សម្តេចប៉ាបអំពាវនាវឲ្យក្រុមហ៊ុនផលិតប្រេង និងឧស្ម័នគោរពកិច្ចព្រមព្រៀងក្រុងប៉ារីសស្តីពីអាកាសធាតុ
នៅបុរីវ៉ាទីកង់ក្នុងប្រទេសអ៊ីតាលី ប្រមុខសង្ឃកាតូលិលសម្តេចប៉ាបហ្រ្វង់ស័របានរួមប្រជុំក្រុមហ៊ុនផលិតប្រេង និងឧស្ម័នគ្រាក់ៗក្នុងលោកដូចយ៉ាងក្រុមហ៊ុន BP Total ឬ Shell ជាដើម។ នាឱកាសនោះ សម្តេចប៉ាបហ្រ្វង់ស័របានអំពាវនាវឲ្យមានការគោរពកិច្ចព្រមព្រៀងក្រុងប៉ារីសស្តីពីអាកាសធាតុ និងស្នើឲ្យមានការផ្លាស់ប្តូរឆ្ពោះទៅរកថាមពលស្អាត។ ទន្ទឹមគ្នានេះ ប្រមុខសង្ឃកាតូលិកក៏បានជំរុញឲ្យមានការស្វែងរកគ្រប់ដំណោះស្រាយប្រឆាំងនឹងផ្សែងពុលនៅក្នុងបរិយាកាស រួមទាំងការបំបាត់ភាពក្រីក្រ និងលើកស្ទួយយុត្តិធម៌សង្គម។
ចុះផ្សាយនៅថ្ងៃ៖
ស្តាប់ - ០១:៤៤
« អរិយធម៌តម្រូវឲ្យមានថាមពលជាចាំបាច់ តែមិនត្រូវឲ្យការប្រើប្រាស់ថាមពលចូលទៅបំផ្លាញអរិយធម៌ទេ » នេះជាការថ្លែងរបស់ប្រមុខសង្ឃកាតូលិកសម្តេចប៉ាបហ្រ្វង់ស័រនៅចំពោះមុខក្រុមអ្នកតំណាងឲ្យក្រុមហ៊ុនផលិតប្រេង និងឧស្ម័នគ្រាក់ៗក្នុងលោក។ ដោយយល់ពីបញ្ហាប្រឈមកើតចេញពីការផ្លាស់ប្តូរអាកាសធាតុ សម្តេចប៉ាបបានអំពាវនាវឲ្យស្វែងរកគ្រប់មធ្យោបាយដែលអនុញ្ញាតឲ្យមានការប្រឆាំងនឹងផ្សែងពុល កាត់បន្ថយភាពក្រីក្រ និងលើកដំកើងយុត្តិធម៌សង្គម។ តែដើម្បីអាចកំចាត់ភាពក្រីក្រ និងភាពអត់ឃា្លន សម្តេចប៉ាបហ្រ្វង់ស័របានទាមទារឲ្យមានការផ្តល់ភ្លើងអគ្គិសនីដល់ប្រជាជនជាង ១ ០០០លាននាក់ក្នុងលោកដែលកំពុងខ្វះថាមពលមួយនេះប្រើប្រាស់។
ថាមពលដែលប្រមុខសង្ឃកាតូលិកចង់ផ្តោតសំខាន់ គឺថាមពលស្អាតដែលកើតចេញពីការកាត់បន្ថយលើការប្រើធ្យូងថ្ម និងប្រេងកាត។ សម្តេចប៉ាបបានបញ្ជាក់ថា ឆន្ទៈនៃការផ្តល់ថាមពលដល់មនុស្សគ្រប់រូបក្នុងលោកមិនត្រូវបង្កឲ្យផលវិបាកនៃការឡើងកំដៅនៅក្នុងបរិយាកាសឡើយ។ ក្រៅពីអំពាវនាវដល់គ្រប់ក្រុមហ៊ុនផលិតប្រេង និងឧស្ម័នគ្រាក់ៗក្នុងលោកឲ្យគិតគូរផលិតថាមពលស្អាត សម្តេចប៉ាបហ្រ្វង់ស័រក៏បានអំពាវនាវឲ្យចូលរួមគោរពត្រឹមត្រូវលើកិច្ចព្រមព្រៀងក្រុងប៉ារីសឆ្នាំ ២០១៥ ស្តីពីបញ្ហាអាកាសធាតុដែរ។
គឺជាកិច្ចព្រមព្រៀងដែលក្រុមប្រទេសហត្ថលេខីទាំង ១៩៦ប្រទេសបានយល់ព្រមចូលរួមទប់កម្រិតសីតុណ្ហភាពក្នុងបរិយាកាសមិនឲ្យលើសពី ២អង្សារសេពីពេលនេះដល់ដំណាច់សតវត្សទី២១ ធៀបនឹងកម្រិតមុនសម័យឧស្សាហកម្ម។ សម្តេចប៉ាបបានសម្គាល់ឃើញថា ជាង ២ឆ្នាំក្រោយកិច្ចព្រមព្រៀងក្រុងប៉ារីស ឧស្ម័នផ្ទះកញ្ចាក់នៅតែមានកម្រិតខ្ពស់ខ្លាំង។ ប្រមុខសង្ឃកាតូលិកបានរម្លឹកជាថ្មីថា អ្នកដែលបានរងគ្រោះខ្លាំងជាងគេពីការឡើងកំដៅក្នុងបរិយាកាស គឺប្រជាជនក្រីក្រ ពិសេសផលវិបាកក្នុងវិស័យកសិកម្ម និងកង្វះទឹកប្រើប្រាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ