បោះឆ្នោតតួកគី៖យុទ្ធនាការឃោសនាវាយប្រហារគ្នាចុងក្រោយរវាងលោកអ៊ែរដូហ្កាន និងលោកអ៊ិន្ស
ថ្ងៃអាទិត្យ ទី២៤ មិថុនានេះជាការរៀបចំបោះឆ្នោតប្រធានាធិបតី និងសភាមុនអាណត្តិនៅក្នុងប្រទេសតួកគី។ ពេញមួយថ្ងៃសៅរ៍ ទី២៣ មិថុនា លោកប្រធានាធិបតីផុតអាណត្តិអ៊ែរដូហ្កាន និងគូប្រជែងដ៏សំខាន់របស់លោកគឺលោកមូហារ៉ិម អ៊ិន្សបានធ្វើយុទ្ធនាការថ្ងៃចុងក្រោយក្នុងទីក្រុងអ៊ីស្តង់ប៊ូល។ យុទ្ធនាការដែលបង្កប់ដោយការវាយប្រហារពាកយសម្តីយ៉ាងផុសផុលរវាងបេក្ខជនទាំងពីរ។ ក្រៅពីបេក្ខជនប្រជែងលោកអ៊ីន្ស លោកអ៊ែរដូហ្កានក៏កំពុងប្រឈមនឹងបេក្ខជនម្នាក់ទៀត គឺបេក្ខនារីមេរ៉ាល់ អាក់សេនីសមកពីគណបក្សស្តាំជាតិនិយម។
ចុះផ្សាយនៅថ្ងៃ៖
ស្តាប់ - ០២:២០
បើគ្មានអ្វីកើតឡើងធំដុំទេ ប្រធានាធិបតីថ្មីនៃប្រទេសតួកគីនៅតែមានឈ្មោះរីស៊ីប តាយយ៉ីប អ៊ែរដូហ្កាន។ តែដើម្បីអាចបន្តអង្គុយកៅអីប្រធានាធិបតីអាណត្តិថ្មីបាន លោកអ៊ែរដូហ្កានត្រូវប្រកួតប្រជែងទល់នឹងបេក្ខជនមិនចេះតមសម្តីមួយចំនួន ពិសេសលោកមូហារ៉ិម អ៊ិន្សមកពីគណបក្សសាធារណរដ្ឋនៃប្រជាជន។ នៅថ្ងៃសៅរ៍ ទី២៣ មិថុនាដែលជាថ្ងៃឃោសនាចុងក្រោយ ទីក្រុងអ៊ីស្តង់ប៊ូលបានក្លាយជាឆាកនៃការវាយប្រហារដោយសម្តីយ៉ាងផុសផុលរវាងលោកអ៊ែរដូហ្កាន និងលោកអ៊ិន្ស។
ខុសពីបេក្ខជនផ្សេងទៀត ដូចយ៉ាងលោកស្រីមេរ៉ាល់ អាក់សេនីសដែលកំពុងប្រជែងទល់នឹងលោកប្រធានាធិបតីផុតអាណត្តិអ៊ែរដូហ្កាន លោកអ៊ិន្សជាបេក្ខជនដែលកំពុងលេចធ្លោខ្លាំង និងបានធ្វើឲ្យមជ្ឈដ្ឋានមហាជនទូទៅមានការភ្ញាក់ផ្អើលជាមួយនឹងការបញ្ចេញវោហារដោយមិនញញើតនឹងតតាំងទល់នឹងលោកអ៊ែរដូហ្កានទេ។ លើសពីនេះទៅទៀត លោកអ៊ិន្សមិនបានពាក់សញ្ញាគណបក្សរបស់លោកនៅជាប់នឹងអាវទេ ព្រោះលោកចង់តាំងខ្លួនធ្វើជាអ្នកតំណាងឲ្យក្រុមគណបក្សប្រឆាំងទាំងអស់។
ចំណែកនៅលើកញ្ចក់ទូរទស្សន៍ក្នុងកម្មវីធីផ្សាយយុទ្ធនាការឃោសនាបោះឆ្នោតចុងក្រោយវិញ មានកាណាល់ទូរទស្សន៍ខ្លះបានចែកអេក្រង់ជាពីរដោយដាក់រូបលោកអ៊ែរដូហ្កាន និងរូបលោកអ៊ិន្សកំពុងថ្លែងសុន្ទរកថា។ នៅក្នុងសុន្ទរកថា លោកអ៊ិន្សបានបង្ហាញរូបភាពប្រទេសតួកគីស្ថិតក្នុងរូបភាពអាប់អួរ ប្រសិនបើលោកអ៊ែរដូហ្កានឈ្នះឆ្នោត ហើយមិនញញើតនឹងលើកឡើងពីចំណុចអវិជ្ជមានរបស់លោកអ៊ែរដូហ្កានរួមមាន រូបិយប័ណ្ណតួកគីបាត់បង់តម្លៃ តម្លៃទំនិញឡើងថ្លៃខ្លាំង អត្រាអតិផរណាមានពីរខ្ទង់ និងវត្តមានជនភៀសខ្លួនស៊ីរីជាង ៣លាន ៥សែននាក់ក្នុងទឹកដីតួកគីដែលគ្មានដំណោះស្រាយ។
លោកអ៊ិន្សអួតថា បើលោកឈ្នះ គឺពលរដ្ឋតួកគីទាំង ៨០លាននាក់ជាអ្នកឈ្នះ ប្រទេសតួកគីជាអ្នកឈ្នះ។ ចំណែកលោកអ៊ែរដូហ្កានបានលើកពាក្យពេចន៍របស់លោកអ៊ិន្សដែលនិយាយថា លោកនឹងបោះជំរំសំពត់ដេកនៅមុខគណកម្មាធិការជាតិរៀបចំការបោះឆ្នោតដើម្បីធានាពីការមិនលួចបន្លំសន្លឹកឆ្នោត។ ពាក្យសម្តីដូចនេះរបស់លោកអ៊ិន្សត្រូវបានលោកអ៊ែរដូហ្កានចំអកថា មកពីលោកអ៊ិន្សដឹងខ្លួនឯងចាញ់រួចហើយ មុននឹងបន្ថែមថា តួកគីជាប្រទេសនីតិរដ្ឋដែលបានចាត់វិធានការគ្រប់បែបយ៉ាងដើម្បីធានាពីដំណើរការបោះឆ្នោតត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ