ស៊ីរី៖រុស្ស៊ី និងតួកគីបានព្រមព្រៀងគ្នាបង្កើតតំបន់គ្មានកងទ័ពមួយក្នុងទីក្រុងអ៊ីដឡិប
នៅរសៀលថ្ងៃចន្ទ ទី១៧ កញ្ញា ប្រទេសរុស្ស៊ី និងប្រទេសតួកគីបានព្រមព្រៀងគ្នាបង្កើតឲ្យមានតំបន់គ្មានកងទ័ពមួយនៅក្នុងទីក្រុងអ៊ីដឡីប ប្រទេសស៊ីរី។ ការបង្កើតឲ្យមានតំបន់មួយនេះបានធ្លាក់មក ខណៈដែលទីក្រុងអ៊ីដឡិបកំពុងស្ថិតក្រោមការព្រមានវាយប្រហារពីកម្លាំងទ័ពរដ្ឋាភិបាលស៊ីរីដោយមានជំនួយពីកងទ័ពរុស្ស៊ី។ គួររម្លឹកជូនថា ទីក្រុងដែលមានពលរដ្ឋស៊ីរីរស់នៅជាង ៣លាននាក់មួយនេះកំពុងស្ថិតក្រោមការកាន់កាប់របស់ពួកឧទ្ទាម និងពួកជីហាត។ ប្រទេសអ៊ីរ៉ង់ និងស៊ីរីបានចេញមុខថ្លែងសាទរលើកិច្ចព្រមព្រៀងរវាងរុស្ស៊ី និងតួកគីពេលនេះ។
ចុះផ្សាយនៅថ្ងៃ៖
ស្តាប់ - ០២:១៦
ទំរាំតែព្រមព្រៀងគ្នាបង្កើតឲ្យមានតំបន់គ្មានកងទ័ពមួយនៅក្នុងទីក្រុងអ៊ីដឡិប ប្រទេសស៊ីរី ភាគីរុស្ស៊ី និងតួកគីបានចំណាយពេលជជែកគ្នាមួយទល់មួយអស់រយៈពេល ៤ម៉ោង។ គឺជាតំបន់មួយដែលមានបណ្តោយពី ១៥ ទៅ ២០គីឡូម៉ែត្រនៅតាមខ្សែបន្ទាត់ខ័ណ្ឌចែករវាងទីតាំងរបស់កម្លាំងឧទ្ទាម និងទីតាំងរបស់កម្លាំងរដ្ឋាភិបាលស៊ីរី។ ផ្អែកតាមកិច្ចព្រមព្រៀង អាវុធធុនធ្ងន់គ្រប់ប្រភេទ និងគ្រប់កម្លាំងជ្រុលនិយមនឹងត្រូវដកចេញពីតំបន់គ្មានកងទ័ពនោះ។ បន្ទាប់មក តំបន់មួយនេះនឹងដាក់ឲ្យនៅក្រោមការត្រួតពិនិត្យរួមគ្នារវាងកម្លាំងទាហានតួកគី និងរុស្ស៊ី។
ការបង្កើតឲ្យមានតំបន់គ្មានកងទ័ពក្នុងទីក្រុងអ៊ីដឡិបពេលនេះត្រូវបានគ្រប់គ្នាសង្ឃឹមថា នឹងអាចបញ្ជៀសពីការព្រមានវាយប្រហារក្រោមទ្រង់ទ្រាយធំពីសំណាក់ទ័ពរដ្ឋាភិបាលស៊ីរី និងរុស្ស៊ី ដោយមានការគាំទ្រពីប្រទេសអ៊ីរ៉ង់។ តែនេះមិនមែនមានន័យថា រដ្ឋាភិបាលស៊ីរីសុខចិត្តបន្តទុកទីក្រុងមួយនេះរបស់ខ្លួនឲ្យស្ថិតក្នុងដៃរបស់ពួកឧទ្ទាមនោះទេ។ សូមជម្រាបជូនថា អស់រយៈពេលជាច្រើនសប្តាហ៍មកហើយដែលរដ្ឋាភិបាលស៊ីរីត្រៀមជើងព្រួលវាយប្រហាររំដោះទីក្រុងអ៊ីដឡិបដែលជាទីតាំងធំចុងក្រោយរបស់ពួកឧទ្ទាម និងពួកជីហាត។ អ្វីដែលសហគមន៍អន្តរជាតិបានសម្តែងក្តីបារម្ភខ្លាំង គឺសោកនាដកម្មមនុស្សធម៌លើពលរដ្ឋស៊ីរីជាង ៣លាននាក់ដែលកំពុងរស់នៅក្នុងទីក្រុងអ៊ីដឡិប។
នៅថ្ងៃអង្គារ ទី១៨ កញ្ញា រដ្ឋាភិបាលស៊ីរីបានថ្លែងសាទរពីការបង្កើតឲ្យមានតំបន់គ្មានកងទ័ពក្នុងទីក្រុងអ៊ីដឡិប តែបានប្តេជ្ញាថា ខ្លួនមិនបោះបង់សង្រ្គាមប្រឆាំងនឹងភេរវនិយមដើម្បីរំដោះទឹកដីពីកណ្តាប់ដៃពួកឧទ្ទាមទេ។ ចំណែកប្រទេសអ៊ីរ៉ង់តាមរយៈប្រមុខការទូតបានចាត់ទុកកិច្ចព្រមព្រៀងបង្កើតតំបន់គ្មានកងទ័ពនៅអ៊ីដឡិបរវាងរុស្ស៊ី និងតួកគីពេលនេះថា ជាឧទាហរណ៍ការទូតដែលមានការទទួលខុសត្រូវ។ នៅចំពោះមុខ
វត្តមានតំបន់គ្មានកងទ័ពនៅអ៊ីដឡិបជាជោគជ័យមួយសម្រាប់រុស្ស៊ី និងតួកគី ពិសេសតួកគីដែលបារម្ភខ្លាំងពីលំហូរជនភៀសខ្លួនស៊ីរីបន្ថែមទៅកាន់ទឹកដីខ្លួនក្នុងករណីណាដែលទីក្រុងអ៊ីដឡិបរងការវាយប្រហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ