នូររបស់ប្រពន្ធ ចាប់ផ្តើមនឹកគិត ចង់ស្វែងរកក្រុមគ្រួសារ។ Beshay នៅ ចាំបានថា ឪពុករបស់ខ្លួនបានយកខ្លួនមកដាក់នៅមណ្ឌលព្យាបាលជម្ងឺឃ្លង់ និងបានសន្យាថា នឹងត្រលប់មកយកកូន នៅពេលកូនជាពីជម្ងឺឃ្លង់។
មិត្តភក្តិកើតជម្ងឺឃ្លង់ដូច Beshay បានហាមឃាត់មិនឲ្យ Beshay ផ្សងព្រេងទៅស្វែងរកឪពុកម្តាយ ដែលរស់នៅខេត្តដ៏សែនឆ្ងាយនៅភាគខាងត្បូងអេហ្ស៊ីបនោះទេ។ គ្រប់មិត្តភក្តិរបស់ Beshay និយាយបែបចំអកថា អ្នកកើតឃ្លង់នៅក្នុងមណ្ឌល គឺមិនអាចនៅសល់មានក្រុមគ្រួសារទៀតនោះទេ។ ពាក្យនេះមានន័យស្មើនឹងការបោះបង់ចោលកូនកើតឃ្លង់ ប៉ុន្តែ សម្រាប់ Beshay គេត្រូវតែចេញទៅស្វែងរកឪពុក ដែលបានសន្យាថា នឹងត្រលប់មកទទួលយកទៅវិញ នៅពេលខ្លួនគេជា។
នៅតាមផ្លូវ Beshay បានរកឃើញថា កុមារអូបាម៉ា បានលបលាក់ខ្លួនក្នុងរទេះព្រោះតែគេចង់ធ្វើដំណើរជាមួយ Beshay និងមិនចង់ទ្រាំទ្ររស់នៅក្នុងមណ្ឌលកុមារកំព្រា តទៅទៀត។ នៅតាមផ្លូវ Beshay និងកុមារអូបាម៉ាបានជួបឧបសគ្គមិនថា គ្រោះថ្នាក់បែកក្បាល ចោរប៉ុនប៉ងលួចលា លាដែលស្លាប់ដោយសារតែបាក់កម្លាំងដើរកាត់វាលរហោឋាន ហើយនិងការមើលងាយ រើសអើងខ្លាចឆ្លងជម្ងឺឃ្លង់របស់អ្នកស្រុក។
នៅត្រង់ឈុតមួយដែលកុមារអូបាម៉ាចុះមុជទឹកស្ទឹង នៅ មិនឆ្ងាយប៉ុន្មានពីហ្វូងសត្វគោ ស្រ្តីមុខមាត់ស្អាតបាតម្នាក់ស្រែកឲ្យ Beshay និងអូបាម៉ា ប្រញាប់ងើបចេញពីទឹក ព្រោះគេខ្លាច ជម្ងឺឃ្លង់របស់Beshay ឆ្លងទៅកូនរបស់នាង។ ស្រ្តីម្នាក់នោះមិននិយាយអ្វី នៅពេលសត្វគោ ចុះទឹក ឬសំរាមនៅស្កេកស្កះនៅតាមច្រាំង ប៉ុន្តែនៅពេល Beshayដែលជាពីជម្ងឺឃ្លង់ ប៉ុន្តែ នៅតែមានមុខមាត់ស្នាមខូចដោយសារឃ្លង់ បែរជាត្រូវមាត់ជេផ្តាសាទៅវិញ។ សម្រាប់សមិទ្ធិករអេហ្ស៊ីប អ្នកដែលធ្លាប់កើតជម្ងឺឃ្លង់ មិនមែនប្រឈមនឹងបញ្ហាខ្វះថ្នាំពេទ្យការព្យាបាលនោះទេ ប៉ុន្តែ គឺ ប្រឈមខ្លាំងនឹងការមើលងាយ រើសអើងលើរូបរាង មុខមាត់នៅក្នុងសង្គមតែម្តង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ