នៅរុស្ស៊ី បាតុករទាំងពាន់ៗនាក់ ចុះថ្នល់ប្រឆាំងនឹងកំណែទម្រង់ប្រព័ន្ធចូលសោធននិវត្តន៍
ប្រជាពលរដ្ឋរុស្ស៊ីរាប់ម៉ឺននាក់ ថ្ងៃសៅរ៍ ២៨ កក្កដា បានចូលរួមក្នុងបាតុកម្ម នៅទូទាំងប្រទេស ចាត់ចែងឡើងដោយបក្សកុម្មុយនិស្ត ប្រឆាំងនឹងគម្រោងច្បាប់ ដាក់ចេញដោយរដ្ឋាភិបាល ដើម្បីដំឡើងវ័យពលរដ្ឋ សម្រាប់ចូលរ៉ឺត្រែត។
ចុះផ្សាយនៅថ្ងៃ៖
នៅរដ្ឋធានីម៉ូស្គូ តាមតួលេខពួកអ្នកចាត់ចែង មានដល់ ១០ ម៉ឺននាក់ ប៉ុន្តែ តាមតួលេខ អ្នកកាសែតមានប្រមាណ ១ ម៉ឺននាក់ បានចូលរួមក្នុងបាតុកម្មអនុញ្ញាតដោយអាជ្ញាធរប្រឆាំងនឹងពង្រាងច្បាប់នោះ ដែលកំពុងស្ថិតនៅក្នុងការពិភាក្សារបស់រដ្ឋសភា។ ពួកបាតុករ នាំគ្នាស្រែកបន្លឺឡើងនូវពាក្យស្លោក បែប យ៉ាង “សូមពូទីន កុំប៉ះពាល់ឡើយ ដល់ប្រាក់រ៉ឺត្រែតយើង!” ចំណែកផ្ទាំងបដា ដែលគេជ្រោងលើកឡើង សរសេរដោយពាក្យថា “យើងចង់រស់ដោយប្រាក់រ៉ឺត្រែតយើង មិនមែនចង់ស្លាប់នៅកន្លែងធ្វើការឡើយ!”
បាតុកម្មបានប្រព្រឹត្តទៅ នៅតាមក្រុងចំនួនរាប់សិបផ្សេងទៀត ឆ្លងកាត់ប្រទេសរុស្ស៊ី ពីចុងបូព៌ា មកតំបន់ស៊ីរី និងតំបន់ខាងលិច។
នៅក្រុង Saint-Petersbourg ជាក្រុងទី២ នៃប្រទេស មានអ្នកស្រុកប្រមាណ ១ពាន់នាក់ បានប្រមូលផ្តុំគ្នា ក្រោមទង់ក្រហម ដោយខ្លះកាន់នៅដៃទាំងរូប Staline ទៅផង។ នៅក្រុង Novosibirsk ប៉ែកខាងលិចតំបន់ស៊ីបេរី មានបាតុករឈរប្រឆាំង ១.២០០ នាក់ - នេះបើតាមតួលេខសាលាក្រុងនោះឯង។
ការប្រឆាំងមិនធម្មតានេះ ទល់នឹងវិធានការដែលគាំទ្រដោយលោកប្រធានាធិបតី ពូទីន ក៏ត្រូវបានសំដែង ក្នុងញត្តិចុះហត្ថលេខាដោយបណ្តាជន ២ លាន ៩ សែននាក់ សុំឲ្យលុបចោលទៅកំណែទម្រង់នោះ។ បក្សកុម្មុយនិស្ត ដែលជាញឹកញយផ្គាប់ចិត្តក្រេមឡាំង ក៏ប្រឆាំងដែរ។
លោកពូទីន ដែលមិនបាននិយាយ អំពីបញ្ហាចូលរ៉ឺត្រែត ក្នុងសម័យឃោសនាបោះឆ្នោត ពេលឈ្នះឆ្នោតនោះ ក្នុងខែមីនា បានមានប្រជាប្រិយភាពដល់ទៅ ៨០% ហើយឥឡូវ ក្នុងខែកក្កដា គឺធ្លាក់មកនៅត្រឹម ៦៤% - លទ្ធផលស្ទង់មតិនេះ ចេញផ្សាយដោយអង្គការសង្គមសាស្ត្រ VSIOM ។
“អ្នកស្រុកជាច្រើនបាននាំគ្នាជឿលោកពូទីន ពេលគាត់ប្រកាសថា ក្នុងប្រទេសនឹងពុំមានកំណែទម្រង់ ប្រព័ន្ធរ៉ឺត្រឺតទេ។ ប៉ុន្តែគួរឲ្យស្តាយ ខ្ញុំខកចិត្តជាអនេកនឹងសំដីគាត់” -នេះជាវាចាស្ត្រីម្នាក់ឈ្មោះ Irina Ivanova អាយុ ៤៩ ឆ្នាំ រស់នៅក្រុង Saint-Petersbourg។ គម្រោងច្បាប់ដែលមានប្រមើលដំឡើងវ័យចូលរ៉ឺត្រែត ដោយសន្សឹមៗ សម្រាប់បុរស ពី៦០ ឆ្នាំសព្វថ្ងៃ លុះដល់វ័យ ៦៥ ឆ្នាំ ហើយសម្រាប់ស្ត្រី ពី ៥៥ ឆ្នាំសព្វថ្ងៃ លុះដល់វ័យ ៦៣ ឆ្នាំ។ ការនេះប្រព្រឹត្តទៅ ជាលើកទី១ បើគិត ក្នុង ៩០ ឆ្នាំកន្លងទៅ។
សប្តាហ៍មុន លោកប្រធានាធិបតី ពូទីន បានថ្លែងថា គាត់មិនសាមគ្គីទេ នឹងគំនិតដំឡើងវ័យចូលរ៉ឺត្រែត ប៉ុន្តែ ជាការចាំបាច់ ដែលត្រូវតែហ៊ានអនុម័តសេចក្តីសម្រេចសែនសំខាន់នេះ។
មេប្រឆាំងនៅរុស្ស៊ី លោក Alexei Navalny បានអំពាវនាវ បក្សពួកគាត់ ឲ្យជួបជុំគ្នាក្នុងបាតុកម្មតវ៉ា ដែលអនុញ្ញាត ដោយសាលាក្រុងម៉ូស្គូ នៅល្ងាចថ្ងៃអាទិត្យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ