អង្គការអ្នកកាសែតគ្មានព្រំដែនចង់បានសេចក្តីថ្លែងការណ៍អន្តរជាតិប្រឆាំងនឹងព័ត៌មានមិនពិត
ផ្តួចផ្តើមគំនិត និងបង្កើតដោយអង្គការអ្នកកាសែតគ្មានព្រំដែន គណៈកម្មការឯករាជ្យមួយ ដែលមានសមាជិកសុទ្ធជាអ្នកច្បាប់ ជ័យលាភីណូបែល ហើយនិងសកម្មជនការពារសិទ្ធិអ្នកប្រើប្រាស់អ៊ីនធ័រនែត បានចាប់ផ្តើមការងាររបស់ខ្លួនជាលើកដំបូង នៅថ្ងៃអង្គារនេះ នៅទីក្រុងប៉ារីស។ គោលដៅ គឺដើម្បី តាក់តែងសេចក្តីថ្លែងការណ៍អន្តរជាតិមួយ សម្រាប់ប្រយុទ្ធប្រឆាំងនឹងការផ្សព្វផ្សាយព័ត៌មានមិនពិត។
ចុះផ្សាយនៅថ្ងៃ៖ កែប្រែថ្ងៃទី៖
សម្រាប់អង្គការអ្នកកាសែតគ្មានព្រំដែន វាជាកិច្ចការបន្ទាន់មួយ ដែលគេត្រូវចងក្រងសេចក្តីថ្លែងការណ៍មួយ ស្តីពីព័ត៌មាន និងលទ្ធិប្រជាធិបតេយ្យ។ នៅក្នុងសេចក្តីប្រកាសព័ត៌មានរបស់ខ្លួននៅថ្ងៃអង្គារ អង្គការអ្នកកាសែតគ្មានព្រំដែន RSF បានលើកឡើងថា នៅក្នុងកាលៈទេសៈបច្ចុប្បន្ននេះ វិបត្តិនៃការអស់ជំនឿលើលទ្ធិប្រជាធិបតេយ្យ កំពុងរីកមុខធំ ជាមួយនឹងការកើនឡើងនៃរបបផ្តាច់ការ ដែលគ្រោះថ្នាក់ សម្រាប់សេរីភាព សន្តិភាព។ នៅពេលដែលខ្លឹមសារផ្សព្វផ្សាយ លាយឡំច្របូកចូលគ្នារវាងព័ត៌មាន និងការផ្សាយពាណិជ្ជកម្ម របបផ្តាច់ការមួយចំនួនបានផ្សព្វផ្សាយព័ត៌មានមិនពិត ទៅដល់ពលរដ្ឋរបស់ខ្លួន ដោយមិនភ្លេចចូលគ្រប់គ្រង ក្តោបក្តាប់យ៉ាងតឹងរ៉ឹងបណ្តាញផ្តល់ព័ត៌មានឯករាជ្យ។
គឺហេតុផលទាំងអស់នេះដែលជំរុញឲ្យអង្គការអ្នកកាសែតគ្មានព្រំដែនចាប់ផ្តើមគម្រោងស្តីពីកិច្ចព្រមព្រៀង អន្តរជាតិស្តីពីព័ត៌មាន ហើយនិងលទ្ធិប្រជាធិបតេយ្យ។ ទៅតាមការផ្តួចផ្តើម និងបង្កើតឡើងដោយអង្គការអ្នកកាសែតគ្មានព្រំដែន គណៈកម្មការឯករាជ្យ មានតួនាទី សរសេរចងក្រងសេចក្តីថ្លែងការណ៍មួយ ដែលមាននិយាយពីគោលការណ៍ ទិសដៅ ហើយនិងរបៀបគ្រប់គ្រងទាំងឡាយណា ដែលនឹងធានាឲ្យបាននូវ សិទ្ធិសេរីភាពរបស់បុគ្គលទៅតាមលទ្ធិប្រជាធិបតេយ្យ។
ទៅតាមការបញ្ជាក់របស់អង្គការអ្នកកាសែតគ្មានព្រំដែន គណៈកម្មការឯករាជ្យ មានសមាជិក២៥នាក់ (មកពីប្រទេសចំនួន ១៨) ដែលសុទ្ធសឹងជាបុគ្គលល្បីៗ ដូចជា ជ័យលាភីណូបែល សន្តិភាព ជ័យលាភីណូបែលសេដ្ឋកិច្ច សកម្មជនការពារសិទ្ធិមនុស្ស អ្នកនយោបាយ ហើយនិងអ្នកការពារសិទ្ធិអ្នកប្រើប្រាស់អ៊ីនធ័រនែតជាដើម។ គណៈកម្មការនេះ មានរយៈពេល២ខែ ដើម្បីបង្កើតសេចក្តីថ្លែងការណ៍មួយ ឲ្យបានមុនកិច្ចប្រជុំរបស់ប្រទេសជាង១០០នៅទីក្រុងប៉ារីស។ ជារួម អង្គការអ្នកកាសែតគ្មានព្រំដែនចង់ឆ្លៀតឱកាសដែលប៉ារីសរៀបចំពិធីរំលឹកខួប១០០ឆ្នាំ នៃការបិទបញ្ចប់សង្រ្គាមលោកលើកទី១ នៅខែវិច្ឆិកាខាងមុខ ដើម្បីស្វែងរកការគំាទ្រសេចក្តីថ្លែងការណ៍ និងដើម្បី ឲ្យប្រទេសដែលមានវត្តមាននៅក្រុងប៉ារីស ចូលរួមនៅក្នុងកិច្ចព្រមព្រៀងសកលមួយ ដើម្បីព័ត៌មាន និងប្រជាធិបតេយ្យ។
ក្រៅតែពីការចូលរួមរបស់រដ្ឋាភិបាល និងសង្គមស៊ីវិល សេចក្តីថ្លែងការណ៍ស្តីពីព័ត៌មាន និងលទ្ធិប្រជាធិបតេយ្យសំដៅផងដែរ ការចូលរួមរបស់ក្រុមហ៊ុនឯកជន ដែលវិនិយោគធ្វើជំនួញ លើអ៊ីនធ័រនែត និងបណ្តាញសង្គមធំៗ ដែលដើរតួនាទីកាន់តែសំខាន់ៗ នៅក្នុងការចែកចាយ ផ្សព្វផ្សាយព័ត៌មាន នៅក្នុងជីវិតប្រចាំថ្ងៃ សព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ