អ.ស.ប. ពន្យារពេល១ឆ្នាំថែមទៀតបេសកកម្មការស៊ើបអង្កេតនៅលើការរំលោភសិទ្ធមនុស្សនៅយេម៉ែន
ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ បានអនុម័តសេចក្តីសម្រេចមួយនៅថ្ងៃសុក្រម្សិលមិញ អនុញ្ញាតដល់ការពន្យារពេលចំនួន១ឆ្នាំថែមទៀតនៅលើបេសកកម្មការស៊ើបអង្កេតរបស់អសប ស្តីពីការរំលោភសិទ្ធមនុស្សសិទ្ធិមនុស្ស នៅប្រទេសយេម៉ែន ទោះបីជាមានការប្រឆាំងជំទាស់ពីរដ្ឋាភិបាលយេម៉ែននិងអារ៉ាប៊ីសាអ៊ូឌីតក្តី អារ៉ាប៊ីសាអ៊ូឌីតដែលដឹកនាំប្រតិបត្តិការតាមជើងអាកាសនៅក្នុងប្រទេសយេម៉ែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
សេចក្តីសម្រេចដែលត្រូវបានអនុម័តដោយក្រុមប្រឹក្សាសិទ្ធិមនុស្សដើម្បីពន្យារ ពេល ១ឆ្នាំថែមទៀតដើម្បីស៊ើបអង្កេតនៅលើការចោទប្រកាន់ពីអំពើឧក្រិដ្ឋកម្មនៅក្នុងប្រទេសយេម៉ែន ត្រូវបានស្នើឡើងដោយប្រទេសបែលហ្សិក កាណាដា អៀរឡង់ លុចសមបួរ ក៏ព្រមទាំងប្រទេសហូឡង់ និង គាំទ្រដោយសហភាពអឺរ៉ុប ត្រូវបានអនុម័តដោយ ២១សម្លេង ក្នុងចំណោម ៤៧ប្រទេសដែលមានអសនៈនៅក្រុមប្រឹក្សាសិទ្ធិមនុស្សរបស់អ.ស.ប.នាបច្ចុប្បន្ន។ ចំណែកប្រទេសចំនួន៨ទៀត បានបោះឆ្នោតប្រឆាំង។
ក្រុមអ្នកគាំទ្រឧបត្ថម្ភលើអត្ថបទនៃសេចក្តីសម្រេចនេះ បានជជែកតវ៉ាថា ក្រុមអ្នកជំនាញដែលទទួលអាណត្តិកាលពីឆ្នាំមុនដើម្បីធ្វើការស៊ើបអង្កេតនៅលើការរំលោភបំពានសិទ្ធិមនុស្សនៅក្នុងប្រទេសយេម៉ែន នៅពុំទាន់បានបញ្ចប់បេសកកម្មការងាររបស់ខ្លួននៅឡើយទេ។
ចំណែកក្រុមប្រទេសដែលជាអ្នកជំទាស់នឹងសេចក្តីសម្រេចរបស់ក្រុមប្រឹក្សាសិទ្ធិមនុស្ស បាន ធ្វើការវិះគន់ថា ការពន្យារពេលនៃការស៊ើបអង្កេតរបស់អង្គការសហប្រជាជាតិនៅក្នុងប្រទេសយេម៉ែន រិតតែជម្រុញឲ្យ វិបត្តិនៅក្នុងប្រទេសនេះ កាន់តែធ្លាក់ចុះដុនដាបនិងបង្កើនអស្ថិរភាពកាន់តែខ្លាំងថែមទៀតនៅក្នុងប្រទេសយេម៉ែន។
គួររំលឹកថា នៅក្នុងរបាយការណ៍មួយដែលបានចេញផ្សាយកាលពីខែមុននេះក្រុមបេសសកម្មរបស់អង្គការសហប្រជាជាតិ បានវាយតម្លៃថា ប្រតិបត្តិការទម្លាក់គ្រាប់បែកតាមអាកាសរបស់កងកម្លាំងសម្ព័ន្ធអារ៉ាប ដឹកនាំដោយអារ៉ាប៊ី សាអូឌីត តាំងពីឆ្នាំ ២០១៥មក បានបង្កឲ្យមានការបាត់បង់អាយុជីវិតរបស់ប្រជាជនស៊ីវីលយេម៉ែនយ៉ាងច្រើនសម្បើម ដោយហេតុថា អន្តរាគមន៍តាមអាកាសនោះ បានតម្រង់ចំទៅលើតំបន់ដែលមានប្រជាជនស៊ីវីលរស់នៅ ឬក៏ទៅលើ ទីផ្សារ ឬ ក៏ ទីកន្លែងដែលមានការរៀបចំពិធីមង្គលការជាដើម។
យោងតាមរបាយការណ៍ដដែល ទង្វើទាំងអស់នេះ អាចចាត់ទុកបានថា មានលក្ខណៈជាអំពើឧក្រឹដ្ឋកម្មសង្គ្រាម តែការចោទប្រកាន់ទាំងនេះ ត្រូវបាន ទីក្រុងរីយ៉ាដធ្វើការបដិសេធយ៉ាងដាច់អហង្ការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ