របាយការណ៍ អ.ស.ប.៖ភាពអត់ឃ្លានកំពុងបន្តកើនឡើងនៅក្នុងពិភពលោក
នៅថ្ងៃអង្គារ ទី១១ កញ្ញា អង្គការស្បៀងអាហារ និងកសិកម្មពិភពលោក FAO បានចេញផ្សាយរបាយការណ៍ឆ្នាំ ២០១៨ ស្តីពីសន្តិសុខស្បៀងអាហារ និងអាហារូបត្ថម្ភក្នុងលោក។ របាយការណ៍បានបញ្ជាក់ច្បាស់ៗពីកំណើនភាពអត់ឃ្លាននៅក្នុងពិភពលោកក្នុងរយៈពេល ៣ឆ្នាំជាប់ៗគ្នា គឺឆ្នាំ ២០១៥ ២០១៦ និងឆ្នាំ ២០១៧ កន្លងទៅ។ តាមរបាយការណ៍របស់ FAO ដដែល ជម្លោះប្រដាប់អាវុធ និងការប្រែប្រួលអាកាសធាតុជាមូលហេតុចម្បងនៃកំណើនភាពអត់ឃ្លាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
តាមការប្រមើលមើលរបស់អង្គការស្បៀងអាហារ និងកសិកម្មពិភពលោកនៅក្នុងរបាយការណ៍ឆ្នាំ ២០១៨ មានមនុស្សប្រមាណជា ៨២១លាននាក់ក្នុងលោកកំពុងជួបប្រទះនឹងភាពអត់ឃ្លាន ពោលមាន ១នាក់ក្នុងចំណោម ៩នាក់។ សន្ទុះកំណើននៃភាពអត់ឃ្លានក្នុងលោកដែលបានកើតមានរយៈពេល ៣ឆ្នាំជាប់គ្នា គឺឆ្នាំ ២០១៥ ២០១៦ និងឆ្នាំ ២០១៧ ជាសក្ខីកម្មមួយដែលបញ្ជាក់ថា ការអនុវត្តលើកម្មវត្ថុគ្មានអ្នកអត់ឃ្លានម្នាក់សោះនៅឆ្នាំ ២០៣០ ហាក់ស្ថិតនៅឆ្ងាយសែនឆ្ងាយខ្លាំងណាស់។ គួររម្លឹកថាក្នុងឆ្នាំ ២០១៥ អង្គការសហប្រជាជាតិបានអនុម័តលើកម្មវត្ថុអភិវឌ្ឍន៍យូរអង្វែងដោយប្តេជ្ញាបំបាត់ភាពអត់ឃ្លានទាំងស្រុងពីពេលនេះដល់ឆ្នាំ ២០៣០។
តំបន់ដែលភាពអត់ឃ្លានកំពុងកើនខ្លាំងជាងគេ គឺនៅអាមេរិកខាងត្បូង និងតំបន់មួយចំនួនក្នុងទ្វីបអាហ្រ្វិក។ តាមរបាយការណ៍របស់អង្គការស្បៀងអាហារ និងកសិកម្មពិភពលោក មានមូលហេតុសំខាន់ចំនួន ៣ ដែលបញ្ជាក់ពីកំណើនភាពអត់ឃ្លានក្នុងលោក ទី១ បម្រែបម្រួលអាកាសធាតុដូចយ៉ាងភាពរាំងស្ងួត និងទឹកជំនន់ ទី២ ជម្លោះប្រដាប់អាវុធអូសបន្លាយ និងទី៣ វិបត្តិសេដ្ឋកិច្ច។ ក្នុងឆ្នាំ ២០១៧ កន្លងទៅ មានមនុស្សប្រមាណជា ១២៤លាននាក់នៅក្នុង ៥១ប្រទេសបានប្រ ឈមនឹងគ្រោះទុរ្ភិក្សដោយសារតែជម្លោះប្រដាប់អាវុធអូសបន្លាយ និងគ្រោះមហន្តរាយអាកាសធាតុ ដូចយ៉ាងប្រទេសយេម៉ែន សូម៉ាលី ស៊ូដង់ខាងត្បូង ឬប្រទេសអាហ្វហ្កានីស្ថានជាដើម។
នៅថ្ងៃចន្ទ ទី១០ កញ្ញា អង្គការ Save the Children បានព្រមានថា មានកូនក្មេងចំនួន ៦០០ ០០០ ដែលកំពុងស្ថិតក្នុងតំបន់សង្រ្គាមអាចនឹងស្លាប់ដោយគ្រោះអត់ឃ្លានពីពេលនេះដល់ដំណាច់ឆ្នាំ ២០១៨។ ក្រៅពីទាញសញ្ញាអាសន្នពីភាពអត់ឃ្លាន អង្គការស្បៀងអាហារ និងកសិកម្មពិភពលោកក៏បានចាប់អារម្មណ៍ពីភាពយឺតយ៉ាវនៃការលូតលាស់រាងកាយរបស់កុមារដោយសារតែកង្វះអាហារូបត្ថម្ភ និងអាហារគ្មានជីវជាតិ។ របាយការណ៍របស់អង្គការស្បៀងអាហារ និងកសិកម្មពិភពលោកឲ្យដឹងថាក្នុងឆ្នាំ ២០១៧ មានកុមារជិត ១៥១លាននាក់អាយុក្រោម ៥ឆ្នាំ មានមាឌតូចជ្រុលមិនសមនឹងអាយុរបស់ពួកគេ។ កុមារទាំងជិត ១៥១លាននាក់មាន ៣៩% នៅអាហ្រ្វិក និងមានដល់ទៅ ៥៥% នៅអាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ