បរិស្ថាន៖អឺរ៉ុបបញ្ជូនសមាជិក ៦ប្រទេសទៅកាត់ទោសនៅតុលាការអឺរ៉ុបក្នុងបទបំពុលបរិយាកាស
នៅថ្ងៃព្រហស្បតិ៍ ទី១៧ ឧសភា គណៈកម្មការអឺរ៉ុបបានសម្រេចបញ្ជូនសមាជិកចំនួន ៦ប្រទេសទៅកាន់តុលាការអឺរ៉ុបពីបទមិនគោរពច្បាប់បរិស្ថានអឺរ៉ុប។ សមាជិកអឺរ៉ុបទាំង ៦ប្រទេសមាន អាល្លឺម៉ង់ បារាំង អង់គ្លេស ហុងគ្រី អ៊ីតាលី និងប្រទេសរូម៉ានី។ សូមជម្រាបជូនថាកន្លងមក គណៈកម្មការអឺរ៉ុបក៏ធ្លាប់បានចាត់វិធានការដូចគ្នានេះទៅលើសមាជិក ២ប្រទេស គឺប៊ុលហ្ការី និងប្រទេសប៉ូឡូញ។ តែមកទល់ពេលនេះ ទណ្ឌកម្មផាកពិន័យជាប្រាក់នៅមិនដែលបានអនុវត្តន៍ទេ។
ចុះផ្សាយនៅថ្ងៃ៖
ស្តាប់ - ០២:១១
តាមពិតទៅ មានសមាជិកដល់ទៅ ៩ប្រទេសដែលបានទទួលរងការចោទប្រកាន់ពីគណៈកម្មការអឺរ៉ុបពីបទមិនគោរពច្បាប់បរិស្ថានអឺរ៉ុបត្រឹមត្រូវ។ តែក្នុងចំណោម ៩ប្រទេសនោះ មានតែអាល្លឺម៉ង់ បារាំង អង់គ្លេស ហុងគ្រី អ៊ីតាលី និងប្រទេសរូម៉ានីទេដែលអឺរ៉ុបបញ្ជូនទៅកាន់តុលាការអឺរ៉ុប។ ចំណែក ៣ប្រទេសទៀតមានអេស្ប៉ាញ ស្លូវ៉ាគី និងសាធារណរដ្ឋឆែកត្រូវបានគណៈកម្មការអឺរ៉ុបដាក់ពិន័យ។ ប្រទេសអាល្លឺម៉ង់ បារាំង និងអង់គ្លេសបានជាប់ចោទពីបទមិនគោរពកម្រិតនៃការបញ្ចេញឧស្ម័នឌីអុកស៊ីតអាសូត NO2 ទៅក្នុងលំហអាកាស។ កំណើនឧស្ម័នឌីអុកស៊ីតអាសូតដែលអឺរ៉ុបចង់និយាយ គឺឧស្ម័នពុលចេញពីបំពុងស៊ីម៉ាំងឡាន។
ចំណែក ៣ប្រទេសទៀត គឺហុងគ្រី អ៊ីតាលី និងប្រទេសរូម៉ានីបានជាប់ចោទពីបទទុកបណ្តោយឲ្យមានកំណើនសារធាតុតូចល្អិតឆ្មា PM១០ នៅក្នុងលំហអាកាស រួមមានធូលីដី ផ្សែង ម្រែងភ្លើង ឬមួយលម្អងផ្កាជាដើម។ តាមទីភ្នាក់ងារបរិស្ថានអឺរ៉ុប វត្តមានឧស្ម័នឌីអុកស៊ីតអាសូត NO2 បានបណ្តាលឲ្យមានមនុស្សស្លាប់មុនអាយុប្រមាណជា ៧៥ ០០០នាក់ក្នុងមួយឆ្នាំនៅអឺរ៉ុប ក្នុងនោះ ១៤ ០០០នាក់ក្នុងប្រទេសអង់គ្លេស ១២ ៨០០នាក់នៅអាល្លឺម៉ង់ និង ៩ ៣០០នាក់នៅក្នុងប្រទេសបារាំង។ ចំណែកសារធាតុតូចល្អិតឆ្មា PM១០ បានសម្លាប់មនុស្សមុនអាយុជិត ៤០០ ០០០នាក់ក្នុងមួយឆ្នាំនៅអឺរ៉ុប ក្នុងនោះ ៦៦ ០០០នាក់ក្នុងប្រទេសអាល្លឺម៉ង់ ៦០ ០០០នាក់នៅអ៊ីតាលី និង ៣៥ ០០០នាក់នៅក្នុងប្រទេសបារាំង។
លោក Karmenu Vella ស្នងការអឺរ៉ុបទទួលបន្ទុកបរិស្ថានបានថ្លែងនៅចំពោះមុខក្រុមអ្នកកាសែតថា គណៈកម្មការអឺរ៉ុបធ្លាប់បានព្រមានប្រទេសទាំងនេះលើកដំបូងតាំងពីឆ្នាំ ២០០៥ មកម្ល៉េះ តែពួកគេមិនបានចាត់វិធានការអ្វីទាំងអស់។ តាមលោក Vella អឺរ៉ុបមិនអាចបន្តរង់ចាំរហូតដល់ក្រោយឆ្នាំ ២០២០ ឬ ២០២៥ បានទៀតឡើយ។ កន្លងមកក្នុងបញ្ហាកំណើនសារធាតុតូចល្អិតឆ្មា PM១០ អឺរ៉ុបក៏ធ្លាប់ចាត់វិធានការលើសមាជិក ២ប្រទេស គឺប៊ុលហ្ការី និងប៉ូឡូញ។ តែមកទល់ពេលនេះ អឺរ៉ុបមិនដែលចាត់វិធានការផាកពិន័យជាប្រាក់ទៅលើសមាជិកណាម្នាក់ក្នុងបទមិនគោរពច្បាប់បរិស្ថាននេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ