ការធ្វើកូដកម្មអត់អាហាររបស់លោក Oleg Sentsov ក្នុងពន្ធនាគារនៅរុស្ស៊ីបានចូលដល់ ១០០ថ្ងៃ
ថ្ងៃអង្គារ ទី២១ សីហានេះបានឈានចូល ១០០ថ្ងៃដែលលោក Oleg Sentsov បានធ្វើកូដកម្មអត់អាហារនៅក្នុងពន្ធនាគារស្ថិតក្នុងទឹកដីរុស្ស៊ី។ មានអាយុ ៤២ឆ្នាំ លោក Sentsov ជាសមិទ្ធិករភាពយន្តជនជាតិអ៊ុយក្រែន និងដែលត្រូវបានតុលាការរុស្ស៊ីកាត់ទោសក្នុងឆ្នាំ ២០១៥ ឲ្យជាប់គុកចំនួន ២០ឆ្នាំពីបទភេរវនិយម និងរត់ពន្ធអាវុធ។ តាំងពីថ្ងៃទី១៤ ឧសភាមកម្ល៉េះដែលលោក Sentsov មិនទទួលទានអាហារ និងកំពុងបន្តមានជីវិតដោយការបញ្ចូលអាហារតាមសរសៃឈាមពីរដ្ឋអំណាចពន្ធនាគារ។ សហគមន៍អន្តរជាតិ មានអាមេរិក និងអឺរ៉ុបបន្តទាមទារឲ្យដោះលែងលោក Sentsov តែរហូតមកដល់ពេលនេះ រដ្ឋាភិបាលក្រុងមូស្គូបន្តធ្វើ គ ធ្វើថ្លង់។ តើនេះមកពីមូលហេតុអ្វី យើងស្តាប់ការពន្យល់បកស្រាយរបស់លោក មីខាអ៊ីល ហ្វីដូតូវ ទីប្រឹក្សារបស់លោកប្រធានាធិបតីរុស្ស៊ីពូទីនទទួលបន្ទុកសិទ្ធិមនុស្ស និងសង្គមស៊ីវិល។
ចុះផ្សាយនៅថ្ងៃ៖
ស្តាប់ - ០១:៣៦
« ចំពោះខ្ញុំ ខ្ញុំសង្ឃឹម និងចង់ឃើញឲ្យមានការដោះស្រាយបញ្ហាមួយនេះតាំងពីយូរមកហើយ។ តែយើងបានដឹងពីភាពស្មុគស្មាញនៃបញ្ហា ព្រោះលោក Sentsov មិនបានស្នើសុំឲ្យមានការដោះលែងតែត្រឹមខ្លួនលោកម្នាក់ឯងប៉ុណ្នោះទេ គាត់បានដាក់លក្ខខណ្ឌដោយទាមទារឲ្យមានការដោះលែងអ្នកទោសជនជាតិអ៊ុយក្រែនទាំងអស់ដែលកំពុងជាប់ក្នុងពន្ធនាគារលើទឹកដីរុស្ស៊ី។
ក្នុងករណីនេះ គេក៏អាចចោទសួរ និងដាក់លក្ខខណ្ឌដោយទាមទារឲ្យមានការដោះលែងអ្នកទោសជនជាតិរុស្ស៊ីទាំងអស់ដែលកំពុងជាប់ក្នុងពន្ធនាគារលើទឹកដីអ៊ុយក្រែនវិញដែរ។ ដូច្នេះ អ្វីដែលយុត្តិធម៌សម្រាប់ទាំងអស់គ្នា គឺការដោះលែងអ្នកទោសជនជាតិអ៊ុយក្រែន និងអ្នកទោសជនជាតិរុស្ស៊ីឲ្យត្រឡប់ទៅផ្ទះរៀងៗខ្លួនវិញ។ គេមិនអាចដោះស្រាយបញ្ហាមួយនេះជាលក្ខណៈឯកតោភាគីបានទេ ពោលត្រូវដោះស្រាយជាលក្ខណៈទ្វេភាគី។ គឺជាផ្លូវមួយដែលមានទៅ មានមក។
សម្រាប់ខ្ញុំក្នុងនាមជាទីប្រឹក្សារបស់លោកប្រធានាធិបតីរុស្ស៊ីពូទីនទទួលបន្ទុកសិទ្ធិមនុស្ស និងសង្គមស៊ីវិល យើងបានសម្លឹងមើល និងចាត់ទុកបញ្ហាមួយនេះក្នុងន័យមនុស្សធម៌ តែបញ្ហានៅត្រង់ថា មានអ្នកខ្លះបានសម្លឹងមើល និងចាត់ទុកជារឿងនយោបាយទៅវិញ។ ខ្ញុំដឹងថា នៅពេលបញ្ហាមួយបានបែកខ្ចរខ្ចាយខ្លាំងជារឿងនយោបាយហើយ នោះគេពិតជាពិបាកស្វែងរកដំណោះស្រាយខ្លាំងណាស់។
ក្នុងនាមជាទីប្រឹក្សារបស់លោកប្រធានាធិបតីរុស្ស៊ីពូទីនទទួលបន្ទុកសិទ្ធិមនុស្ស និងសង្គមស៊ីវិល យើងមានអំណាចត្រឹមផ្តល់យោបល់ និងដាក់សំណើ ហើយយើងនឹងបន្តធ្វើកិច្ចការនេះជាបន្តទៀត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ