ភេរវកម្មអត្តឃាតសំដៅ ទាហានបារាំង នៅប្រទេសម៉ាលី
ក្បួនរថយន្តល្បាតរបស់ទាហានបារាំង និងម៉ាលី បានរងការវាយប្រហារភេរវកម្មអត្តឃាត នៅថ្ងៃអាទិត្យម្សិលមិញ នៅភាគខាងជើងប្រទេសម៉ាលី។ តាមអ្នកនាំពាក្យរបស់ក្រសួងការពារជាតិបារាំង ភេរវកម្មអត្តឃាតបានសម្លាប់ប្រជាជនស៊ីវិលពីរនាក់ស្លាប់ និងធ្វើឲ្យទាហានបារាំង ពី ៤ទៅ ៨នាក់រងរបួស។ អំពើភេរវកម្ម សំដៅកងកម្លាំងប្រដាប់អាវុធ បារាំង ធ្វើឡើងនៅមួយថ្ងៃក្រោយ ដែលប្រធានាធិបតីបារាំង លោកម៉ាក្រុង ត្រូវទៅប្រទេសម៉ាលី ដើម្បី ជួបពិភាក្សា ជាមួយ ថ្នាក់ដឹកនាំរបស់កងកម្លាំងអាហ្រ្វិក ដើម្បីប្រយុទ្ធប្រឆាំង ក្រុមភេរវនិយម នៅសាអែល ក្នុងទឹកដីអាហ្រ្វិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
នៅក្នុងរយៈពេល ៣ថ្ងៃ ប្រទេសម៉ាលី បានរងការវាយប្រហារភេរវកម្ម ផ្ទួនៗគ្នាដល់ទៅ៣លើក។ នៅថ្ងៃអាទិត្យ ក្បួនរថយន្ត ដឹកទាហានបារាំង បានក្លាយជាផ្ទាំងស៊ីបវាយប្រហាររបស់ភេរវករអត្តឃាត។ តាមមន្រ្តីយោធា ម៉ាលី ភេរវជន បានបំផ្ទុះរថយន្ត ដែលពួកគេបានបើកទៅបុករថពាសដែកដឹកទាហានបារាំង។
អ្នកនាំពាក្យរបស់ក្រសួងការពារបារាំង លោក Patrick Steiger វិញបាននិយាយប្រាប់ទីភ្នាក់ងារព័ត៌មានអង់គ្លេស Reuters ថា ទាហានបារាំងមិនបានរងគ្រោះថ្នាក់ដល់ជីវិតនោះទេ ប៉ុន្តែ ពួកគេទាំង៣០នាក់ដែលស្ថិតនៅក្នុងហេតុការណ៍ ត្រូវបានគេដឹកជញ្ជូនទៅទីកន្លែងសុវត្ថិភាពមួយរួចហើយ។
ភេរវកម្មអត្តឃាត កើតឡើងនៅចំថ្ងៃដែលបើកជំនួបកំពូលសហភាពអាហ្វ្រិក និងនៅតែពីរថ្ងៃក្រោយ ដែល អគាររបស់ទីស្នាក់ការកណ្តាលរបស់កម្លាំងសន្តិសុខពិសេស តំបន់សាហ៊ែលអាហ្វ្រិក នៅប្រទេសម៉ាលី បានរងការវាយប្រហារពីក្រុមភេរវជនអត្តឃាត ដែលបានសម្លាប់ជីវិតមនុស្ស៦នាក់ ក្នុងនោះ ពីរនាក់ជាទាហានម៉ាលី។ មួយវិញទៀត ភេរវកម្មសំដៅ ទាហានបារាំង ដែលសហការល្បាតជាមួយទាហានម៉ាលី ធ្វើឡើង នៅតែមួយថ្ងៃមុនដែលប្រធានាធិបតីបារាំង លោកអេម៉ានុយអែល ម៉ាក្រុង ត្រូវធ្វើដំណើរទៅប្រទេសម៉ូរីតានី ដើម្បី ជួបនិយាយជាមួយ មេដឹកនាំអាហ្វ្រិក ពីបេសសកម្មរបស់កងកម្លាំងអាហ្វ្រិក នៅតំបន់សាអែល។
បារាំងបានគាំទ្រជាពិសេសផ្នែកហិរញ្ញវត្ថុសម្រាប់ កម្លាំងសន្តិសុខពិសេស តំបន់សាហ៊ែល ដែលបារាំងប៉ងចង់ឲ្យធ្វើជាអ្នកស្នង បន្តប្រតិបត្តិការ របស់ទាហានបារាំង ដែលកំពុងប្រយុទ្ធប្រឆាំងនឹងក្រុមភេរវនិយមនៅទឹកដីម៉ាលី។ នៅម៉ាលី ទាហានបារាំង៤ពាន់នាក់ ត្រូវបានពង្រាយឲ្យរក្សាសន្តិសុខ នៅតាមព្រំដែន ជាមួយនឹងកងកម្លាំងមួយខៀវរបស់អង្គការសហប្រជាជាតិ ប្រមាណ ១២ ០០០នាក់។ ក្រុមអ៊ីស្លាមជ្រុលនិយម ដែលជាបណ្តាញរបស់ក្រុមអាល់កៃដា ត្រូវបានកម្ចាត់ភាគច្រើន ចេញពីទឹកដីអាហ្វ្រិក ចាប់តាំងពីបារាំងបើកប្រតិបត្តិការយោធា នៅប្រទេសម៉ាលី នៅដើមឆ្នាំ ២០១៣។ បង្កើតឡើងនៅឆ្នាំ ២០១៧ កម្លាំងសន្តិសុខពិសេស តំបន់សាហ៊ែលអាហ្រ្វិក ដែលមានការចូលរួមពី៥ប្រទេស មានគម្រោងបង្កើនចំនួនទ័ពអាហ្វ្រិក ដល់៥ពាន់នាក់។ ប៉ុន្តែ បញ្ហាហិរញ្ញវត្ថុ និងការចោទប្រកាន់ជាច្រើន ស្តីពីការរំលោភសិទ្ធិមនុស្សរបស់ទាហានអាហ្វ្រិក បានក្លាយជាឧបសគ្គ ធ្វើឲ្យការបង្កើត កងកម្លាំងពិសេសអាហ្រ្វិក សាហ៊ែល អាហ្រ្វិក មានតែនៅលើក្រដាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ