ប្រមុខការទូតបារាំងបំពេញទស្សនកិច្ចនៅលីប៊ីដើម្បីគាំទ្រដល់ការរៀបចំការបោះឆ្នោតលីប៊ី
ប្រមុខការទូតបារាំង លោក Jean-Yves Le Drian បានបំពេញទស្សនកិច្ចនៅប្រទេសលីប៊ី កាលពីថ្ងៃចន្ទម្សិលមិញ ដើម្បីជម្រុញ ដល់កិច្ចព្រមព្រៀងទីក្រុងប៉ារីស។កិច្ចព្រមព្រៀងដែលគ្រោងទុកនូវការរៀបចំបោះឆ្នោតនានានៅខែធ្នូខាងមុខនៅលីប៊ីដែលជា ប្រទេសមួយកំពុងជូបនឹងវិបត្តិនយោបាយដ៏វឹកវរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ក្រោយពីជួបប្រាស្រ័យមួយជាមួយលោក Fayez al-Sarraj នាយករដ្ឋមន្ត្រីនៃរដ្ឋាភិបាលរួបរួមជាតិលីបី(GNA) នៅទីក្រុង ទ្រីប៉ូលីរួចមក លោកJean-yves Le Drian ប្រមុខការទូតបារាំង បានថ្លែងថា “នៅទីក្រុងប៉ារីសថ្ងៃទី២៩ឧសភាមុន បណ្តាអ្នកទទួលខុសត្រូវលីប៊ី បានបេ្តជ្ញាចិត្តថានឹងរៀបចំការបោះឆ្នោតជ្រើសរើសប្រធានាធិបតីនិងតំណាងរាស្រ្តលីប៊ីស្របទៅតាមកាលវិភាគដ៏ច្បាស់លាស់មួយ ចាប់ពីពេលនេះទៅរហូតដល់ដំណាច់ឆ្នាំ។
យោងតាមប្រមុខការទូតបារាំង ព្រឹត្តិការណ៍ទាំងអស់នោះហើយដែលពលរដ្ឋលីប៊ីគ្រប់ៗគ្នា នឹកប្រាថ្នាចង់ ដោយយោងទៅលើចំនួននៃអ្នកទៅចុះឈ្មោះបោះឆ្នោតដ៏ច្រើនសន្ធឹកសន្ធាប់នៅក្នុងបញ្ជីបោះឆ្នោត។
“នោះហើយគឺជាគន្លងមាគ៌ាមួយដែលលីបី ត្រូវអនុវត្តតាម ហើយវត្តមានរបស់លោកនៅលីប៊ីនេះ ក៏គឺដើម្បីរំលឹកសារជាថ្មីទៀត នូវការសន្យានានានិងប្រតិទិននេះ ដល់បណ្តាអ្នកដឹកនាំលីប៊ីដែលបានទៅចូលរួមចំណែកនៅក្នុងដំណើរការងារនេះ ក៏ព្រមទាំងចែករំលែកផងដែរដល់បណ្តាអ្នកដែលមិនបានមកចូលរួមប្រជុំនៅក្នុងទីក្រុងប៉ារីសកាលពីថ្ងៃទី២៩ឧសភាកន្លងទៅនេះដែរ”-នេះជាការគូសបញ្ជាក់បន្ថែមរបស់លោក Jean-Yves Le Drian ។
គួររំលឹកថា ៧ឆ្នាំក្រោយពីការដួលរលំនៃរបបលោក Mouammar Kadhafi នៅ ក្នុងឆ្នាំ ២០១១មក ប្រទេសលីប៊ីនៅតែ បន្តជួប វិបត្តិនយោបាយ ។ ដោយហេតុថា លីប៊ី មានអ្នកដឹកនាំនយោបាយពីររូប ដែល ជា គូបដិបក្សនឹងគ្នា។ អ្នកដឹកនាំនយោបាយលីប៊ី ទីមួយ គឺជារដ្ឋាភិបាលរួបរួមជាតិលីប៊ី (GNA)នៅទីក្រុងTripoli ដែលគាំទ្រដោយសហគមន៍អន្តរជាតិនិងមូលដ្ឋានមួយកន្លែងទៀតនៅក្នុងភាគខាងកើតប្រទេសលីប៊ីដែលគាំទ្រដោយលោកសេនាប្រមុខ Khalifa Haftar (ខាលីហ្វា ហាហ្វតា )។
រដ្ឋមន្ត្រីការបរទេសបារាំង ក៏បានជូនដំណឹងផងដែរ អំពីការចូលរួមវិភាគទានរបស់ប្រទេសបារាំងនូវទឹកប្រាក់ចំនួន១លានដុល្លារអាមេរិកឬស្មើនឹង៨៥ម៉ឺនអឺរ៉ូសម្រាប់ជួយដល់លីប៊ីនៅក្នុងការរៀបចំការបោះឆ្នោតនេះ។ បន្ទាប់មក លោក Jean-Yves Le Drian ក៏បានជួបប្រាស្រ័យផងដែរជាមួយប្រធានក្រុមប្រឹក្សារដ្ឋលីប៊ី លោក Khalef al-Mechri ដែលជាអ្នកកាន់សាសនាអ៊ីស្លាមមិនសូវតឹងរ៉ឹង។ រដ្ឋមន្ត្រីការបរទេសបារាំង ក៏ត្រូវជួបប្រាស្រ័យផងដែរ ជាមួយប្រធាននៃរដ្ឋសភាលីប៊ីលោក Aguila Saleh ដែលមានទីតាំងនៅTobrouk ក្នុងភាគខាងកើតប្រទេសលីបី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ