នៅអេស្ប៉ាញ សភាបានបោះឆ្នោតទម្លាក់លោកម៉ារីយ៉ាណូ រ៉ាហយពីប្រមុខរដ្ឋាភិបាល
នៅក្នុងប្រទេសអេស្ប៉ាញ ទំព័រសករាជនយោបាយបានបើកថ្មីជាមួយនឹងការបោះឆ្នោតដកសេចក្តីទុកចិត្តពីលោកនាយករដ្ឋមន្រ្តីម៉ារីយ៉ាណូ រ៉ាហយពីសំណាក់ក្រុមអ្នកតំណាងរាស្រ្តនាថ្ងៃសុក្រ ទី១ មិថុនា។ ទន្ទឹមនឹងការបោះឆ្នោតទម្លាក់លោកម៉ារីយ៉ាណូ រ៉ាហយដែលជាប់ជំពាក់វាក់វិនក្នុងរឿងអាស្រូវពុករលួយ សភាក៏បានបោះឆ្នោតផ្តល់សេចក្តីទុកចិត្តដល់លោកប៉េដ្រូ សង់ឆេរឲ្យឡើងជំនួសកន្លែងលោកម៉ារីយ៉ាណូ រ៉ាហយដែរ។
ចុះផ្សាយនៅថ្ងៃ៖
ស្តាប់ - ០២:០១
ចាប់ពីពេលនេះទៅ លោកប៉េដ្រូ សង់ឆេរដែលជាប្រធានគណបក្សសង្គមនិយមបានក្លាយជានាយករដ្ឋមន្រ្តីថ្មីនៃប្រទេសអេស្ប៉ាញ ក្រោយពីសភាបានបោះឆ្នោតទម្លាក់លោកម៉ារីយ៉ាណូ រ៉ាហយពីតំណែងជាមួយនឹង១៨០សម្លេងគាំទ្រ ទល់១៦០សម្លេងប្រឆាំង និង១សម្លេងអនុប្បវាទ។ គួររម្លឹកជូនថា ញត្តិទម្លាក់លោករ៉ាហយត្រូវបានគណបក្សសង្គមនិយមរបស់លោកប៉េដ្រូ សង់ឆេរបញ្ជូនទៅកាន់សភាកាលពីថ្ងៃសុក្រ ទី២៥ ឧសភា ពោលមួយថ្ងៃក្រោយពីការប្រកាសកាត់ទោសគណបក្សប្រជាមានិតរបស់លោករ៉ាហយក្នុងរឿងអាស្រូវពុករលួយដ៏ធំមួយដែលគេឲ្យឈ្មោះថា « Gürtel »។
នៅមុនការបោះឆ្នោតពីក្រុមអ្នកតំណាងរាស្រ្តបន្តិច លោកម៉ារីយ៉ាណូ រ៉ាហយបានទទួលស្គាល់ពីភាពបរាជ័យរបស់លោក។ « យើងអាចសន្មត់បានថា ញត្តិដកសេចក្តីទុកចិត្តនឹងត្រូវអនុម័ត ហើយលោកប៉េដ្រូ សង់ឆេរនឹងក្លាយជាប្រមុខរដ្ឋាភិបាលថ្មី » នេះជាការថ្លែងរបស់លោករ៉ាហយក្នុងរយៈពេលខ្លីក្រោមសម្លេងទះដៃរបស់ក្រុមសកម្មជនអ្នកគាំទ្រលោក។ ទន្ទឹមគ្នានេះ លោករ៉ាហយមិនភ្លេចសាទរលោកប៉េដ្រូ សង់ឆេរ ហើយក៏មិនភ្លេចគូសបញ្ជាក់ពីកិត្តិយសខ្លួនឯងដែលបានដឹកនាំប្រទេសទេ។
សូមជម្រាបជូនថា តាំងពីការវិលត្រឡប់នៃរបបប្រជាធិបតេយ្យនៅអេស្ប៉ាញមក លោករ៉ាហយជាប្រមុខរដ្ឋាភិបាលទី១ ដែលត្រូវបានសភាបោះឆ្នោតដកសេចក្តីទុកចិត្ត។ កាន់តំណែងតាំងពីឆ្នាំ ២០១១ លោករ៉ាហយបានឆ្លងកាត់វិបត្តិសំខាន់ៗជាច្រើន ពិសេសវិបត្តិសេដ្ឋកិច្ចដើរថយក្រោយដែលលោកបានស្រោចស្រង់រួចជាមួយនឹងនយោបាយសន្សំសំចៃ ហើយចុងក្រោយ គឺវិបត្តិនៃការប៉ុនប៉ងផ្តាច់ខ្លួនរបស់តំបន់ស្វយ័តកាតាឡូញ៉ា។
ពេលនេះនៅអេស្ប៉ាញ ទំព័រសករាជរបស់លោកម៉ារីយ៉ាណូ រ៉ាហយបានបិទបញ្ចប់ជាមួយនឹងការបើកទំព័រសករាជថ្មីរបស់លោកប៉េដ្រូ សង់ឆេរ។ « ថ្ងៃនេះ យើងបានសរសេរទំព័រថ្មីនៃប្រវត្តិសាស្រ្តលទ្ធិប្រជាធិបតេយ្យនៅក្នុងប្រទេសរបស់យើង » នេះជាការថ្លែងរបស់លោកសង់ឆេរដែលជាអតីតគ្រូបង្រៀនសេដ្ឋកិច្ច និងត្រូវបានគេដាក់ងារថាជាបុរសសង្ហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ