បារាំង ៖ ប្រធានាធិបតីបង្ហាញផែនការលើកស្ទួយតំបន់ជាយក្រុងក្រីក្រ
លោកប្រធានាធិបតី អេម៉ាណុយអែល ម៉ាក្រុង បានសន្យា មិនស្នើផែនការលើកស្ទួយតំបន់ជាយក្រុង តាមបែបចាស់គំរិលដដែលទេ ! តែលោកបានប្រកាសប្រើវិធីសាស្ត្រថ្មី ខុសពីមុន ដោយឆ្កឹះឱ្យចំបញ្ហានៅតាមសង្កាត់ក្រីក្រ តាមរយៈវិធានការជាក់ស្តែង និងពិតប្រាកដ។ សមាគម តំណាងឃុំសង្កាត់ និងប្រជាពលរដ្ឋ កំពុងរង់ចាំយ៉ាងខ្លាំង អន្តរាគមន៍របស់លោកប្រមុខរដ្ឋ។
ចុះផ្សាយនៅថ្ងៃ៖
ស្តាប់ - ០២:០៧
លោកម៉ាក្រុង បានបង្ហាញយុទ្ធសាស្ត្រនយោបាយស្រោចស្រង់តំបន់ជាយក្រុង នៅចំពោះមុខឥស្សរជន អ្នកមុខអ្នកការជាង៦រយនាក់ នៅថ្ងៃអង្គារទី ២២ឧសភានេះនៅវិមានប្រធានាធិបតី។ ជាយុទ្ធសាស្ត្រប្លែក និងមិនមែនជាគម្រោងផែនការ ដែលជាយុទ្ធសាស្ត្រចាស់គំរិតចំណាស់ស្មើអាយុលោកទេ។ លោកប្រធានាធិបតីចង់ប្រើទស្សនៈវិជ្ជាផ្សេង មានវិធានការជាក់ស្តែង អាចអនុវត្តតាមបានយ៉ាងឆាប់រហ័ស បើកទារកដ្ឋានឱ្យបានច្រើនកន្លែងជាមុន ជួយរកកម្មសិក្សាឱ្យសិស្សនៅថ្នាក់បញ្ចប់អនុវិទ្យាល័យ ពង្រាយបន្ថែមកម្លាំងប៉ូលិស ដែលជាវិធានការប្រកាសឡើងកាលពីប៉ុន្មានខែមុន។
ស្តីអំពីបញ្ហាអសន្តិសុខ នៅក្នុងសង្កាត់ជាយក្រុងប៉ារីស ដែលមានប្រជាជនរស់នៅប្រមាណជិត៥លាននាក់ លោកប្រធានាធិបតីចង់បង្កើត ឱ្យក្លាយជា សង្គមមានការប្រុងប្រយ័ត្ន ដោយមានការពង្រាយបន្ថែមនូវកម្លាំងប៉ូលិសចំនួន ១៣០០នាក់។ លោក ម៉ាក្រុង ក៏បានប្រកាសបង្ហាញទិសដៅការងារធំៗ ដោយបានបរិហារការងារគ្មានលទ្ធផលរបស់ក្រុមតំណាងឃុំសង្កាត់ និងការធ្វើទំនើបកម្មក្រុង ជាមួយនឹងការវិនិយោគទំហំ១ពាន់លានអឺរ៉ូ ក្នុងមួយឆ្នាំៗ។
លោកប្រធានាធិបតីបានស្នើឱ្យក្រុមហ៊ុនសហគ្រាសធំៗជាងគេរបស់បារាំង ចំនួន១២០ ចូលរួមចំណែកប្រយុទ្ធប្រឆាំងនឹងភាពអត់ការងារធ្វើ ដែលមានកំរិតខ្ពស់ខ្លាំងនៅតាមសង្កាត់នៃតំបន់ជាយក្រុងប៉ារីស។ ក្នុងរយៈពេលបីឆ្នាំទៀត ក្រុមហ៊ុនសហគ្រាសទាំងនេះ នឹងត្រូវឆ្លងកាត់វិញ្ញាសាតេស្តប្រឆាំងនឹងពីការរើសអើងក្មេងមកសង្កាត់ក្រីក្រជាយក្រុង។
ក្រុមសកម្មជនពាក់ព័ន្ធនឹងតំបន់ជាយក្រុងទាំងអស់នេះ នឹងត្រូវចាប់ផ្តើមរៀបកម្មវិធីជួបពិភាក្សាគ្នា។ នៅខែកក្កដា នឹងមានការរៀបផែនការប្រយុទ្ធប្រឆាំងនឹងការជួញដូរគ្រឿងញៀន។ គំនិតថ្មីមួយដែលលោកប្រធានាធិបតីបានប្រកាសនៅថ្ងៃនេះ គឺការបង្កើតតុលាការ នៅក្នុងសភា ដើម្បីកុំឱ្យមានការប្រឈមគ្នាពីតំបន់មួយទៅតំបន់មួយ និងដើម្បីវាយតម្លៃអំពីនយោបាយដែលពួកគេប្រកាន់យក។
ប៉ុន្តែវិធានការប្រកាសដោយលោកម៉ាក្រុងថ្ងៃនេះ មានទម្រង់ស្រាល ឆ្ងាយស្រលះពីផែនការ ៤០ពាន់លាន (សម្រាប់អាណត្តិ៥ឆ្នាំ) ដែលស្នើឡើងដោយអតីតរដ្ឋមន្ត្រីទទួលបន្ទុកអភិវឌ្ឍក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ