អេស្ប៉ាញ៖ បារាំងយល់ព្រមទទួលជនអន្តោប្រវេសន៍ ពីទូកដែលអ៊ីតាលីមិនស្វាគម
បន្ទាប់ពីត្រូវអ៊ីតាលីបដិសេធមិនឲ្យចូលចតនៅ កំពង់ផែ អ៊ីតាលី ទូកដឹក ជនអន្តោប្រវេសន៍Aquarius របស់អង្គការជួយសង្រ្គោះមេឌីទែរ៉ាណេ និងគ្រូពេទ្យគ្មានព្រំដែន ត្រូវបានអនុញ្ញាតឲ្យចូលចតនៅកំពង់ផែរបស់ប្រទេសអេស្ប៉ាញ។ រដ្ឋាភិបាលអេស្ប៉ាញ បានប្រកាសនៅថ្ងៃសៅរ៍ម្សិលមិញថា បារាំងយល់ព្រមទទួលជនអន្តោប្រវេសន៍ ដែលគេស្រង់ពីទឹកក្បែរប្រទេសលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
នាវាមនុស្សធម៌ Aquarius របស់អង្គការជួយសង្រ្គោះជនអន្តោប្រវេសន៍ នៅសមុទ្រមេឌីទែរ៉ាណេ ត្រូវចូលចតនៅកំពង់ផែValence ភាគខាងកើតអេស្ប៉ាញ នៅថ្ងៃអាទិត្យ។ Aquarius និងកប៉ាល់ពីរផ្សេងទៀត ដែលដឹកជនអន្តោប្រវេសន៍ ប្រមាណ ៦២៩នាក់ នៅរេរា អស់ប៉ុន្មានថ្ងៃ នៅសមុទ្រមេឌីទែរ៉ាណេ បន្ទាប់ពីអាជ្ញាធរអ៊ីតាលី បដិសេធមិនឲ្យចូលចត ដាក់ជនអន្តោប្រវេសន៍ នៅកំពង់ផែអ៊ីតាលី។
នៅក្នុងសេចក្តីថ្លែងការណ៍នៅថ្ងៃសៅរ៍ រដ្ឋាភិបាលអេស្ប៉ាញបានបញ្ជាក់ថា អេស្ប៉ាញ បានទទួលតាមសំណើរបស់ទីក្រុងប៉ារីស ដែលបានយល់ព្រមទទួលជនអន្តោប្រវេសន៍ របស់កប៉ាល់មនុស្សធម៌ Aquarius។ នៅក្រោយឆ្លងកាត់ដំណាក់កាលទទួលសព្វគ្រប់ នៅអេស្ប៉ាញ ជនអន្តោប្រវេសន៍អាចធ្វើដំណើរទៅប្រទេសបារាំង បើសិនពួកគេចង់។
នៅថ្ងៃព្រហស្បតិ៍ នៅក្រោយរិះគន់អ៊ីតាលី ដែលបដិសេធមិនទទួលកប៉ាល់ដឹកជនអន្តោប្រវេសន៍ ដែលមាន២៣ជាតិសាសន៍ រដ្ឋាភិបាលបារាំងបានប្រកាសថា បារាំងយល់ព្រមទទួលជនអន្តោប្រវេសន៍ ណាដែលអាចឆ្លើយតបនឹងលក្ខខណ្ឌ សុំសិទ្ធិជ្រកកោន របស់បារាំង។
ប្រមុខរដ្ឋាភិបាលថ្មីរបស់អេស្ប៉ាញ បានថ្លែងអំណរគុណដល់សណ្តានចិត្តរបស់ប្រធានាធិបតីបារាំង ដែលបានយល់ព្រមទទួលជនភៀសខ្លួនពីកប៉ាល់ Aquarius។ សម្រាប់ក្រុងម៉ាឌ្រីដ ការសហការរបស់បារាំង ជាកាយវិការដែលប្រទេសនៅអឺរ៉ុប ផ្សេងទៀតគួរតែធ្វើ ដើម្បី ឆ្លើយតបនឹងវិបត្តិជនអន្តោប្រវេសន៍។
អ៊ីតាលី សមាជិកមួយរបស់អឺរ៉ុបដែលប្រឈមទទួលជនអន្តោប្រវេសន៍ខ្លាំងជាងគេ (ទទួលជនអន្តោប្រវេសន៍ ៦ សែននាក់ តាំងពីឆ្នាំ ២០១៣) បានរងការរិះគន់ ពីបារាំង និងអង្គការការពារសិទ្ធិមនុស្ស នៅក្រោយដែលរដ្ឋាភិបាលក្រុងរ៉ូម បដិសេធមិនឲ្យកប៉ាល់ Aquarius ដែលបានស្រង់ជនអន្តោប្រវេសន៍ នៅសមុទ្រលីប៊ី ឲ្យចូលចតកំពង់ផែអ៊ីតាលី។ បន្ទាប់ពី Aquarius កប៉ាល់ដឹកជនអន្តោប្រវេសន៍ពីរផ្សេងទៀត ដែលមានទង់ជាតិប្រទេសហូឡង់ ត្រូវបានឆ្មាំសមុទ្រអ៊ីតាលី ស្រែកប្រកាសមិនឲ្យចូលចតកំពង់ផែអ៊ីតាលី។
សម្រាប់រដ្ឋមន្រ្តីមហាផ្ទៃអ៊ីតាលី អំណើះតទៅ អ៊ីតាលី អនុញ្ញាតឲ្យចូលចត តែកប៉ាល់អ៊ីតាលី ដែលចេញ ទៅជួយសង្រ្គោះ ជនអន្តោប្រវេសន៍ នៅក្នុងសមុទ្រតែប៉ុណ្ណោះ។ ក្នុងរឿងកប៉ាល់ដឹកជនអន្តោប្រវេសន៍ អាជ្ញាធរអ៊ីតាលីបានហាមឃាត់ មិនឲ្យកប៉ាល់បរទេស ចូលចតកំពង់ផែអ៊ីតាលី ក្នុងហេតុផលថា អ៊ីតាលីមិនចង់ចូលរួម នៅក្នុងគំនិតសុំគ្រលំរបស់ក្រុមជួញដូរមនុស្សខុសច្បាប់។ សម្រាប់ក្រុងរ៉ូម កប៉ាល់របស់អង្គការមួយចំនួនត្រូវបានក្រុមទុច្ចរិត លួចបន្លំ ប្រើដើម្បី ជួញដូរមនុស្សខុសច្បាប់ មកទឹកដីអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ