ហេតុអ្វីបានអាមេរិកដកខ្លួនចេញពីសន្ធិសញ្ញាស្តីពីអាវុធនុយក្លេអ៊ែរជាមួយរុស្ស៊ី
ចុះផ្សាយនៅថ្ងៃ៖
ស្តាប់ - ០៦:៥៨
ប្រធានាធិបតីអាមេរិក លោកដូណាល់ ត្រាំ នៅថ្ងៃសៅរ៍ម្សិលមិញបានប្រកាសដកអាមេរិក ចេញពីសន្ធិសញ្ញាស្តីពីអាវុធនុយក្លេអ៊ែរ ដែលអាមេរិក និងសហភាពសូវៀតបានចុះហត្ថលេខារួមគ្នា កាលពី៣៩ឆ្នាំមុន។ អាមេរិកធ្លាប់បានចោទប្រកាន់រុស្ស៊ី រហូតមកថា បានរំលោភសន្ធិសញ្ញាដោយបានល្មើស ផលិតមីស៊ីលបាញ់ក្នុងរយៈចម្ងាយមធ្យម ដែលជាគ្រោះថ្នាក់ គំរាមកំហែងសន្តិសុខរបស់ប្រទេសនៅអឺរ៉ុបខាងលិច។
លោកប្រធានាធិបតីដូណាល់ ត្រាំ នៅថ្ងៃសៅរ៍ ម្សិលមិញ បានប្រកាសដកអាមេរិកចេញពីសន្ធិសញ្ញាស្តីពីអាវុធនុយក្លេអ៊ែរ រយៈចម្ងាយមធ្យម ក្នុងហេតុផលថា រុស្ស៊ីបានរំលោភ កិច្ចព្រមព្រៀង តាមរយៈការលួចផលិតមីស៊ីលបាញ់បានចម្ងាយមធ្យម ដែលអគ្គលេខាធិការរបស់អង្គការអូតង់ឲ្យឈ្មោះថា SSC -8។
នៅឆ្នាំ ២០១៧ កាសែតNew York Times ធ្លាប់បានចុះផ្សាយថា រុស្ស៊ីបានធ្វើតេស្តបាញ់សាកល្បងបានសម្រេច មីស៊ីល ដែលតាមពិត ត្រូវហាមប្រាមដោយសន្ធិសញ្ញា ស្តីពីអាវុធនុយក្លេអ៊ែររយៈចម្ងាយមធ្យមនេះ។ តាមកាសែត ដែលបានដកស្រង់សំដីមន្រ្តីស៊ើបការណ៍សម្ងាត់អាមេរិក រុស្ស៊ីនៅ បានពង្រាយមីស៊ីលដែលអាចបាញ់បានរយៈចម្ងាយមធ្យម នៅក្នុងទឹកដី ប្រទេសអឺរ៉ុបណាមួយ ដែលជាសម្ព័ន្ធមិត្តរបស់រុស្ស៊ី។
ការប្រកាសរបស់លោកដូណាល់ ត្រាំ ដកអាមេរិកចេញពីសន្ធិសញ្ញា ធ្វើឡើង នៅចំពេលដែលទីប្រឹក្សាផ្នែកសន្តិសុខជាតិរបស់លោកដូណាល់ ត្រាំ គឺលោក ចន បុលតុន ត្រូវបំពេញទស្សនកិច្ចនៅទីក្រុងម៉ូស្គូ។ គេជឿថា គឺ លោកចន បុលតុននេះម្តង ដែលជាជំរុញឲ្យលោកដូណាល់ ត្រាំ ដកអាមេរិកចេញពីកិច្ចព្រមព្រៀងនុយក្លេអ៊ែរជាមួយរុស្ស៊ី។
អនុរដ្ឋមន្រ្តីការបទេសរុស្ស៊ីលោក Sergueï Riabkov បានចាត់ទុកការប្រកាសដកខ្លួនអាមេរិកចេញពីសន្ធិសញ្ញាស្តីពីនុយក្លេអ៊ែរ រយៈចម្ងាយមធ្យម នេះថា ជាយុទ្ធសាស្រ្តដាក់គំនាបរបស់អាមេរិក ក្នុងពេលចរចា ជាមួយរុស្ស៊ី។ ប៉ុន្តែ លោកបានបញ្ជាក់ថា រុស្ស៊ីវិញ គឺមិនចុះចាញ់ការសម្លុតគំរាមកំហែងរបស់អាមេរិកនោះ។
សន្ធិសញ្ញាស្តីពីអាវុធនុយក្លេអ៊ែររយៈចម្ងាយមធ្យម ជាសន្ធិសញ្ញាទ្វេភាគី អាមេរិក និងរុស្ស៊ី ដែលត្រូវបានចុះហត្ថលេខាដោយប្រធានាធិបតីអាមេរិក លោកRonald Reagan និងមេដឹកនាំសហភាពសូវៀត លោកMikhaïl Gorbatchev កាលពីឆ្នាំ ១៩៨៧។ សន្ធិសញ្ញានេះមួយបានជួយបិទបញ្ចប់ភាពតានតឹង ការប្រឈមមុខដាក់គ្នា ខាងផ្នែកយោធា របស់ភាគីទាំងពីរ ក្នុងសម័យសង្រ្គាមត្រជាក់ និងបានជួយទប់ស្កាត់ មិនឲ្យមានការពង្រាយមីស៊ីលរបស់សហភាពសូវៀត ដែលមានផ្ទុកក្បាលគ្រាប់នុយក្លេអ៊ែរ បែរសំដៅ រដ្ឋធានីរបស់អឺរ៉ុប នៅទសវត្សរ៍ ឆ្នាំ ១៩៨០។
សន្ធិសញ្ញាស្តីពីអាវុធនុយក្លេអ៊ែរ រយៈចម្ងាយមធ្យម មានគោលដៅហាមមិនឲ្យភាគីអាមេរិក និងរុស្ស៊ី ផលិត ប្រើ មីស៊ីល ទាំងឡាយណា ដែលអាចបាញ់បានក្នុងចម្ងាយ ចាប់ពី ៥០០ទៅ ៥០០០គីឡូម៉ែត្រ ពោលគឺមិនថា មីស៊ីលដែលអាចផ្ទុកក្បាលគ្រាប់នុយក្លេអ៊ែរ ឬមីស៊ីលសម្រាប់ធ្វើសង្រ្គាម នោះទេ។ តាំងពីសន្ធិសញ្ញា បានចូលជាធរមាន នៅឆ្នាំ ១៩៨៨ រហូតមកដល់ឆ្នាំ ១៩៩១ ភាគីហត្ថលេខីទាំងពីរ បានបំផ្លាញ មីស៊ីលបាញ់បានចម្ងាយមធ្យម របស់ខ្លួន ប្រមាណ ២៧០០ដើម ដែលនៅក្នុងនោះ មាន ១៧០០ដើមជារបស់ភាគីរុស្ស៊ី។
នៅឆ្នាំ ២០១៤ លោកប្រធានាធិបតីអូបាម៉ាធ្លាប់បានគំរាមដកអាមេរិកចេញពីសន្ធិសញ្ញា ម្តងហើយដែរ ប៉ុន្តែ ដោយសារតែប្រទេសសម្ព័ន្ធមិត្តអឺរ៉ុប ទាមទារខ្លាំងពេក លោកអូបាម៉ាក៏បានបន្ធូបន្ថយមកវិញ និងបានទាមទារឲ្យរុស្ស៊ី បញ្ឈប់ជាបន្ទាន់ការផលិតមីស៊ីលបាញ់បានរយៈចម្ងាយមធ្យម។ ភាគីអឺរ៉ុប កាលណោះ បានអះអាងថា ការដកខ្លួនរបស់អាមេរិកចេញពីសន្ធិសញ្ញានុយក្លេអ៊ែរជាមួយរុស្ស៊ី នឹងរឹតតែជំរុញឲ្យមានការប្រកួតប្រជែងសព្វាវុធនុយក្លេអ៊ែរកាន់តែខ្លាំង ហើយកាន់តែគ្រោះថ្នាក់សម្រាប់ពិភពលោក។
អាមេរិកដកខ្លួនចេញពីសន្ធិសញ្ញា ដើម្បីកុំឲ្យចាញ់ចិន
អ្នកវិភាគមួយចំនួនវាយតម្លៃថា រដ្ឋបាលលោកដូណាល់ ត្រាំ ដឹងហើយថា រុស្ស៊ី បានលួចផលិតមីស៊ីលចម្ងាយមធ្យម បានសម្រេចតាំងពីយូរហើយ។ ប៉ុន្តែ លោកដូណាល់ ត្រាំ បានសម្រេចដកអាមេរិកចេញពីសន្ធិសញ្ញាស្តីពី អាវុធនុយក្លេអ៊ែរចម្ងាយមធ្យម នៅពេលនេះ គឺមិនមែនដោយសារតែរុស្ស៊ីនោះទេ ប៉ុន្តែ គឺដោយសារតែចិនទៅវិញទេ។ ចិនដែលមិនត្រូវបានចងដៃ ដោយសន្ធិសញ្ញាស្តីពីនុយក្លេអ៊ែរ ចម្ងាយមធ្យម បានបង្កើនការផលិតមីស៊ីលបាញ់រយៈចម្ងាយមធ្យម កាន់តែច្រើន និងបានបែរតម្រង់រួចហើយ សម្រាប់ទីតាំងយោធាយុទ្ធសាស្រ្តរបស់អាមេរិក នៅតំបន់អាស៊ី ប៉ាស៊ីហ្វិក។
សូមអាន៖លោកដូណាល់ ត្រាំចង់ឲ្យសព្វាវុធនុយក្លេអ៊ែរអាមេរិក នាំមុខគេ
សម្រាប់អ្នកវិភាគមួយចំនួន រុស្ស៊ីបានផលិតមីស៊ីលចម្ងាយមធ្យម ដោយរំលោភកិច្ចព្រមព្រៀងជាមួយអាមេរិក ក៏ដោយសារតែរុស្ស៊ី ឃើញចិនអាចផលិតបានដោយសេរី មីស៊ីល ដែលអាចគ្រោះថ្នាក់ផងដែរ សម្រាប់សន្តិសុខរបស់រុស្ស៊ី តំបន់ជាប់ជាមួយប្រទេសចិននោះ
រុស្ស៊ី៖ ការដកខ្លួនរបស់អាមេរិកគឺជាជំហានដ៏គ្រោះថ្នាក់
សម្រាប់អនុរដ្ឋមន្រ្តីការបរទេសរុស្ស៊ី ការដកខ្លួនអាមេរិកចេញពីសន្ធិសញ្ញា នុយក្លេអ៊ែរជាមួយ រុស្ស៊ីគឺជាជំហានមួយដ៏គ្រោះថ្នាក់។ សម្រាប់មន្រ្តីរុស្ស៊ី រុស្ស៊ីបានគោរពយ៉ាងទៀងទាត់ ពោល គឺមិនបានរំលោភសន្ធិសញ្ញាដូចការចោទប្រកាន់នោះទេ។ ប៉ុន្តែ គឺភាគីអាមេរិកទេ ដែលបានរំលោភកិច្ចព្រមព្រៀង កន្លងមក តាមរយៈការផលិតមីស៊ីលរយៈចម្ងាយមធ្យម សម្រាប់ធ្វើជាខែលមីស៊ីល និងដាក់ពង្រាយ នៅក្នុងប្រទេសអឺរ៉ុប ដូចជានៅប៉ូឡូញ ដែលអាចគំរាមគ្រប់ពេលវេលា សន្តិសុខរុស្ស៊ី។
សម្រាប់សមាជិកព្រឹទ្ធសភារុស្ស៊ី អាមេរិកដកខ្លួនចេញពីសន្ធិសញ្ញាស្តីពីអាវុធនុយក្លេអ៊ែររយៈចម្ងាយមធ្យម គឺស្តែងឲ្យឃើញពីចេតនាធំទី ២របស់អាមេរិកដែលចង់គំរាមកំហែងស្ថិរភាពពិភពលោក។ នៅឆ្នាំ ២០០១ អាមេរិករបស់លោកប្រធានាធិបតីប៊ូសធ្លាប់បានដកអាមេរិកចេញពីសន្ធិសញ្ញាដែលហាមឃាត់ការផលិតមីស៊ីល ប្រឆាំងមីស៊ីលអន្តរទ្វីប ឬដែលគេហៅឈ្មោះម្យ៉ាងថា ប្រព័ន្ធខែលមីស៊ីល។
អាមេរិកដកខ្លួនចេញពីសន្ធិសញ្ញា ដើម្បី អាចផលិតមីស៊ីល?
ការប្រកាសដកខ្លួនរបស់អាមេរិកចេញពីសន្ធិសញ្ញានុយក្លេអ៊ែរទ្វេភាគីជាមួយរុស្ស៊ី ប្រាកដណាស់នឹងជំរុញឲ្យមានការប្រកួតប្រជែង សព្វាវុធ នៅក្នុងពិភពលោកកាន់តែខ្លាំង។ នៅពេលប្រកាសដកអាមេរិកចេញពីសន្ធិសញ្ញា លោកដូណាល់ ត្រាំ បានបញ្ជាក់ហើយថា បើសិនរុស្ស៊ី អាចផលិតមីស៊ីលរយៈចម្ងាយមធ្យម ផ្ទុកក្បាលគ្រាប់នុយក្លេអ៊ែរ នោះអាមេរិកមិនអាចនៅឈរឱបដៃ គោរពតាមកិច្ចព្រមព្រៀងតែម្នាក់ឯងទេ។ អាមេរិកនឹងដកខ្លួនចេញពីសន្ធិសញ្ញា ដើម្បីមានសិទ្ធិផលិតមីស៊ីលចម្ងាយមធ្យមដែរ។
នៅភាគីរុស្ស៊ី វិញ អនុរដ្ឋមន្រ្តីការបរទេសរុស្ស៊ី បានវាយបក វិញដែរថា បើសិនអាមេរិក នៅតែសម្រេចចិត្តឯកតោភាគី ដកខ្លួនចេញពីសន្ធិសញ្ញាអន្តរជាតិ នោះ រុស្ស៊ី គ្មាន ជំរើសអ្វីផ្សេង ក្រៅតែ ចាត់វិធានការទប់ទល់វិញ ដែលនៅក្នុងនោះមានផងដែរ ខាងបច្ចេកវិទ្យាយោធា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ