ទស្សនកិច្ចទីប្រឹក្សាសន្តិសុខជាតិសរអានៅម៉ូស្គូ ក្រោយលោកត្រាំប្រកាសដកខ្លួនចេញពីសន្ធិសញ្ញានុយក្លេអ៊ែរ
ថ្ងៃអង្គារ ២៣ តុលា ទីប្រឹក្សាសេតវិមានខាងសន្តិសុខជាតិអាមេរិក លោក John Bolton បានជួប លោករដ្ឋមន្ត្រីការពារជាតិរុស្ស៊ី Serguei Shoigou និង បានត្រូវទទួលជួបដោយលោកប្រធានាធិបតី វ៉្លាឌីមៀរ ពូទីន គឺ ក្រោយពីគាត់ បានជួបពិភាក្សាមួយថ្ងៃមុន ទាំងជាមួយ លេខាក្រុមប្រឹក្សាសន្តិសុខជាតិរុស្ស៊ី ទាំង ជាមួយ រដ្ឋមន្ត្រីការបរទេសរុស្ស៊ី ដោយផ្តោតលើ ចេតនាអាមេរិកាំង ដកខ្លួនចេញពី សន្ធិសញ្ញាមីស៊ីល នុយក្លេអ៊ែរ ចុះ ៣១ ឆ្នាំមុន ជាមួយម៉ូស្គូ។ ក្នុងសន្និសីទកាសែតយប់មិញ លោក Bolton បានបង្ហើបឲ្យដឹង ខ្លះៗ អំពី តុល្យាការនៃទស្សនកិច្ចគាត់នៅ រដ្ឋធានីរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងជំនួបម្សិលមិញ ដែលរូបភាពប៉ុន្មានដំបូង បញ្ចាំងតាមទូរទស្សន៍ លោក រដ្ឋមន្ក្រីយោធារុស្ស៊ី Shoigouបានលើកឡើងអំពី”ការសន្ទនាកាន់តែសកម្ម”ជាមួយ សរអា។ តាមសំដីគាត់ ៖ បច្ចុប្បន្ន មាន បញ្ហាមួយចំនួនធំ នៅក្នុងលោក ដែលយើងអាចនឹងដោះស្រាយដោយសារ ការខំប្រឹងប្រែងរួមគ្នា” ដូចជា បញ្ហាយុទ្ធសាស្ត្រពាក់ព័ន្ធនឹងអាវុធនុយក្លេអ៊ែរ ពាក់ព័ន្ធនឹងដំណោះស្រាយជម្លោះធំៗ ដែលពន្យារ ទៅ យូរមកហើយ។
ក្រោយពីជំនួបរវាងលោកប្រធានាធិបតីរុស្ស៊ី វ៉្លាឌីមៀរ ពូទីន និង សមភាគីអាមេរិកាំង លោក ដូណាល់ ត្រាំ នៅក្រុង Helsinki ថ្ងៃ ១៦ កក្កដាមក “ គេអាចសង្កេតឃើញថា “កិច្ចសន្ទនាទ្វេភាគី កំពុងតែ ស្តារឡើងវិញដោយកើនឡើងជាលំដាប់”។
ខណៈដែលទំនាក់ទំនងរវាងម៉ូស្គូនិងក្រុងវ៉ាស៊ីនតោន ស្ថិតនៅកម្រិតទាបបំផុត លោក Shoigouបាន អះអាងជាអាទ៏ ៖ ៖ ខ្ញុំជឿជាក់ថា សូម្បី ជំហានខ្លីៗ ក៏អាចនាំផលល្អដល់ទំនាក់ទំនងយើង និង ដល់ការ ស្តារឡើងវិញ ជំនឿទុកចិត្តគ្នាទៅវិញទៅមក។
យប់មិញ ដោយបូកសរុបលទ្ធផលនៃកិច្ចចរចាអស់ពីរថ្ងៃជាប់នៅម៉ូស្គូ ទីប្រឹក្សាប្រធានាធិបតីអាមេរិកាំងខាង សន្តិសុខជាតិ លោក John Boltonបានថ្លែងថា សរអា នៅមិនទាន់ធ្វើសេចក្តីថ្លែងការណ៍ជាផ្លូវការ ដើម្បី ដកខ្លួនចេញពី សន្ធិសញ្ញាកំទេចមីស៊ីលបាញ់ចម្ងាយខ្លីនិងចម្ងាយធ្យម ចុះក្នុងឆ្នាំ ១៩៨៧ ដោយ លោក ប្រធានាធិបតីសូវៀត Mikhail Gorbatchev និង លោកប្រធានាធិបតី សរអា Ronald Reagan ។
តាមសំដីគាត់ ទាំងពេលជួបជាមួយលោកពូទីន គាត់ក៏បានលើកឡើងពីជំហរសរអា ដែលថា រុស្ស៊ី តាំងពី ឆ្នាំ ២០១៥ មក រំលោភលើសន្ធិសញ្ញានេះ ប៉ុន្តែ ភាគីរុស្ស៊ី តែងបដិសេធហើយចោទ សរអា ថា ជា ភាគីបំពាន ទេតើ។ លោក Bolton បន្ថែមថា សន្ធិសញ្ញានេះ ចាស់ហួសសម័យទៅហើយ តែងបានត្រូវរំលោភ ម្យ៉ាងទៀត វាមិនរួមក្តោបគ្រប់ ប្រទេសដែល សព្វថ្ងៃមានមីស៊ីលបែបនេះ ដែលអាចបាញ់ទៅចម្ងាយ ពី ៥០០ ដល់ ៥.៥០០ គម។
គាត់ថា មីស៊ីលបែបនេះ ដែលរុស្ស៊ី មាននៅទ្វីបអឺរ៉ុប គឺ ជាគ្រោះថ្នាក់ មិនមែន ការដកខ្លួនរបស់ សរអា ចេញ ពី សន្ធិសញ្ញា ទេ ដែលជាគ្រោះថ្នាក់។
ដោយហេតុថា គាត់មកកាន់ក្រុងម៉ូស្គូលើកនេះ គឺដោយបន្តបំពេញតាម ការផ្ទុកផ្តាក់នៃលោកប្រធានាធិបតី ដូណាល់ ត្រាំ ស្របនឹងជំនួបជាមួយ សមភាគីរុស្ស៊ី នៅក្រុង Helsinki ថ្ងៃ ១៦ កក្កដា ហើយជំនួបមួយលើក ទៀត រវាង មេដឹកនាំទាំងពីរ ត្រូវគ្រោងប្រព្រឹត្តទៅ ក្នុងបរិវេណនៃ ពិធីនៅក្រុង ប៉ារីស ថ្ងៃ ១១ វិច្ឆិកា ខាងមុខ ឧទ្ទិសដល់ ខួប ១០០ ឆ្នាំ នៃការបញ្ចប់សង្គ្រាមលោកលើកទី១ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ