យន្តហោះយោធារុស្ស៊ីត្រូវមីស៊ីលស៊ីរីបាញ់ធ្លាក់ ម៉ូស្គូទម្លាក់ការទទួលខុសត្រូវលើអ៊ីស្រាអែល
យន្តហោះយោធារុស្ស៊ី ដឹកទាហាន១៥នាក់ បានបាត់ពីបណ្តាញរ៉ាដា កាលពីយប់ថ្ងៃចន្ទ ដោយសារស្នាដៃរបស់កងទ័ពអាកាសស៊ីរី។ នេះបើតាមសេចក្តីប្រកាសរបស់ក្រសួងការពារជាតិរុស្ស៊ី ដោយទម្លាក់កំហុសទៅលើអ៊ីស្រាអែលថាមានទំនួលខុសត្រូវចំពោះបញ្ហានេះ។ ព្រោះអ៊ីស្រាអែលបានធ្វើការវាយប្រហារដោយមីស៊ីលទៅស៊ីរី។ មូស្គូបានថែមទាំងព្រមានសងសឹកអ៊ីស្រាអែលផង។
ចុះផ្សាយនៅថ្ងៃ៖ កែប្រែថ្ងៃទី៖
យន្តហោះរុស្ស៊ី ប្រភេទ Il-20 មានផ្ទុកទាហាន១៥នាក់ត្រូវបានកម្ចាត់ដោយប្រព័ន្ធខែលមីស៊ីលS-២០០នៃកងយោធាអាកាសស៊ីរី កាលពីថ្ងៃចន្ទ នៅវេលាម៉ោង៧យប់ម៉ោងសកល ពេលកំពុងហោះហើរត្រួតសភាពការណ៍លើផ្ទៃសមុទ្ទមេឌីទែរ៉ាណេ និងបន្ទាប់ពីបានហោះចេញពីបន្ទាយនៅប្រទេសស៊ីរីបានប្រមាណ៣៥គីឡូម៉ែត្រ។ នេះបើតាមសេចក្តីប្រកាសរបស់ក្រសួងការពារជាតិរុស្ស៊ី។
ប៉ុន្តែសម្រាប់រុស្ស៊ី គ្រោះថ្នាក់នេះ បណ្តាលមកពីភាគីអ៊ីស្រាអែល ដែលដឹកនាំធ្វើប្រតិបត្តិការវាយប្រហារមីស៊ីលលើទីតាំងរបស់ប្រធានាធិបតីស៊ីរី នៅLattaquié ដោយគ្មានជូនដំណឹងប្រាប់រុស្ស៊ីជាមុន។ បើតាមសំដីរបស់អ្នកនាំពាក្យ មេបញ្ជាការអ៊ីស្រាអែល បានប្រកាសប្រាប់មូស្គូ តែមួយនាទីមុនចេញធ្វើប្រតិបត្តិការប៉ុណ្ណោះ ទើបរុស្ស៊ីមិនអាចនាំយន្តហោះរបស់ខ្លួនមកកាន់ទីមានសុវត្ថិភាពទាន់។ ជាងនេះទៅទៀត រុស្ស៊ីបានចោទប្រកាន់ ទាហានបើកយន្តហោះចម្បាំងF-16អ៊ីស្រាអែល ថាបានប្រព្រឹត្តទង្វើនាំគ្រោះថ្នាក់ ដល់យន្តហោះរុស្ស៊ី ដោយចេតនា និងដោយបង្វែងការចាប់សញ្ញា ឱ្យទាហានការពារអាកាសស៊ីរីច្រលំ យន្តហោះស្មានថាជាយន្តហោះចម្បាំងរបស់អ៊ីស្រាអែលដែលហោះទៅទម្លាក់គ្រាប់លើបន្ទាយស្តុកស្បៀងរបស់រដ្ឋាភិបាលស៊ីរី។
ប្រតិបត្តិការស្វែងរកយន្តហោះកំពុងបន្ត ! នេះបើតាមប្រភពយោធារុស្ស៊ីដដែល ប៉ុន្តែ រុស្ស៊ី សូមព្រមាន និងរក្សាសិទ្ធិវាយប្រហារតបលើអ៊ីស្រាអែលវិញឱ្យសក្តិសម។ ក្រសួងការបរទេសរុស្ស៊ីក៏បានកោះហៅឯកអគ្គរដ្ឋទូតអ៊ីស្រាអែលមកបំភ្លឺស្ថានការណ៍។
នេះជាហេតុការណ៍គ្រោះថ្នាក់ដ៏ធ្ងន់ធ្ងរបំផុត ពុំធ្លាប់កើតមានឡើយគិតចាប់តាំងពីសម្ព័ន្ធមិត្តទាំងពីរស៊ីរីនិងរុស្ស៊ីចាប់ដៃគ្នាធ្វើអន្តរាគមន៍យោធា នៅឆ្នាំ២០១៥មក។ ឧប្បត្តិហេតុនេះក៏ធ្លាក់មកជួនចំពេលដែលតួកគីនិងរុស្ស៊ី ទើបរកឃើញកិច្ចព្រមព្រៀងដាក់ខេត្តអ៊ីឡិប Idlep ជម្រុកដ៏ធំចុងក្រោយរបស់ពួកឧទ្ទាមស៊ីរី ជាតំបន់គ្មានកងទ័ព ក្រោមការត្រួតត្រារបស់តួកគីនិងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ