អេស្ប៉ាញ៖សភាកាតាឡូញ៉ាបើកប្រជុំដើម្បីជ្រើសតាំងមេដឹកនាំថ្មីជំនួសលោក Carles Puigdemont
នៅថ្ងៃសៅរ៍ ទី១២ ឧសភា សភានៃតំបន់ស្វយ័តកាតាឡូញ៉ាក្នុងប្រទេសអេស្ប៉ាញបានរួមប្រជុំគ្នាដើម្បីជ្រើសរើសមេដឹកនាំថ្មីជំនួសកន្លែងលោក Carles Puigdemont ដែលទើបបានលាលែង និងកំពុងភៀសខ្លួនរស់ក្នុងប្រទេសអាល្លឺម៉ង់ដើម្បីគេចពីសំណាញ់តុលាការអេស្ប៉ាញ។ លោកគីម តូរ៉ាដែលជាបេក្ខជននៃក្រុមអ្នកទាមទារឯករាជ្យមានសំណាងក្លាយជាមេដឹកនាំទី១៣១ នៃតំបន់កាតាឡូញ៉ា។ នៅក្នុងសុន្ទរកថាថ្លែងក្នុងសភាកាតាឡូញ៉ា លោកគីម តូរ៉ាបានសន្យាធ្វើការមិនសំចៃដៃដើម្បីកសាងសាធារណរដ្ឋកាតាឡូញ៉ាមួយ តែមិនបិទផ្លូវចរចាជាមួយរដ្ឋាភិបាលក្នុងទីក្រុងម៉ាឌ្រីដទេ។
ចុះផ្សាយនៅថ្ងៃ៖
ស្តាប់ - ០១:៥៥
គឺជាសុន្ទរកថារយៈពេល ៥០នាទីដែលលោកគីម តូរ៉ាសុំការគាំទ្រពីក្រុមអ្នកតំណាងរាស្រ្តសម្រាប់តំណែងប្រធានតំបន់កាតាឡូញ៉ា ហើយដើម្បីអាចជាប់ឆ្នោតចាប់ពីការបោះឆ្នោតក្នុងជុំទី១ ទៅ លោកគីមត្រូវការសម្លេងគាំទ្រភាគច្រើនចំនួន ៦៨សម្លេង។ តែបើលោកគីមមិនអាចទទួលបានសម្លេងគាំទ្រភាគច្រើនលើសលប់ពីសភានៅពេលនេះទេ ការបោះឆ្នោតនៅជុំទី២ នាថ្ងៃចន្ទ ទី១៤ ឧសភាសប្តាហ៍ក្រោយជារឿងចៀសមិនរួច។ « យើងនឹងគោរពតាមលទ្ធផលបោះឆ្នោតប្រជាមតិកាលពីថ្ងៃទី១ តុលា ឆ្នាំ ២០១៧ ពោលការកសាងរដ្ឋឯករាជ្យមួយក្រោមរូបភាពសាធារណរដ្ឋជាមួយនឹងកម្មវិធីរដ្ឋាភិបាលដើម្បីការរួបរួមសង្គម និងភាពសំបូររុងរឿងសេដ្ឋកិច្ចរបស់កាតាឡូញ៉ា » នេះជាការថ្លែងរបស់លោកគីម តូរ៉ា។
ដោយចៀសវាងមិននិយាយពាក្យ « ឯករាជ្យ » លោកគីម តូរ៉ាមិនភ្លេចថ្លែងរិះគន់ ទិតៀនតុលាការអេស្ប៉ាញ មហាក្សត្រអេស្ប៉ាញ និងរដ្ឋាភិបាលរបស់លោកនាយករដ្ឋមន្រ្តីម៉ារីយ៉ាណូ រ៉ាហយ តែមិនបិទផ្លូវចរចាទេ។ ទន្ទឹមគ្នានេះ លោកគីម តូរ៉ាក៏បានលើកឡើងពីស្ថានការណ៍ពិសេសដែលតំបន់កាតាឡូញ៉ាកំពុងជួបប្រទះ ពិសេសវិបត្តិមនុស្សធម៌។ មានអាយុ ៥៥ឆ្នាំ លោកគីម តូរ៉ាដែលជាមេធាវី អ្នកនិពន្ធ និងអ្នកបោះពុម្ភផ្សាយ គឺជាអ្នកតំណាងរាស្រ្តម្នាក់ដែលមជ្ឈដ្ឋានសាធារណៈទូទៅនៅកាតាឡូញ៉ាមិនសូវស្គាល់ប៉ុន្មានទេ។ តែឈ្មោះ និងបេក្ខភាពរបស់លោកគីម តូរ៉ាត្រូវបានស្នើឡើងដោយមេដឹកនាំកាតាឡូញ៉ាធ្លាក់ពីអំណាចលោក Carles Puigdemont។
លោក Puigdemont ដែលកំពុងភៀសខ្លួនរស់ក្នុងប្រទេសអាល្លឺម៉ង់ និងដែលរដ្ឋអំណាចអេស្ប៉ាញកំពុងសុំអាល្លឺម៉ង់ឲ្យបញ្ជូនខ្លួនលោក Puigdemont ទៅឲ្យអេស្ប៉ាញ។ សូមជម្រាបជូនថា រូបលោក Puigdemont រួមទាំងអ្នកទាមទារឯករាជ្យជាច្រើនរូបផ្សេងទៀតនៅតំបន់កាតាឡូញ៉ាកំពុងត្រូវបានតុលាការអេស្ប៉ាញចោទប្រកាន់ក្នុងបទបះបោរ និងលួចបង្វែរលុយរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ