មូស្គូ និងប៉េកាំងរុញកូនអុកខ្លួនទៅមុខនៅអ៊ីរ៉ង់ ខណៈដែលអឺរ៉ុបគំរាមដោយទណ្ឌកម្មអាមេរិកាំង
ថ្ងៃព្រហស្បតិ៍ ១៧ ឧសភា រុស្ស៊ីនិងចិន រុញកូនអុកខ្លួនទៅមុខ ដើម្បីបន្តរកស៊ី ជាមួយអ៊ីរ៉ង់ ដោយផ្ទុយនឹងឆន្ទៈប្រធានាធិបតីអាមេរិកាំង ដូណាល់ ត្រាំ ដែលខ្ទប់ ក្រុងតេហេរ៉ង់ ឲ្យនៅក្នុងភាពឯកោសេដ្ឋកិច្ច ពេលដែលសហភាពអឺរ៉ុប ខំរក្សាទុកទាំងលំបាកលំបិន ទីផ្សារអ៊ីរ៉ង់ ដែលជាទីផ្សារអំណោយផល សម្រាប់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ការដកខ្លួននៃសរអាចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ហែហមទៅដោយការវិលត្រឡប់វិញ នៃទណ្ឌកម្មអាមេរិកាំងគួរឲ្យខ្លាច បង្កឡើងជាហានិភ័យហិរញ្ញវត្ថុមិនលេងសើចឡើយ សម្រាប់សហគ្រាសណា ដែលចង់បោះទុននៅអ៊ីរ៉ង់ ក្រោយពីមានចុះបានឯកសារប្រវត្តិសាស្ត្រនេះ កាលក្នុងឆ្នាំ ២០១៥។
ខណៈដែល សហគ្រាសពហុជាតិប្រទេសខាងលិច នាំគ្នាដកសន្លឹកបៀខ្លួនចេញពីល្បែងនៅអ៊ីរ៉ង់ រុស្ស៊ី ជាសម្ព័ន្ធមិត្តក្រុងតេហេរ៉ង់ ដោយទ្រទ្រង់នឹងគ្នាចំណងពាណិជ្ជកម្ម ទាំងពេលដែលទណ្ឌកម្មបស្ចិមលោក ប្រឆាំងអ៊ីរ៉ង់ នៅជាធរមាននៅឡើយ បានឈានមួយជំហានដ៏សំខាន់ ទៅបង្ខិតអ៊ីរ៉ង់ មកនៅជិតនឹង លំហសេដ្ឋកិច្ច ដែលស្ថិតនៅក្រោមឥទ្ធិពលរុស្ស៊ី។
ថ្ងៃព្រហស្បតិ៍ ១៧ ឧសភា នៅក្រុង អាស្តាណា រដ្ឋធានីកាហ្សាក់ស្ថាន អ៊ីរ៉ង់ បានចុះហត្ថលេខាលើ កិច្ច ព្រមព្រៀងបណ្តោះអាសន្ន ជាមួយអង្គការសេដ្ឋកិច្ចនាំមុខ ដោយរុស្ស៊ី គឺ សហភាពសេដ្ឋកិច្ចអឺរ៉ុប-អាស៊ី ដែលផ្សំឡើងពី ៥ អតីតសាធារណរដ្ឋសូវៀត។ កិច្ចព្រមព្រៀងនេះ ជា ដំណាក់ទី១ ឆ្ពោះទៅបង្កើតឡើងជា លំហពាណិជ្ជកម្មសេរីអចិន្ត្រៃយ៍ ដែលប្រមើលលុបចោល ឬបន្ទាបពន្ធគយ នៃទំនិញខ្លះ សម្រាប់រយៈពេល ៣ ឆ្នាំសិន។
កិច្ចព្រមព្រៀងនេះ ដែលត្រូវបានចាប់ផ្តើមតាក់តែងឡើង តាំងពីឆ្នាំ ២០១៦ ម៉្លេះ គឺ មុនបន្តិចពីការដកខ្លួន ចេញនៃសរអា បង្ហាញឲ្យឃើញពីចេតនា របស់រុស្ស៊ី ក៏ដូចជា ចិន ពង្រឹងចំណងពាណិជ្ជកម្មជាមួយក្រុង តេហេរ៉ង់ ទោះបីក្រុងវ៉ាស៊ីនតោន ស្តារឡើងវិញក៏ដោយ ទណ្ឌកម្មសេដ្ឋកិច្ច។
ដោយថ្កោលទោស ការប្រកាសរបស់លោក ដូណាល់ ត្រាំ ដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ រុស្ស៊ី ខិតខំសហការជាមួយសហភាពអឺរ៉ុប ដើម្បីសង្គ្រោះកិច្ចព្រមព្រៀងនេះ ប៉ុន្តែ ក្នុងឋានៈជាសម្ព័ន្ធមិត្តរបស់ ក្រុងតេហេរ៉ង់ យល់ថា បណ្តាសហគ្រាសខ្លួនត្រូវតែមានទីតាំងល្អ ដើម្បីបន្តរកស៊ីជាមួយនឹងអ៊ីរ៉ង់ ចំណែក បណ្តាសហគ្រាសបស្ចិមលោក ដែលជាគូប្រជែងនឹងរុស្ស៊ី នឹងអភ័ព្វជាង សម្រាប់បន្តសកម្មភាពនៅអ៊ីរ៉ង់ ទោះបីគេបានបោះទុនច្រើនទៅហើយក្តីក្នុងប្រទេសនោះ។
រីឯប៉េកាំង ដែលត្រូវការប្រេងឆៅ និង ឧស្ម័នរបស់អ៊ីរ៉ង់ ហើយជាដៃគូពាណិជ្ជកម្មទី១ របស់ក្រុងតេហេរ៉ង់ តាមមើលទៅ ក៏មិនខ្វល់ឡើយនឹងទណ្ឌកម្មអាមេរិកាំង ដោយតាំងគោលដៅធ្វើវិនិយោគក្រាស់ក្រែលតែម្តង ទៅក្នុងប្រទេសអ៊ីរ៉ង់ ទាំងប្រថុយបន្តឹងទំនាក់ទំនាក់ទំនងជាមួយក្រុងវ៉ាស៊ីនតោន ដែលតានតឹងស្រាប់ ទៅហើយក្រោយពីសរអា បានដំឡើងពន្ធគយ លើដែកថែប និង អាលុយមីញុម នាំចូលពីប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ