ថ្នាក់ឧត្តមសិក្សានិងភាពប្រកួតប្រជែងរបស់បារាំងលើពិភពលោក
ចុះផ្សាយនៅថ្ងៃ៖
ប្រតិកម្មជាបន្តបន្ទាប់ ទាំងស្រប និងប្រឆាំង ត្រូវបានធ្វើឡើង ក្រោយការប្រកាសដាក់ចេញនូវគោលនយោបាយថ្មី របស់រដ្ឋាភិបាលបារាំង ដែលនឹងបង្កើនថ្លៃសិក្សា ជាងដប់ដង លើសពីមុន ចំពោះនិស្សិតបរទេស មិនមែនមកពីតំបន់អឺរ៉ុប។ ផ្អែកតាមរដ្ឋាភិបាល យុទ្ធសាស្រ្ដថ្មីនេះ មានគោលដៅ ធ្វើកំណែទម្រង់ និងទំនើបកម្មថ្នាក់ឧត្តមសិក្សាបារាំង ដើម្បីបង្កើនភាពប្រកួតប្រជែងរបស់ប្រព័ន្ធអប់រំបារាំង និងដើម្បីទាក់ទាញបន្ថែមទៀតនិស្សិតបរទេស។
កាលពីថ្ងៃច័ន្ទសប្តាហ៍មុន រដ្ឋាភិបាលបារាំង តាមរយៈលោកនាយករដ្ឋមន្រ្ដី Édouard Philippe បានប្រកាសដាក់ចេញនូវ យុទ្ធសាស្រ្ដថ្មី ដើម្បីធ្វើការទាក់ទាញបន្ថែមទៀត និស្សិតបរទេស ដែលមកសិក្សានៅប្រទេសបារាំង ក្រោមគោលនយោបាយមួយ មានឈ្មោះថា “ស្វាគមន៍មកកាន់បារាំង ឬ Bienvenue en France”។
សម្រាប់ពេលបច្ចុប្បន្ន បារាំងទទួលស្វាគមន៍និស្សិតបរទេស ប្រមាណ ៣២០ពាន់នាក់ ក្នុងចំណោមនិស្សិតបរទេសទាំង ៤,៨លាននាក់ ទូទាំងសាកលលោក។ បារាំងជាប្រទេសលំដាប់ខ្ពស់បំផុតទីបួន លើពិភពលោក និងជាប្រទេសមិននិយាយភាសាអង់គ្លេសទីមួយ ដែលមាននិស្សិតបរទេសច្រើនបំផុត តាមពីក្រោយ សហរដ្ឋអាមេរិក ចក្រភពអង់គ្លេស និងអូស្រ្ដាលី។ ផ្អែកលើគោលនយោបាយថ្មីនេះ បារាំងមានបំណងចង់ឱ្យនិស្សិតបរទេស រួមចំណែកផ្តល់ហិរញ្ញប្បទាន ដើម្បីលើកកម្ពស់ប្រព័ន្ធអប់រំបារាំង និងដើម្បីទាក់ទាញនិស្សិតបរទេសឱ្យដល់ប្រមាណ ៥០០ពាន់នាក់ កំឡុងពេលដប់ឆ្នាំខាងមុខ ពោលគឺឆ្នាំ២០២៧។
ដើម្បីធ្វើរឿងនេះបាន លោកនាយករដ្ឋមន្រ្ដី Édouard Philippe បានបង្ហាញផែនការយុទ្ធសាស្រ្ដ ដោយនៅឆ្នាំបន្ទាប់ និស្សិតបរទេស មកពីក្រៅតំបន់អឺរ៉ុប នឹងត្រូវបង់ថ្លៃសិក្សាចំនួន ២៧៧០អឺរ៉ូ ជំនួសថ្លៃសិក្សាបច្ចុប្បន្ន ចំនួន ១៧០អឺរ៉ូ សម្រាប់ថ្នាក់បរិញ្ញប័ត្រ និងចំនួន ៣៧៧០អឺរ៉ូ សម្រាប់ថ្នាក់អនុបណ្ឌិត និងបណ្ឌិត ដែលបច្ចុប្បន្ន និស្សិតត្រូវបង់ថ្លៃដូចគ្នានឹងនិសិ្សតបារាំងផ្សេងទៀត ត្រឹមតែ ២៤៣អឺរ៉ូ ប៉ុណ្ណោះ។
លោកនាយករដ្ឋមន្ត្រីបានក៏បានបញ្ជាក់ផងដែរថា វា “មិនសមហេតុផល” និង “មិនយុត្តិធម៌” ទេ សម្រាប់ស្ថានភាព ដែលនិស្សិតបរទេស មិនមែនមកពីអឺរ៉ុប ត្រូវបង់ថ្លៃសិក្សាដូចគ្នា ទៅនឹងនិស្សិតបារាំង ព្រោះថា ឪពុកម្ដាយរបស់និស្សិតបារាំង ចាំបាច់ត្រូវធ្វើការ និងបង់ពន្ធសម្រាប់វិស័យអប់រំទាំងមូល អស់រាប់សិបឆ្នាំ មកហើយ។ បន្ថែមពីលើនេះ បើយោងទៅតាមរដ្ឋាភិបាល ថ្លៃសិក្សាដែលនិស្សិតបរទេសត្រូវបង់នេះ ស្មើត្រឹមតែមួយភាគបីប៉ុណ្ណោះ នៃការចំណាយសរុប។
ទោះជាយ៉ាងណា រដ្ឋាភិបាលបានសន្យា ជួយសម្រួលដល់ភាពងាយស្រួល ក្នុងការទទួលបានទិដ្ឋាការ (Visa) ការទទួលបានបណ្ណស្នាក់នៅ (Titre de séjour) ការធ្វើឱ្យប្រសើរឡើងនូវល័ក្ខខ័ណ្ឌទទួលស្វាគមន៍និស្សិត ភ្លាមៗ នៅពេលពួកគេដាក់ជើងជាន់លើទឹកដីបារាំង និងការបើកសាខាព័ត៌មានបារាំងនៅបរទេស ដែលគេស្គាល់ថា Campus France។ បន្ថែមពីលើនេះ កំណែទម្រង់នេះក៏នឹងអាចបង្កើនចំនួនអាហារូបករណ៍ និងការលើកលែងការបង់ថ្លៃសិក្សា ដល់និស្សិតប្រមាណ ១៥ពាន់នាក់ នៅពេលខាងមុន ដែលភាគច្រើនមកពីប្រទេសកំពុងអភិវឌ្ឍន៍ តែបច្ចុប្បន្នមានត្រឹមតែ ៧ពាន់នាក់ប៉ុណ្ណោះ។
ក្រោយការប្រកាសអំពីយុទ្ធសាស្រ្ដថ្មីនេះ ប្រតិកម្មប្រឆាំងជាបន្តបន្ទាប់ បានលេចចេញជារូបរាងឡើង ពីសំណាក់សមាគមនិស្សិត នៃបណ្តាប្រទេសកំពុងអភិវឌ្ឍន៍ ជាពិសេស ពីតំបន់អាហ្វ្រិក ដោយពួកគេបានលើកឡើងថា ផែនការនេះជាផែនការរើសអើង និងវាមិនបានលើកកម្ពស់ភាពទាក់ទាញរបស់ថ្នាក់ឧត្តមសិក្សាបារាំងអ្វីទេ ប៉ុន្តែវាបានបិទទ្វារបារាំង ទៅវិញទេ។ ជាក់ស្ដែង និស្សិតអាហ្រ្វិកដែលកំពុងសិក្សានៅប្រទេសបារាំងបច្ចុប្បន្ន តំណាងប្រមាណ ជិតពាក់កណ្តាលនៃនិស្សិតបរទេសសរុប។
ទោះជាយ៉ាងណា មានមតិខ្លះផ្សេងទៀត ក៏បានបង្ហាញជំហរគាំទ្រផងដែរ លើយុទ្ធសាស្រ្ដរបស់រដ្ឋាភិបាល ដោយលើកហេតុផលថា បើប្រៀបធៀបទៅនឹងវិស័យអប់រំ នៅបណ្តាប្រទេសនិយាយភាសាអង់គ្លេស ដូចជា សហរដ្ឋអាមេរិក និងចក្រភពអង់គ្លេស ភាពទាក់ទាញរបស់ប្រព័ន្ធអប់រំបារាំង នៅមានកម្រិតទាបជាង ដែលវាទាមទារឱ្យមានការធ្វើកំណែទម្រង់ និងទំនើបកម្មបន្ថែម។ ហើយដើម្បីអាចធ្វើរឿងនេះបាន ការបង្កើនថ្លៃសិក្សាជារឿងចាំបាច់ដែលត្រូវធ្វើ ព្រោះថា ថ្លៃសិក្សាបច្ចុប្បន្ននៅបារាំង បើទោះជាត្រូវបានបង្កើនជាងដប់ដងក៏ដោយ ក៏ប៉ុន្តែ វានៅមានទំហំទាបណាស់ ធៀបនឹងថ្លៃសិក្សានៅសហរដ្ឋអាមេរិក និងចក្រភពអង់គ្លេស ដែលនិសិ្សតបរទេស ត្រូវចំណាយ រហូតរាប់សិបម៉ឺនដុល្លារអាមេរិក ក្នុងមួយឆ្នាំៗ។
ផ្អែកតាមអ្នកឃ្លាំមើលដដែល គោលនយោបាយនេះ ត្រូវបានធ្វើឡើង ស្របពេលដែលកំណើននិស្សិតពីតំបន់អាស៊ី ជាពិសេសពី ប្រទេសចិន ជប៉ុន ឥណ្ឌា កូរ៉េខាងត្បូង និងអាស៊ាន ដែលមានបំណងធ្វើដំណើរ មកសិក្សានៅបស្ចិមលោក ចេះតែបន្តកើនឡើង ខណៈបំណងរឹតត្បិតរបស់សហរដ្ឋអាមេរិកលើនិសិ្សតចិន ត្រូវបានព្រមាន ជាបន្តបន្ទាប់ ដោយរដ្ឋបាលក្រុងវ៉ាស៊ីនតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ