លីទុយអានីនិងរូម៉ានី រងការថ្កោលទោសពីបទមានពន្ធនាគារសម្ងាត់
តុលាការសិទ្ធិមនុស្សអឺរ៉ុបបានសម្រេចកាត់ទោសប្រទេសលីទុយអានី និងរូម៉ានី នៅថ្ងៃព្រហស្បតិ៍ទី ៣១ឧសភានេះ ពីបទបានចូលរួមបង្កើតពន្ធនាគារសម្ងាត់ជាមួយភ្នាក់ងារចារកិច្ចអាមេរិកសេអ៊ីអា CIA។ សម្រាប់តុលាការអឺរ៉ុប ប្រទេសទាំងពីរបានរំលោភសិទ្ធិមនុស្សជាច្រើនករណី និងត្រូវផ្តល់សំណងជំងឺចិត្តជាទឹកប្រាក់១០ម៉ឺនអឺរ៉ូទៅឱ្យអ្នកទោស ដែលរងការបំពាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
តុលាការអឺរ៉ុប បានផ្តើមត្រួតពិនិត្យអង្កេតជាសាធារណៈ កាលពីឆ្នាំ២០១៦ ក្រោយពីអ្នកទោសនៅពន្ធនាគារហ្គ័នតាណាមូ ពីរនាក់ ម្នាក់ប្រឆាំងនឹងលីទុយអានី ម្នាក់ប្រឆាំងនឹងរូម៉ានី បានអះអាងថាប្រទេសទាំងពីរបានស៊ុំគ្រលំជាមួយភ្នាក់ងារចារកិច្ចអាមេរិក CIA លួចបើកពន្ធនាគារសម្ងាត់នៅចន្លោះពីឆ្នាំ២០០៤-២០០៦។
នៅថ្ងៃនេះ តុលាការបានចេញសេចក្តីសម្រេចពីរដាច់ដោយឡែកពីគ្នា ថ្កោលទោសអាជ្ញាធរលីទុយអានី និងរូម៉ានី ក្នុងន័យតែមួយថា ការផ្សំគំនិតជាមួយភ្នាក់ងារចារកិច្ចអាមេរិកលួចមានគុកសម្ងាត់ គឺជាការរំលោភសិទ្ធិមនុស្ស ! បទរំលោភសិទ្ធិមនុស្សរបស់លីទុយអានី និងរូម៉ានី មានច្រើនករណី ដូចជា បំពានបម្រាមហាមធ្វើទារុណកម្ម រំលោភសិទ្ធិមានសេរីភាព មានសុវត្ថិភាព មានជីវិតឯកជន របស់អ្នកទោស។ល។
លីទុយអានី និងរូម៉ានី មិនទទួលស្គាល់ថាមានពន្ធនាគារសម្ងាត់បែបនេះទេ ប៉ុន្តែតុលាការអឺរ៉ុបមានភស្តុតាងមកពីប្រភពផ្សេងៗជាច្រើន មានជាអាទិ៍របាយការណ៍របស់គណៈកម្មការអង្កេតព្រឹទ្ធសភាអាមេរិក ស្តីពីរបៀបធ្វើទារុណកម្មអ្នកទោសរបស់ភ្នាក់ងារចារកិច្ចអាមេរិក។ របាយការណ៍នោះ បានផ្សព្វផ្សាយជាសាធារណៈកាលពីខែធ្នូ២០១៤។ រ៉ូមានីលួចមានគុកសម្ងាត់បម្រើឱ្យCIA ក្រោមលេខកូដ « site Black » នៅរវាងពីខែកញ្ញា ទៅខែវិច្ឆិកាឆ្នាំ២០០៥ និងពីខែកុម្ភៈ២០០៥ដល់ខែមីនា២០០៦ សម្រាប់លីទុយអានី។ នេះបើតាមសេចក្តីចោទប្រកាន់របស់តុលាការអឺរ៉ុប ដែលតម្រូវឱ្យអាជ្ញាធរទាំងពីរ សងជំងឺចិត្តដល់អ្នកទោសទាំងពីរនោះ ម្នាក់ៗ ១០ម៉ឺនអឺរ៉ូ។
តើអ្នកទោសទាំងពីនោះជានរណា ? ជាជនជាតិអារ៉ាប៊ីសាអូឌីត អាល់ ណាហ្ស៊ីរី Abd Al-Rahim Al-Nachiri ដែលអាមេរិកសង្ស័យថាបានបង្កភេរវកម្មប្រឆាំងនឹងនាវាអាមេរិកនៅកំពង់ផែយេមែន កាលពីឆ្នាំ២០០០។ ជននេះបានអះអាងបានជាប់ឃុំដោយសម្ងាត់នៅរូម៉ានីពីខែមេសា២០០៤ដល់កញ្ញា២០០៦ និងរងការធ្វើបាបយ៉ាងខ្លាំង។ ចំណែកអ្នកទោសទីពីរ ជាជនជាតិប៉ាឡេស្ទីន គ្មានប្រទេស។ អាប៊ូ ហ្ស៊ូបៃដាAbou Zoubaida ដែលវ៉ាស៊ីនតោនចាត់ទុកជាសមាជិកសំខាន់ម្នាក់របស់បណ្តាញអាល់កៃដា បានអះអាងថាធ្លាប់ជាប់ពន្ធនាគារសម្ងាត់នៅលីទុយអានីរយៈពេលជាងមួយឆ្នាំ។
រដ្ឋាភិបាលប្រទេសទាំងពីរមានពេលបីខែ សម្រាប់ធ្វើឧទ្ធរណ៍។ លីទុយអានីបានបញ្ចេញប្រតិកម្មភាពនៅថ្ងៃនេះ ប្រឆាំងនឹងសេចក្តីសម្រេចកម្រាស៣០០ទំព័ររបស់តុលាការអឺរ៉ុប និងត្រៀមធ្វើឧទ្ធរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ