ជុំវិញសង្គ្រាមនៅស៊ីរី ៖ ទស្សនកិច្ច ស្ងាត់ៗ របស់ប្រមុខការទួតរុស្ស៊ី នៅ អ៊ីស្រាអែល
ល្ងាចថ្ងៃចន្ទ ២៣ កក្កដា នៅក្រុង Jerusalem លោកនាយករដ្ឋមន្ត្រី Benyamin Netanyahu ស្រាប់តែបានទទួលជួប លោករដ្ឋមន្ត្រីការបរទេសរុស្ស៊ី Serguei Lavrov អមដំណើរ ដោយ លោកនាយអគ្គសេនាធិការដ្ឋាន កងទ័ពរុស្ស៊ី ទៅផង។ នេះជាទស្សនកិច្ច ដែលឥតមានប្រកាស ឲ្យដឹង ជាមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ជំនួបនេះ ដែលបានប្រព្រឹត្តទៅអស់ ២ ម៉ោង គឺប៉ះជាថ្មីលើស្ថានការណ៍នៅស៊ីរី។ អ៊ីស្រាអែល ព្រួយ បារម្ភ នឹងវត្តមាននៃ ក្រុមទ័ពអ៊ីរ៉ង់នៅក្បែរព្រំប្រទល់ខ្លួន។ ក្តីបារម្ភនេះ មានកម្រិតកាន់តែកើនឡើង នា ប៉ុន្មានសប្តាហ៏ចុងក្រោយ ដោយមកពីកងកម្លាំងលោក Bachar el-Assad ចេះតែរុលទៅមុខ នៅតំបន់ ខាងត្បូងប្រទេសស៊ីរី។ ក្នុងឋានៈជាតួឯកក្នុងជម្លោះស៊ីរី រុស្ស៊ី ក្លាយជាគូសន្ទនាដ៏សំខាន់ សម្រាប់ រដ្ឋាភិបាលអ៊ីស្រាអែល។
កន្លងផុតទើប ១២ ថ្ងៃសោះ ក្រោយពីលោក Netanyahu បានជួបជាមួយមេដឹកនាំរុស្ស៊ី។ ថ្ងៃ ១១ កក្កដា លោកនាយរដ្ឋមន្ត្រីអ៊ីស្រាអែល បានជួបចរចានៅម៉ូស្គូ ជាមួយលោក Vladimir Poutine ៖ ជំនួបថ្នាក់ដឹកនាំ ប្រទេសទាំងពីរ មានលក្ខណៈញឹកញយ និង ប្រញឹក ខណៈដែលកងទ័ពលោក Assad តាំងឡើងវិញ ការត្រួតត្រាលើ តំបន់ទាំងឡាយ នៅជិតខ្សែខ័ណ្ឌព្រំដែន ស៊ីរី-អ៊ីស្រាអែល។
ក្នុងជំនួបមួយលើកៗ ប្រមុខ រដ្ឋាភិបាលអ៊ីស្រាអែល តែងគូសបញ្ជាក់ពីសារសំខាន់នៃ ចំណងជាមួយម៉ូស្គូ។ ប៉ុន្តែជំនួបញឹកញយនេះ ក៏ សឲ្យ ឃើញពី ស្នាមភ្លោះ ដែលញែកប្រទេសទាំងពីរ។
ក្នុងជំនួប ល្ងាចថ្ងៃចន្ទម្សិលម៉្ងៃ នៅក្រុង Jerusalem រវាងលោកនាយករដ្ឋមន្ត្រីអ៊ីស្រាអែល Netanyahu និងលោករដ្ឋមន្ត្រីការបរទេសរុស្ស៊ី Serguei Lavrov ភាគីរុស្ស៊ី បានដាក់ចេញនូវសំណើ ឲ្យក្រុមទ័ពអ៊ីរ៉ង់ ឈរជើង នៅចម្ងាយ ១០០ គម ពីខ្សែខ័ណ្ឌព្រំដែន លើខ្ពង់រាប Golan – ការនេះបង្ហើបឲ្យដឹង ដោយ អ្នកមុខអ្នកការអ៊ីស្រាអែល ដែលមិនបញ្ចេញឈ្មោះ។
ប៉ុន្តែ សម្រាប់អ៊ីស្រាអែល សំណើរុស្ស៊ីនេះ មិនគ្រប់គ្រាន់ទេ។ ដ្បិត តាមការអះអាង អ្នកមុខអ្នកការនោះ ៖ អ៊ីស្រាអែល មិនអាចទទួលយកបានឡើយវត្តមានទ័ពអ៊ីរ៉ង់ ក្នុងប្រទេសស៊ីរី ទោះបីនៅក្បែរខ្សែព្រំដែននោះ ទោះបីនៅចម្ងាយឆ្ងាយជាង ១០០ គម ក្តី។ ហើយលោក Netanyahu បានព្រមានថា គាត់រក្សាសិទ្ធិ ធ្វើ ប្រតិបត្តិការយោធា នៅលើដែនដីប្រទេសជិតខាង ដើម្បីធានាសន្តិសុខដល់រដ្ឋអ៊ីស្រាអែល។ គោលដៅ លោក Netanyahu គឺឲ្យក្រុមទ័ពអ៊ីរ៉ង់ ចាកចេញជារៀងរហូត ពីប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ