ប្រមុខការទូតរុស្ស៊ីបំពេញទស្សនកិច្ចនៅប៉ារីសដើម្បីពិភាក្សាគ្នាអំពីបញ្ហាស៊ីរីនិងអ៊ុយក្រែន
ប្រមុខការទូតរុស្ស៊ី លោក Sergueï Lavrov និងនាយសេនាធិការកងទ័ពរុស្ស៊ីលោក Valeri Guerassimov បានអញ្ជើញមកកាន់ទីក្រុងប៉ារីសដើម្បីជួបប្រាស្រ័យជាមួយប្រធានាធិបតីបារាំង លោក Emmanuel MACRON និងប្រមុខការទូតបារាំងលោក Jean-Yves Le Drian នៅថ្ងៃអង្គារម្សិលមិញនៅ វិមានប្រធានាធិបតីបារាំង l’Elysée ។ របៀបវារៈនៃជំនួបប្រាស្រ័យនេះ គឺដើម្បីពិភាក្សាគ្នាអំពីបញ្ហាជម្លោះនៅស៊ីរីនិងអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
គឺជាជំនួបប្រាស្រ័យមួយដែលមានទម្រង់មិនធម្មតាដោយហេតុតែពុំមានការជូនដំណឹងអ្វីឡើយ។ នាមុនពេលមកដល់ប្រទេសបារាំង ប្រមុខការទូតរុស្ស៊ី លោក Sergueï Lavrov និងនាយសេនាធិការកងទ័ពរុស្ស៊ី លោក Valeri Guerassimov បានអញ្ជើញទៅកាន់អ៊ីស្រាអែលកាលពីថ្ងៃច័ន្ទមុន។ នៅទីនោះ ឥស្សរជនជាន់ខ្ពស់រុស្ស៊ីទាំងពីររូប ត្រូវបានទទួលជូបប្រាស្រ័យជាមួយនាយករដ្ឋមន្ត្រីអ៊ីស្រាអែលលោក Benyamin Netanyahu ។
បន្ទាប់មកទៀតនៅថ្ងៃអង្គារម្សិលមិញនាមុនពេលអញ្ជើញមកដល់ទីក្រុងប៉ារីស ប្រមុខការទូតរុស្ស៊ីនិងនាយសេនាធិការ បានជួបប្រាស្រ័យជាមួយនាយករដ្ឋមន្ត្រីអាល្លឺម៉ង់លោកស្រី Angel Merkel នៅទីក្រុង Berlin។
បន្ទាប់ពីជំនួបប្រាស្រ័យនៅទីក្រុង Berlin ទីក្រុង ម៉ូស្គូ បានគូសបញ្ជាក់ប្រាប់ថា "បញ្ហាដ៏សំខាន់មួយដែលត្រូវបានលើកយកមកពិភាក្សាគ្នានោះ គឺ បញ្ហានៃការវិលត្រឡប់របស់ជនភៀសខ្លួនស៊ីរីទៅកាន់ប្រទេសដើមខ្លួនវិញ"។ ប្រជាជនស៊ីរី ដែលបានរត់ភៀសខ្លួនពីសង្គ្រាមស៊ីវីលយ៉ាងភ្លូកទឹកភ្លូកដីដើម្បីទៅជ្រកកោននៅប្រទេសលីបង់ ហ្ស៊កដានី តួកគី ឬក៏ប្រទេសអាល្លឺម៉ង់។
សូមបញ្ជាក់ថាទីក្រុងប៉ារីសនិងម៉ស្គូ បានធ្វើប្រតិបត្តិការមនុស្សធម៌រួមគ្នាមួយដើម្បីជួយដល់ប្រទេសស៊ីរីកាលពីយប់ថ្ងៃសុក្ររហូតដល់ថ្ងៃសៅរ៍មុន។ បារាំងបានផ្គត់ផ្គង់ជាសម្ភារៈពេទ្យនិងទំនិញនានាដែលជាតម្រូវការចាំបាច់ក្នុងចំនួន ៤៤តោនដើម្បីដឹកបញ្ជូនទៅកាន់តំបន់ហ្គូតាខាងកើតជិតទីក្រុងដាម៉ាស តាមរយៈយន្តហោះដ៏ធំបំផុតមួយរបស់កងទ័ពរុស្ស៊ីធុន Antonov 124 ។
ប្រតិបត្តិការមនុស្សធម៌រួមគ្នានេះ ក៏ជាលើកតំបូងបង្អស់ដែរនៅស៊ីរីរវាងរុស្ស៊ីនិងលោកខាងលិចដោយហេតុថាកន្លងមក រុស្ស៊ីធ្លាប់ជួយអន្តរាគមន៍យោធាដល់របបលោកប្រធានាធិបតីស៊ីរី Bachar al-Assad នៅក្នុងឆ្នាំ ២០១៥។
គួររំលឹកថា ដំណើរទស្សនកិច្ចរបស់លោក Sergueï Lavrov និងនាយសេនាធិការកងទ័ពរុស្ស៊ីនេះ ត្រូវបានប្រព្រឹត្តទៅតែមួយសប្តាហ៍ប៉ុណ្ណោះ បន្ទាប់ពីជំនួបរវាងប្រធានាធិបតីអាមេរិក លោក Donald Trump និងលោក Vladimir Poutine។ ហើយនៅនាឪកាសនោះ ម៉ូស្គូ បានសុំស្នើជាអាទិ៍ឲ្យអាមេរិកធ្វើការរួមគ្នាជាមួយរុស្ស៊ីនៅលើបញ្ហាជនភៀសខ្លួននិងការកសាងប្រទេសស៊ីរីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ