បារាំងចង់មានយុទ្ធសាស្ត្រយោធាអវកាស ដើម្បីធានាអធិបតេយ្យជាតិ
បារាំងត្រូវតែពង្រឹងសមត្ថភាពផ្នែកអវកាស ដើម្បីអាចធានាអធិបតេយ្យជាតិរបស់ខ្លួន ! នេះបើតាមការអះអាងរបស់លោកស្រី Florence Parly រដ្ឋមន្ត្រីការពារជាតិបារាំង ដែលនឹងត្រូវបង្ហើបបង្ហាញ នៅថ្ងៃសុក្រទី ៧កញ្ញានេះ អំពីចំណុចគោលនៃយុទ្ធសាស្ត្រយោធាអវកាស នាពេលអនាគតរបស់បារាំង តាមសំណើរបស់លោកប្រធានាធិបតី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
“បច្ចុប្បន្ននេះ យើងត្រូវការការពារអវកាស ជាងពេលណាៗទាំងអស់ !” ត្រូវការដើម្បីធ្វើប្រតិបត្តិការ សង្កេតនិងតាមចាប់ពួកភេរវនិយម ត្រូវការដើម្បីប្រព័ន្ធទូរគមនាគមន៍ ទីតាំងភូមិសាស្ត្រ ត្រូវការដើម្បីជីវិតប្រចាំថ្ងៃ មិនថាសម្រាប់បម្រើបម្រាស់ទូរស័ព្ទជាលក្ខណៈឯកជន ឬបម្រើបម្រាស់បច្ចេកវិទ្យារបស់ក្រុមហ៊ុនទេ។ នេះជាសេចក្តីប្រកាសរបស់លោកស្រីរដ្ឋមន្ត្រីការពារជាតិបារាំង ទៅកាន់អ្នកសារព័ត៌មាន ដោយបញ្ជាក់ថា “ការពារអវកាស គឺធានាអធិបតេយ្យភាព ! គឺជាការឆក់ឱកាសសាងដៃគូជាមួយសម្ព័ន្ធមិត្តអឺរ៉ុប និងជាការពារជីវភាពនិងជីវិតប្រចាំថ្ងៃ របស់យើង!”
សម្រាប់លោកស្រីរដ្ឋមន្ត្រី អវកាសបានក្លាយជាសមរភូមិប្រឈមមុខដាក់គ្នាទៅហើយ ! ភាពប្រកួតប្រជែង និងទម្រង់នៃការបំពាក់អាវុធនៅលើអវកាស កំពុងតែសកម្មភាពខ្លាំងនិងប្រញឹកដូចអ្វីដែលយើងធ្លាប់ដឹងធ្លាប់មាននៅលើដី។
តាមសំណើរបស់ប្រធានាធិបតី លោកស្រី Florence Parly មានបន្ទុកទទួលរៀបចំយុទ្ធសាស្ត្រយោធាអវកាស ឱ្យបានរួចចប់សព្វគ្រប់នៅចុងឆ្នាំ។ ប៉ុន្តែលោកស្រីត្រូវចាប់បង្ហាញអំពីយុទ្ធសាស្ត្រ នៅថ្ងៃសុក្រនេះ នៅមជ្ឈមណ្ឌលសិក្សាស្រាវជ្រាវនិងការពារអវកាស។
សូមបញ្ជាក់ថា លោកប្រធានាធិបតីបារាំង អេម៉ាណុយអែល ម៉ាក្រុង បានបង្ហាញឆន្ទៈ ចង់កំណត់យុទ្ធសាស្ត្រយោធាបារាំង-អឺរ៉ុបក្នុងអវកាស កាលពីខែកក្កដា ព្រោះយល់ឃើញថា អវកាសបានក្លាយជាល្បែងល្បងសុវត្ថិភាពជាតិយ៉ាងពិតៗ និងបន្ទាប់ពី ប្រធានាធិបតីអាមេរិក ដូណាល់ ត្រាំ បានប្រកាសមហិច្ឆតាចង់បង្កើតឱ្យមានកងកម្លាំងទ័ពប្រចាំអវកាស ជាស្ថាប័នយោធាទី៦ ដាច់ដោយឡែកពីកងទ័ពអាកាសរបស់អាមេរិក នៅឆ្នាំ២០២០ ដើម្បីឱ្យធានាឧត្តមភាពអាមេរិកគ្រប់គ្រងអវកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ