G៧ ៖ លោក ត្រាំ ទាមទារហៅរុស្ស៊ីឱ្យមកចូលក្រុមវិញ
ចុះផ្សាយនៅថ្ងៃ៖
ស្តាប់ - ០៦:៥៦
ជំនួបកំពូលក្រុមប្រទេសមហាអំណាចពិភពលោកទាំង៧ដំបូង ឬហៅកាត់ថា G៧ ត្រូវបិទបញ្ចប់នៅថ្ងៃសៅរ៍នេះ ក្នុងបរិបទនៃកិច្ចខិតខំប្រឹងប្រែងយ៉ាងខ្លាំង ដើម្បីស្តាររូបភាពជាមហាអំណាចផង និងដើម្បីកាត់បន្ថយភាពប្រេះឆា បង្កឡើងដោយនយោបាយអាត្មានិយមរបស់លោកដូណាល់ត្រាំ។ បើតាមប្រភពព័ត៌មានបារាំង អាមេរិកនិងអឺរ៉ុបបានស្រុះស្រួលគ្នាបន្តិចលើបញ្ហាសង្គ្រាមពាណិជ្ជកម្ម ប៉ុន្តែអឺរ៉ុបបានរួមគ្នាជាសំឡេងតែមួយប្រឆាំងនឹងសំណើរបស់អាមេរិកដែលចង់ហៅរុស្ស៊ីឱ្យមកចូលក្រុមមហាអំណាចវិញ។
ជំនួបកំពូលក្រុមប្រទេសមហាអំណាចពិភពលោកទាំង៧ដំបូង ឬហៅកាត់ថា G៧ កំពុងជួបប្រជុំគ្នានៅប្រទេសកាណាដា ហើយនឹងត្រូវបិទបញ្ចប់នៅថ្ងៃសៅរ៍នេះ។ សង្គ្រាមពាណិជ្ជកម្មប្រកាសដោយលោក ដូណាល់ ត្រាំ ប្រឆាំងនឹងបណ្តាប្រទេសនៅលើពិភពលោក វិបត្តិនុយក្លេអ៊ែរអ៊ីរ៉ង់ ស្ថានភាពនៅលីប៊ីឬស៊ីរី ព្រមទាំងបញ្ហាអាកាសធាតុ ជាសំណុំរឿងសំខាន់មានចែងក្នុងរបៀបវារៈនៃជំនួបកំពូលឆ្នាំ២០១៨។
រុស្ស៊ីត្រលប់ចូលក្រុមមហាអំណាចវិញ ?
ប៉ុន្តែនៅពេលចូលប្រជុំ ស្រាប់តែលោកដូណាល់ត្រាំ ដែលមកយឺតយ៉ាវជាងគេដល់ទៅមួយម៉ោង បានញាត់បញ្ចូលសំណើថ្មីមួយដែលគ្មានក្នុងរបៀបវារៈសោះ នោះការហៅរុស្ស៊ីឱ្យចូលក្នុងក្រុមមហាអំណាចហ្សេ៧វិញ ឱ្យឡើងទៅជា៨ប្រទេស ដូចមុន (G៨)។ ការទុករុស្ស៊ីដោយឡែកបែបនេះ គឺមិនខុសអ្វីពីការអនុវត្តនយោបាយការពារប្រយោជន៍អាត្មានិយមទេ។ នេះការចោទប្រកាន់របស់លោកត្រាំឡងមកឱ្យអឺរ៉ុបនិងកាណាដា។ សម្រាប់លោកដូណាល់ ត្រាំ រុស្ស៊ី ត្រូវតែមានចំណែកនៅក្នុងចរចា ព្រោះគេមិនអាចឱ្យម៉ូស្គូធ្វើមិនដឹងមិនឮ នឹងសំណុំរឿងអន្តរជាតិធំៗបានឡើយ។
សូមបញ្ជាក់ថា រុស្ស៊ីធ្លាប់ត្រូវបានរាប់បញ្ចូលជាក្នុងក្រុមប្រទេសមហាអំណាចធំៗ ៨ដំបូងនៅលើពិភពលោក ឬហៅកាត់ក្រុមG8 ចំនួន១៦ឆ្នាំ មុននឹងក្រុមមហាអំណាចG៧ បណ្តេញចេញក្រុម កាលពីឆ្នាំ២០១៤ ក្រោយពីរុស្ស៊ីបានទៅក្រសោបយកទឹកដីគ្រីមេ។
សំណើរបស់លោកត្រាំនេះ បានធ្វើឱ្យក្រុមមហាអំណាចផ្សេងទៀត ហាក់ដូចជាប្រេះញែកគំនិតគ្នាបន្តិច នៅពេលដំបូងភ្លាម។ ខាងកាណាដា បានច្រានចោលភ្លាម តែនាយករដ្ឋមន្ត្រីថ្មីអ៊ីតាលី លោក Giuseppe Conte ដែលទើបចូលប្រជុំខ្នាតអន្តរជាតិលើកទីមួយ គាំទ្រ។ ប៉ុន្តែ ក្រោយពីមានជំនួបដាច់ឡែក ដើម្បីបញ្ចេញសំឡេងជាធ្លុងមួយ ក្រុមមហាអំណាចអឺរ៉ុប (បារាំង អង់គ្លេស អាល្លឺម៉ង់ រួមទាំងអ៊ីតាលីផង) បានព្រមព្រៀងក្នុងជំហររួមតែមួយ ប្រឆាំងនឹងការវិលត្រលប់របស់រុស្ស៊ីមកចូលក្នុងក្រុម តែព្រមបើកកិច្ចចរចាជាមួយលោក វ្លាដេមៀ ពូទីន។
លោកដូណាល់ ត្រាំ ចង់បង្វែរពេលវេលាដើម្បីបញ្ចៀសភាពប្រឈមនឹងប្រធានបទក្តៅៗ? ប៉ុន្តែគាត់មិនអាចបង្វៀងបានយូរទេ ! មានតែបញ្ហាអាកាសធាតុមួយប៉ុណ្ណោះ ដែលលោកដូណាល់ ត្រាំ អវត្តមាន ដោយត្រូវចាកចេញពីតុប្រជុំមុនគេ នៅថ្ងៃត្រង់នេះ ដើម្បីធ្វើដំណើរទៅកាន់ប្រទេសសិង្ហបុរី។ ទីដែលនឹងមានជំនួបដ៏សំខាន់ និងជាប្រវត្តិសាស្ត្រផង រវាងប្រធានាធិបតីអាមេរិកនិងប្រមុខដឹកនាំកូរ៉េខាងជើង នៅថ្ងៃទី ១២មិថុនា។ ត្រង់ចំណុចក្រុមហ្សេ៧ បានអបអរនិងលើកចិត្តលោកដូណាល់ ត្រាំ ចំពោះកិច្ចខំប្រឹងប្រែងស្វែងរកស្ថិរភាពឱ្យឧបទ្វីបកូរ៉េ។
ព្រមព្រៀងចរចាពាណិជ្ជកម្ម
ទាក់ទងនឹងបញ្ហាសង្គ្រាមពាណិជ្ជកម្ម ដៃគូរកស៊ីជាមួយអាមេរិក ដែលបាននាំគ្នាច្រឡោតខឹងខ្លាំង ក្រោយពីលោកដូណាល់ ត្រាំ បានសម្រេចអនុវត្តយកពន្ធបន្ថែមលើការនាំចូលដែកថែបនិងអាលុយមីញ៉ូម មកពីកាណាដា អឺរ៉ុប និងម៉ិចស៊ិក កាលពីសប្តាហ៍មុនមក ក្រុមសមាជិកG៧ រួមទាំងសហរដ្ឋអាមេរិកផ្ទាល់ បានព្រមព្រៀងគ្នាជាគោលការណ៍ បង្កើតឱ្យមានទម្រង់ជាការចរចា ដែលចាប់រៀបចំធ្វើឡើង នៅពីរសប្តាហ៍ទៀតខាងមុខ។ ការចរចានេះ មានទម្រង់ជាការចរចាបច្ចេកទេស និងនយោបាយ។
ប៉ុន្តែគេមិនដឹងថាតើជប៉ុនដែលមិនសូវបញ្ចេញប្រតិកម្មខ្លាំងតបអាមេរិក ព្រោះខ្លាចឯកាក្នុងសំណុំរឿងនុយក្លេអ៊ែរកូរ៉េខាងជើង ហ៊ានប៉ុណ្ណាទេ ?! ចំណែកអាល្លឺម៉ង់ក៏ប្រយ័ត្នខ្លាំង ព្រោះខ្លាចប៉ះពាល់ដល់ឧស្សាហកម្មរថយន្តដែលជាពាណិជ្ជកម្មមានប្រយោជន៍ធំ។ បើតាមប្រភពព័ត៌មានបារាំង លោកស្រីនាយករដ្ឋមន្ត្រីអាល្លឺម៉ង់ បានស្នើទៅលោកដូណាល់ត្រាំ ឱ្យបង្កើតក្របខណ្ឌត្រួតពិនិត្យពាណិជ្ជកម្មផ្សេងៗរវាងសហរដ្ឋអាមេរិកនិងសហភាពអឺរ៉ុប ដើម្បីឱ្យក្រុមការងារនេះជាអ្នកត្រួតពិនិត្យឡើងវិញ មុននឹងសម្រេចអនុវត្តដំឡើងពន្ធលើដែកថែបនិងអាលុយមីញ៉ូម។ លោកប្រធានគណៈកម្មការអឺរ៉ុប ហ្សង់ក្លូត ចាំងគ័រ បានស្នើសុំខ្លួនធ្វើដំណើរទៅវ៉ាស៊ីនតោន ដើម្បីជួយរកដំណោះស្រាយអឺរ៉ុបនិងអាមេរិក។
ទាំងនេះ សុទ្ធសឹងជាសំណើដែលហ្សេ៧បានយល់ព្រមគ្នា លើកទៅចរចា មិនមែនជាសេចក្តីសម្រេច ឬដំណោះស្រាយនៃវិបត្តិសង្គ្រាមពាណិជ្ជកម្មរកឃើញ ក្នុងជំនួបថ្ងៃនេះឡើយ។ និយាយបែបផ្សេង សង្គ្រាមពាណិជ្ជកម្មមិនអាចដោះស្រាយចេញនៅក្នុងជំនួបនេះបានឡើយ។ G៧ មិនសង្ឃឹមថានឹងអាចចេញជាសេចក្តីថ្លែងការណ៍រួមទេ តែក្រុមសម្ព័ន្ធមិត្តដែលធ្លាប់សហការគ្នាតាំងពីជាង៤២ឆ្នាំ ចង់គេចឱ្យបាននូវអ្វីដែលហៅភាពភាពប្រេះឆាគ្នា ដោយផ្តល់អាទិភាពដល់ការសម្រុះសម្រួល តាមរយៈការសេចក្តីថ្លែងការណ៍សម្របសម្រួល។ សម្មតិកម្មមួយយល់ថា G៧អាចសេចក្តីថ្លែងការបង្ហើយ ចុះហត្ថលេខាដោយភាគីកាណាដាដែលជាប្រធានផ្លាស់វេនG៧តែម្នាក់ឯង រួចបញ្ជាក់អំពីចំណុចខ្វែងគ្នា។ សម្រាប់អ្នកការទូតនេះជាលទ្ធផលប្លែកខុសពីសព្វដង តែមតិសាធារណៈមើលឃើញពីភាពខុសគ្នានេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ