រុស្ស៊ី ទិតៀនគម្រោងលោក ដូណាល់ ត្រាំ បង្កើ់តកងទ័ពអាមេរិក ប្រចាំនៅអវកាស
រុស្ស៊ីថ្ងៃពុធ ទី ២០ មិថុនា បានសំដែងក្តីកង្វល់ ចំពោះឆន្ទៈ លោក ដូណាល់ ត្រាំ បង្កើត កងទ័ពអាមេរិកប្រចាំនៅអវកាស ដែលនៅដាច់ពីកងអាកាសអាមេរិកមានស្រាប់ទៅហើយ ដ្បិតម៉ូស្គូ មើលឃើញក្នុងគម្រោងនេះរបស់ក្រុងវ៉ាស៊ីនតោន គឺ “ហេតុការណ៍នាំឲ្យរង្គោះរង្គើ” ដល់សន្តិសុខអន្តរជាតិ។
ចុះផ្សាយនៅថ្ងៃ៖
ថ្លែងក្នុងសន្និសីទកាសែតប្រចាំសប្តាហ៍ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova ចង្អុលឲ្យឃើញថា ៖ អ្វីដែលនាំឲ្យម៉ូស្គូខ្វល់មែនទែន គឺ គោលដៅចោទយ៉ាងច្បាស់ ក្នុងគម្រោងនោះ - ធានានូវឧត្តមភាពអាមេរិក ក្នុងអវកាស។
ថ្ងៃចន្ទ ១៨ មិថុនា លោក ដូណាល់ ត្រាំ បានបញ្ជាទៅក្រសួងការពារជាតិ ឲ្យចាប់ផ្តើមនីតិវិធីចាំបាច់ “ដើម្បីបង្កើតកងទ័ពអវកាស ក្នុងឋានៈជាកងទ័ពទី៦ របស់សរអា។ តាមសំដី លោក ត្រាំ ៖ ដើម្បីការពារ សរអា បើពឹងផ្អែកតែលើកងអាកាសប៉ុណ្ណោះ គឺមិនគ្រប់គ្រាន់ទេ សម្រាប់យើងគឺចាំបាច់ ត្រូវតែ អាងយ៉ាង នៅអវកាស !
ប៉ុន្តែតំណាងការទូតរុស្ស៊ី លោកស្រី Zakharova ព្រមានថា ៖ ការបង្កើនសក្តានុពលយោធានៅអវកាស “មុខជានឹងជះចំហាយនាំឲ្យរង្គើរង្គើ” ដល់ស្ថិរភាពយុទ្ធសាស្ត្រ និង សន្តិសុខអន្តរជាតិ។ គាត់គូសបញ្ជាក់ថា រុស្ស៊ីចាត់ទុក “ជាអាទិភាពសម្រាប់ខ្លួន គឺ ប្រើប្រាស់លំហអវកាសក្នុងគោលដៅសន្តិភាព” ហើយរុស្ស៊ីគ្មានប្រយោជន៍នឹងបង្ហោះអ្វីជា មធ្យោបាយវាយប្រហារ ទៅបណ្តែតក្នុងលំហអវកាស ឡើយ។
ចំណែក លោក ដូណាល់ ត្រាំ បានប្រកាសទៅហើយថា គាត់នឹងឲ្យភ្លើងខៀវ ដល់ការបង្កើតកងទ័ពទី៦នោះ នៅទន្ទឹមនឹងទ័ពជើងគោក ទ័ពអាកាស ទ័ពម៉ារីន ទ័ពនាវិកឡើងគោក និង ទ័ពឆ្មាំឆ្នេរសមុទ្រ។
ប្រទេសរុស្ស៊ី សព្វថ្ងៃមានទ័ពអវកាស ដែលអាស្រ័យនឹងកងអាកាស។
លោក ដូណាល់ ត្រាំ បានទម្លាយចេញមក គម្រោងបង្កើតទ័ពអវកាស ដែលត្រូវទទួលការអនុម័តសិនពីខាង រដ្ឋសភាអាមេរិកាំង គឺ ក្រោយពី ម៉ូស្គូ និង វ៉ាស៊ីនតោន បានចេញសេចក្តីថ្លែងការណ៍ សុទ្ធតែខ្លាចរៀងៗខ្លួន ក្រែងមានការរត់ប្រណាំងបំពាក់សព្វាវុធតទៅទៀត។
ថ្លែងសុន្ទរកថា កាលពីខែមីនា លោក វ៉្លាឌីមៀរ ពូទីន បានអួតអាងពីមីស៊ីលនុយក្លេអ៊ែរ ធុនថ្មីៗដែល “គ្មានអ្វីអាចទប់ស្កាត់វាឡើយ” សម្រាប់ប្រឈមនឹងប្រព័ន្ធខែលមីស៊ីលប្រឆាំងមីស៊ីលអាមេរិកាំង ដំឡើងនៅអឺរ៉ុបខាងកើត និង នៅអាស៊ីបូព៌ា។
ប៉ុន្មានថ្ងៃក្រោយមក ប្រធានាធិបតីទាំងពីរ បានសន្ទនាគ្នាតាមទូរស័ព្ទ ហើយចុះសម្រុងគ្នាថា ស្រាក់កម្លាំងគ្នា “កម្រិតការរត់ប្រណាំងបំពាក់សព្វាវុធ” - នេះបើតាមវិមានក្រេមឡាំង។
ក្នុងបរិបទនៃភាពតានតឹងរស់រវើក រវាងម៉ូស្គូនិងវ៉ាស៊ីនតោន អវកាស ជា វិស័យតែមួយគត់ ដែលប្រទេសទាំងពីរ បន្តសហការគ្នា ជាអាទិ៍ ដោយចូលរួម ក្នុង ស្ថានីយអវកាសអន្តរជាតិ SSI ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ