បោះឆ្នោតប្រជាមតិម៉ាសេដ្វាន៖សហគមន៍អន្តរជាតិសាទរ និងអំពាវនាវឲ្យគោរពឆន្ទៈរបស់ពលរដ្ឋ
នៅថ្ងៃអាទិត្យ ទី៣០ កញ្ញា ប្រទេសម៉ាសេដ្វានបានរៀបចំបោះឆ្នោតប្រជាមតិស្តីពីការដូរឈ្មោះប្រទេសពី « សាធារណរដ្ឋម៉ាសេដ្វាន » ទៅ « សាធារណរដ្ឋម៉ាសេដ្វានខាងជើង »។ លទ្ធផលផ្លូវការឲ្យដឹងថា អ្នកចូលរួមបោះឆ្នោតចំនួន ៩១,៤៨% បានបោះឆ្នោតឲ្យមានការប្តូរឈ្មោះប្រទេសទល់នឹងអ្នកមិនយល់ព្រមដែលមាន ៥,៦៤%។ តែបញ្ហានៅត្រង់ថា ចំនួនអ្នកមិនទៅបោះឆ្នោតមានអត្រាខ្ពស់ ព្រោះក្នុងចំណោមអ្នកចុះឈ្មោះបោះឆ្នោតចំនួន ១,៨លាននាក់ មានជិត ២ភាគ៣មិនបានចេញទៅបោះឆ្នោតទេ។ អត្រាអ្នកទៅបោះឆ្នោតតិចតួចនេះកំពុងបង្កឲ្យមានសង្រ្គាមពាក្យសម្តីយ៉ាងផុសផុលរវាងរដ្ឋាភិបាល និងក្រុមប្រឆាំងស្តីពីសុពលភាពនៃការបោះឆ្នោត។
ចុះផ្សាយនៅថ្ងៃ៖
ស្តាប់ - ០២:០៤
ក្រោយពីលទ្ធផលដែលបានបញ្ជាក់យ៉ាងច្បាស់ពីឆន្ទៈរបស់ពលរដ្ឋដែលចង់ឲ្យមានការប្តូរឈ្មោះប្រទេសពី « សាធារណរដ្ឋម៉ាសេដ្វាន » ទៅជា « សាធារណរដ្ឋម៉ាសេដ្វានខាងជើង » វិញមក បាល់កំពុងស្ថិតក្នុងសភាដែលត្រូវសម្រេចបោះឆ្នោតទទួលយក ឬមិនទទួលយកលទ្ធផលនោះ។ នៅក្នុងន័យនេះ រដ្ឋាភិបាលរបស់លោក Zoran Zaev ត្រូវស្វែងរកការគាំទ្រពីគណបក្សផ្សេងក្នុងសភាដើម្បីទទួលបានសម្លេងគាំទ្រចំនួន ២ភាគ៣។ តែអ្វីដែលគេកំពុងសម្លឹងឃើញនៅចំពោះមុខ គឺសង្រ្គាមពាក្យសម្តីរវាងលោក Zoran Zaev និងក្រុមបក្សប្រឆាំង។
ក្រុមបក្សប្រឆាំងបានច្រានចោលលទ្ធផលបោះឆ្នោតដោយសំអាងលើរដ្ឋធម្មនុញ្ញដែលចែងថា លទ្ធផលបោះឆ្នោតដែលអាចទទួលយកបាន លុះត្រាណាតែមានអ្នកចូលរួមបោះឆ្នោតចំនួន ៥០%។ តែនៅក្នុងការបោះឆ្នោតប្រជាមតិនេះ មានអ្នកចូលរួមតែពី ២០ ទៅ ២៥% ប៉ុណ្ណោះ។ ចំណែកនៅខាងរដ្ឋាភិបាលវិញ លោកនាយករដ្ឋមន្រ្តី Zoran Zaev បានឆ្លើយបកវិញថា ការបោះឆ្នោតប្រជាមតិ ជានីតិវិធីសួរយោបល់ដែលមិនចាំបាច់ឲ្យមានកម្រិតនៃអត្រាអ្នកចូលរួមដូចរដ្ឋធម្មនុញ្ញបានតម្រូវនោះទេ។
យ៉ាងណាក៏ដោយ សហគមន៍អន្តរជាតិ ពិសេសសហភាពអឺរ៉ុប និងអាមេរិកបានរម្លឹក និងអំពាវនាវជាថ្មីដល់ថ្នាក់ដឹកនាំម៉ាសេដ្វានគ្រប់ជាន់ថ្នាក់ និងគ្រប់និន្នាការឲ្យគោរពឆន្ទៈរបស់ពលរដ្ឋ និងថា ពួកគេគ្មានជម្រើសអ្វីផ្សេងក្រៅពីទទួលយកលទ្ធផលបោះឆ្នោតប្រជាមតិនោះទេ។ គួររម្លឹកជូនថា អស់ជាច្រើនទសវត្សមកហើយដែលប្រទេសម៉ាសេដ្វាន និងប្រទេសក្រិកបានប្រឈមមុខគ្នាក្នុងរឿងប្រើឈ្មោះ « ម៉ាសេដ្វាន »។ បន្ទាប់មកក្នុងខែមិថុនាកន្លងទៅ លោកនាយករដ្ឋមន្រ្តីម៉ាសេដ្វាន Zoran Zaev និងសមភាគីក្រិកលោក Alexis Tsipras បានចុះហត្ថលេខាលើកិច្ចព្រមព្រៀងមួយដោយគ្រោងប្តូរពី « សាធារណរដ្ឋម៉ាសេដ្វាន » ទៅជា « សាធារណរដ្ឋម៉ាសេដ្វានខាងជើង » វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ