បារាំង៖ព្រឹទ្ធសភាកំពុងសិក្សាពិនិត្យលើសេចក្តីព្រាងច្បាប់ស្តីពីសិទ្ធិជ្រកកោន និងអន្តោប្រវេសន៍
នៅថ្ងៃអង្គារ ទី១៩ មិថុនា ព្រឹទ្ធសភាបារាំងបានផ្តើមពិនិត្យសិក្សាលើសេចក្តីព្រាងច្បាប់ស្តីពីសិទ្ធិជ្រកកោន និងអន្តោប្រវេសន៍។ សេចក្តីព្រាងច្បាប់មួយនេះត្រូវបានសភាអនុម័តលើកទី១ នាដំណាច់ខែមេសា។ អ្វីដែលរដ្ឋាភិបាលចង់បាននៅក្នុងសេចក្តីព្រាងច្បាប់នោះ គឺការកាត់បន្ថយរយៈពេលនៃនីតិវិធីសុំសិទ្ធិជ្រកកោន ពង្រឹងយុទ្ធនាការប្រឆាំងនឹងអន្តោប្រវេសន៍ខុសច្បាប់ និងធានាសិទ្ធិស្នាក់នៅរបស់ជនបរទេសដែលស្ថិតក្នុងស្ថានភាពស្របច្បាប់។ តែសេចក្តីព្រាងច្បាប់មួយនេះកំពុងទទួលការបរិហារ និងរិះគន់ពីក្រុមសមាគមជួយជនអន្តោប្រវេសន៍។
ចុះផ្សាយនៅថ្ងៃ៖
ស្តាប់ - ០២:២៥
ខុសពីនៅសភាដែលសម្លេងភាគច្រើនស្ថិតក្នុងដៃគណបក្សកាន់អំណាច គឺគណបក្សសាធារណរដ្ឋបោះជំហានទៅមុខរបស់លោកប្រធានាធិបតីម៉ាក្រុង ព្រឹទ្ធសភាកំពុងស្ថិតក្នុងដៃគណបក្សប្រឆាំង គឺគណបក្សសាធារណរដ្ឋ។ លោកហ្វីលីប បាស ប្រធានគណៈកម្មការច្បាប់មកពីគណបក្សសាធារណរដ្ឋបានអះអាង សេចក្តីព្រាងច្បាប់ស្តីពីសិទ្ធិជ្រកកោន និងអន្តោប្រវេសន៍របស់រដ្ឋាភិបាលមិនមានវិធានការអ្វីច្បាស់លាស់ទាក់ទងនឹងជនអន្តោប្រវេសន៍ខុសច្បាប់ ឬការធ្វើសមាហរណកម្មជនអន្តោប្រវេសន៍ដែលកំពុងមានស្ថានភាពស្របច្បាប់ជាដើម។
នៅក្នុងន័យនេះ គណៈកម្មការច្បាប់បានបង្កើតចេញនូវគម្រោងប្រឆាំងមួយដែលមានលក្ខណៈស៊ីសង្វាក់គ្នាជាង រឹងមាំជាង និងប្រាកដប្រជាជាង។ ទន្ទឹមគ្នានេះ គណៈកម្មការច្បាប់ក៏បានលុបចោលវិធានការមួយចំនួនដែលសមាជិកសភាបានបោះឆ្នោត ដូចយ៉ាងការសម្រាលបទល្មើសនៃសាមគ្គីភាព ឬមួយក៏ពង្រីកនយោបាយជួបជុំគ្រួសាររហូតដល់បងប្អូនប្រុស ស្រីដែលមិនទាន់ពេញវ័យ។ បន្ទាប់មក គណៈកម្មការបានប្រឆាំងយ៉ាងដាច់អហង្ការលើវិធានការមួយក្នុងចំណោមវិធានការសំខាន់ៗរបស់រដ្ឋាភិបាលដែលបានកាត់បន្ថយរយៈពេលតវ៉ាពី ៣០ថ្ងៃមកនៅត្រឹម ១៥ថ្ងៃវិញក្នុងករណីដែលមានការបដិសេធសុំសិទ្ធិជ្រកកោន។
តែគណៈកម្មការច្បាប់បានគ្រោងថា ចម្លើយបដិសេធជាស្ថាពរបិទផ្លូវតវ៉ាមានន័យស្មើនឹងការចាកចេញពីទឹកដីបារាំង។ ចំណែកជនបរទេសដែលស្ថិតក្នុងស្ថានភាពមិនស្របច្បាប់ និងបានប្រព្រឹត្តបទឧក្រិដ្ឋ ឬមួយបទល្មើសដែលត្រូវដេកក្នុងគុករយៈពេល ៥ឆ្នាំនឹងត្រូវបញ្ជូនចេញពីទឹកដីបារាំង។ តែជាថ្មីម្តងទៀត ក្រុមសមាគមជួយជនអន្តោប្រវេសន៍បានចេញមុខប្រឆាំងនឹងសេចក្តីព្រាងច្បាប់នេះដោយនាំគ្នាដាក់ពង្រាយអាវកាក់ជាអ្នកសង្រ្គោះចំនួន ៣៤៨អាវមានសរសេរឈ្មោះសមាជិកព្រឹទ្ធសភាទាំង ៣៤៨រូប។
ចំណែកអង្គការ Amnesty International បានបញ្ចាំងលើជញ្ជាំងវិមានសភានូវពាក្យស្លោកមួយចំនួនគាំទ្រជនអន្តោប្រវេសន៍ដែលមានខ្លឹមសារជាអាទិ៍ « ពីព្រោះយើងមិនបានជ្រើសរើសប្រទេសដែលយើងកើតទេ » ឬមួយក៏ « ពីព្រោះវានឹងអាចកើតមានលើយើងគ្រប់គ្នានៅថ្ងៃណាមួយ » ជាដើម។ គួរជម្រាបជូនថា បារាំងបានទទួលពាក្យសុំសិទ្ធិជ្រកកោនជាង ១០០ ០០០ច្បាប់ក្នុងឆ្នាំ ២០១៧ ពោលច្រើនជាងឆ្នាំ ២០១៦ ចំនួន ១៧,៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ