រដ្ឋអំណាចអ៊ុយក្រែនថា ឃាតកម្មសម្លាប់អ្នកកាសែតរុស្ស៊ីលោកអាកាឌី បាបឆេនកូគ្រាន់ជាឆាកល្ខោន
នៅក្នុងប្រទេសអ៊ុយក្រែន រដ្ឋអំណាចបានប្រកាសបញ្ជាក់នាថ្ងៃពុធ ទី៣០ ឧសភាថា ឃាតកម្មសម្លាប់អ្នកកាសែតរុស្ស៊ីម្នាក់ឈ្មោះអាកាឌី បាបឆេនកូក្នុងរាត្រីថ្ងៃអង្គារ ទី២៩ ឧសភាគ្រាន់ជាឆាកល្ខោនទេ មានន័យថា អ្នកកាសែតរុស្ស៊ីរូបនេះមិនស្លាប់ទេ។ ក្រសួងសន្តិសុខអ៊ុយក្រែនបានអះអាងថា ខ្លួនបានរៀបចំឆាកល្ខោននេះឡើងដើម្បីដឹកនាំប្រតិបត្តិការពិសេសមួយប៉ុណ្ណោះ។ តែរុស្ស៊ីបានបញ្ចេញប្រតិកម្មក្តៅក្រហាយដោយបរិហារលើឆាកល្ខោននេះថាជាឧបាយទុច្ចរិត និងជាការបង្ករឿងប្រឆាំងរុស្ស៊ី។
ចុះផ្សាយនៅថ្ងៃ៖
ស្តាប់ - ០២:២៩
២៤ម៉ោងក្រោយពីប្រកាសថាស្លាប់ដោយត្រូវគេបាញ់ចំកណ្តាលខ្នងចំនួន ៣គ្រាប់មក រូបអ្នកកាសែតរុស្ស៊ីអាកាឌី បាបឆេនកូបានលេចមុខ និងត្រូវបានមិត្តរួមការងារទទួលយ៉ាងរាក់ទាក់ក្នុងក្តីរំភើបក្រៃលែងនៅទីលានមួយក្នុងទីក្រុងកៀវ។ តាមពិតទៅ និងបើយោងតាមក្រសួងសន្តិសុខអ៊ុយក្រែន សេណារីយ៉ូនៃឃាតកម្មសម្លាប់លោកអាកាឌី បាបឆេនកូគ្រាន់តែជាឆាកល្ខោនមួយដើម្បីដឹកនាំប្រតិបត្តិការពិសេសក្នុងគោលដៅព័ទ្ធចាប់ក្រុមឃាតករសង្ស័យ នឹងដើម្បីជាការបញ្ចៀសករណីប៉ុនប៉ងធ្វើឃាតពិតប្រាកដ។
លោកអាកាឌី បាបឆេនកូបានថ្លែងនៅចំពោះហ្វូងអ្នកកាសែតថា រូបលោក និងក្រសួងសន្តិសុខអ៊ុយក្រែនបានរៀបចំឆាកល្ខោនមួយអស់ជាច្រើនសប្តាហ៍មកហើយ និងថា ក្រុមគ្រួសាររបស់លោកក៏បានដឹងរឿងនេះដែរ។ ។ ចំណែកលោកវ៉ាស៊ីល គ្រីសាគ ប្រធានសន្តិសុខអ៊ុយក្រែនបានបញ្ជាក់ថា ប្រតិបត្តិការពិសេសនៃឆាកល្ខោននោះបានឈានដល់ការខ្លួនជនជាតិអ៊ុយក្រែនម្នាក់ដែលក្រសួងសន្តិសុខរុស្ស៊ីបានជ្រើសរើសឲ្យរៀបចំឃាតកម្មសម្លាប់មនុស្សប្រមាណជា ៣០នាក់ ពិសេសពលរដ្ឋរុស្ស៊ីដែលកំពុងជ្រកកោណក្នុងទឹកដីអ៊ុយក្រែន។ តែលោកគ្រីសាគមិនបានផ្តល់ព័ត៌មានលំអិតលើប្រតិបត្តិការពិសេស ឬអត្តសញ្ញាណរបស់ជនជាតិអ៊ុយក្រែនចាប់ខ្លួនរូបនោះទេ។
យ៉ាងណាក៏ដោយ ឆាកល្ខោនមួយនេះបានធ្វើឲ្យរុស្ស៊ីក្តៅស្លឹកត្រចៀកងំដោយចាត់ទុកជាឧបាយកលទុច្ចរិត និងជាការបង្ករឿងប្រឆាំងរុស្ស៊ី។ សហភាពអឺរ៉ុបដែលហាក់បានធូរស្រាលចិត្តវិញកំពុងរង់ចាំការពន្យល់បកស្រាយពីរដ្ឋអំណាចអ៊ុយក្រែនចំពោះឆាកល្ខោនមួយនេះ។ រីឯអ្នកតំណាងឲ្យអ្នកកាសែតរបស់អង្គការដើម្បីសន្តិសុខ និងកិច្ចសហប្រតិបត្តិការអឺរ៉ុបបានសម្តែងការសោកស្តាយក្នុងការយកជីវិតអ្នកកាសែតម្នាក់ទៅលេងសើច។ ចំណែកអង្គការអ្នកយកព័ត៌មានគ្មានព្រំដែនបានបរិហារត្រង់ៗលើសេណារីយ៉ូដែលខ្លួនយល់ថា ជាការបើកផ្លូវឲ្យមានសង្រ្គាមព័ត៌មានរវាងក្រុងកៀវ និងក្រុមមូស្គូ។
គួររម្លឹកជូនថា អ្នកកាសែតរុស្ស៊ីលោកអាកាឌី បាបឆេនកូបានចាកចេញពីប្រទេសរុស្ស៊ីក្នុងខែកុម្ភៈ ឆ្នាំ ២០១៧ ទៅជ្រកកោណក្នុងប្រទេសឆែក និងអ៊ីស្រាអែល មុននឹងទៅជ្រកកោណក្នុងប្រទេសអ៊ុយក្រែនដែលធ្វើការងារជាអ្នកពីធីករទូរទស្សន៍។ លោកអាកាឌី បាបឆេនកូធ្លាប់បាននិយាយថា លោកបានទទួលការគំរាមកំហែងដល់ជីវិត បន្ទាប់ពីបានរិះគន់រដ្ឋអំណាចរុស្ស៊ីក្នុងជម្លោះនៅប៉ែកខាងកើតអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ