កំណែទម្រង់រយៈពេលវែងនិងប្រជាប្រិយភាពរបស់ប្រធានាធិបតីបារាំង
ចុះផ្សាយនៅថ្ងៃ៖
ស្តាប់ - ០៤:០៥
វាជាលើកដំបូង ក្នុងប្រវត្តិសាស្ត្របារាំង ដែលមានប្រធានាធិបតីវ័យក្មេងបំផុត ក្រោយសករាជរបស់ អធិរាជបារាំង ណាប៉ូ ឡេអុង។ ជាងមួយឆ្នាំកន្លះក្នុងតំណែងរបស់ខ្លួន លោក អេម៉ានុយអែល ម៉ាក្រុង (Emmanuel Macron) ត្រូវបានមើលឃើញថា មានភាពសកម្មខ្លាំង ក្នុងការធ្វើកំណែទម្រង់នានា ដើម្បីធ្វើឱ្យសេដ្ឋកិច្ចបារាំងមានភាពប្រកួតប្រជែងជាងមុន និងដើម្បីដើរឱ្យទាន់សភាពការណ៍របស់ពិភពលោក។វាជាកំណែទម្រង់ ដែលទទួលរងការប្រឆាំងយ៉ាងខ្លាំង ពីប្រជាជនបារាំង រហូតដល់ ប្រជាប្រិយភាពរបស់គាត់បានបន្តធ្លាក់ចុះ។ នៅទីបញ្ចប់ តើលោកម៉ាក្រុងអាចនឹងជម្នះធ្វើកំណែទម្រង់វះកាត់សង្គមបានជោគជ័យ ឬយ៉ាងណា?
ក្នុងកំឡុងពេលប៉ុន្មានខែចុងក្រោយ ប្រជាប្រិយភាពរបស់ប្រធានាធិបតីបារាំង លោក អេម៉ានុយអែល ម៉ាក្រុង បានបន្តធ្លាក់ចុះ។ គិតត្រឹមខែវិច្ឆិកានេះ បើយោងតាមការស្ចង់មតិ ចេញផ្សាយដោយទស្សនាវដ្ដី Journal du Dimanche ដែលបានស្ទង់មតិលើពលរដ្ឋបារាំងចំនួន ប្រមាណ ១៩០០នាក់ ក្រោយចលនាបាតុកម្មរបស់ក្រុមអាវកាក់ពណ៌លឿង ប្រឆាំងនឹងការដំឡើងថ្លៃប្រេងឥន្ធនៈ គេអង្កេតឃើញថា ប្រជាប្រិយភាពរបស់លោកម៉ាក្រុង បានធ្លាក់ បួនភាគរយបន្ថែមទៀត ឬធ្លាក់មកទាបជាង ២៥ភាគរយ ពោលគឺមានមិនដល់ ម្នាក់ផងក្នុងចំណោមពលរដ្ឋបារាំង បួននាក់ ដែលបន្តគាំទ្រនយោបាយរបស់លោក ម៉ាក្រុង ។
យោងតាមអ្នកឃ្លាំមើលសង្គម ភាពមិនពេញចិត្តនេះអាស្រ័យយ៉ាងខ្លាំងទៅនឹង ការធ្វើកំណែទម្រង់យ៉ាងស៊ីជម្រៅ លើវិស័យចម្បងៗ របស់រដ្ឋាភិបាលបច្ចុប្បន្ន។ គិតមកដល់ពេលនេះ លោកម៉ាក្រុង បានឡើងកាន់តំណែងជាប្រធានាធិបតីបារាំង អស់រយៈពេលជិត មួយឆ្នាំកន្លះហើយ។ ប្រធានាធិបតីវ័យក្មេងបារាំងរូបនេះ ត្រូវបានគេមើលឃើញថា មានភាពសកម្មខ្លាំង ក្នុងការធ្វើកំណែទម្រង់នានា។
ក៏ប៉ុន្តែ មានមតិមហាជនយ៉ាងច្រើន យល់ថា កំណែទម្រង់របស់លោក ម៉ាក្រុង ធ្វើឡើងដើម្បីតែជួយអ្នកមាន និងមិនខ្វល់ខ្វាយអំពីសុខទុក្ខ ប្រជាជនដែលមានជីវភាពមធ្យម ឬក្រីក្រ។
គួរបញ្ជាក់ផងដែរថា កំណែទម្រង់ចម្បងៗ ដែលបានអនុវត្តកន្លងមក របស់លោកម៉ាក្រុង រួមមាន កំណែទម្រង់លើវិស័យអប់រំ កំណែទម្រង់លើវិស័យដឹកជញ្ជូនសាធារណៈ កំណែទម្រង់លើច្បាប់ការងារបារាំង កំណែទម្រង់ពន្ធដារ និងកំណែទម្រង់លើវិស័យគាំពារសង្គម ជាដើម។ ហើយក្នុងពេលថ្មីៗនេះ គឺការដំឡើងថ្លៃប្រេងឥន្ធនៈ។ សរុបជារួម វាគឺជាកំណែទម្រង់ ដែលមានបំណងធ្វើឱ្យ សេដ្ឋកិច្ចបារាំងមានភាពប្រកួតប្រជែងជាងមុន ធៀបនឹងទីផ្សារពិភពលោក និងដើម្បីធ្វើឱ្យប្រជាជនបារាំង ត្រូវបង្ខំចិត្តខិតខំធ្វើការច្រើនជាងមុន ដើម្បីដើរតាមឱ្យទាន់សភាពការណ៍របស់ពិភពលោក។
ផ្នែកតាមការអនុវត្តជាក់ស្ដែង គេអង្កេតឃើញជារឿយៗ ក្នុងប្រទេសប្រកាន់របបប្រជាធិបតេយ្យនិយម ថា ប្រជាប្រិយភាពរបស់អ្នកដឹកនាំតែងតែធ្លាក់ចុះ នៅពេលដែលរដ្ឋាភិបាលព្យាយាមធ្វើកំណែទម្រង់ស៊ីជម្រៅណាមួយ សម្រាប់ប្រយោជន៍ជាតិ ជាពិសេសគឺ ការកែប្រែសង្គម ដែលពាក់ព័ន្ធនឹងការកាត់បន្ថយរបបគាំពារសង្គម។ ក្នុងស្ថានភាពនេះ ដើម្បីទទួលបានសម្លេងឆ្នោតពីប្រជាពលរដ្ឋភាគច្រើន រដ្ឋាភិបាលមួយនឹងសន្យាធ្វើអ្វីៗបន្ថែម ជាពិសេស ការអនុវត្តនយោបាយរយៈពេលខ្លី ដែលអាចចេញជាលទ្ធផលភ្លាមៗ។
ហើយដើម្បីអាចយកឈ្នះគូប្រជែងរបស់ខ្លួននៅការបោះឆ្នោតបន្ទាប់ គេចាំបាច់ត្រូវបន្តសន្យាផ្តល់នូវនយោបាយរបៀបនេះ ជាបន្តបន្ទាប់។ វាជាការសន្យាមួយដែលគ្មានទីបញ្ចប់។ ក្នុងល័ក្ខខ័ណ្ឌនេះ បេក្ខជនប្រធានាធិបតីមួយនឹងមិនត្រូវបានបោះឆ្នោត ផ្តល់សេចក្តីទុកចិត្ត ដោយប្រជាពលរដ្ឋភាគច្រើននោះទេ ប្រសិនបើគាត់មានបំណងអនុវត្តនយោបាយរយៈពេលវែង ឬវាប្រៀបបានជាមួយការវះកាត់ និងដាក់ថ្នាំព្យាបាលជម្ងឺសង្គមដ៏ល្វីងជូរជត់។
នៅចុងបញ្ចប់ ផលវិបាកផ្សេងៗដូចជា ការកើនឡើងបំណុលសាធារណៈ ឱនភាពថវិកាជាតិ អត្រានិកម្មភាពកើនឡើង នឹងក្លាយជាបន្ទុករបស់រដ្ឋាភិបាលក្រោយៗ និងមនុស្សជំនាន់ក្រោយដែលត្រូវបង់ពន្ធបន្ថែម។ ទោះជាយ៉ាងណា ស្ថានភាពអាចនឹងមានភាពប្រែប្រួលខ្លះ សម្រាប់ប្រទេសដែលមានអាណត្តិដឹកនាំ ដូចជាករណីនៅបារាំង ដែលប្រធានាធិបតីអាចដឹកនាំបានត្រឹមតែពីរអាណត្តិ។
ក្នុងល័ក្ខខ័ណ្ឌនេះ ប្រធានាធិបតីដែលបានជាប់ឆ្នោតនៅអាណត្តិទីពីរនឹងខិតខំអនុវត្តនយោបាយរយៈពេលវែង ដើម្បីប្រយោជន៍ជាតិ ព្រោះខ្លួនមិនចាំបាច់ត្រូវខ្វល់ខ្វាយចង់បានសម្លេងឆ្នោតអ្វីទៀតទេ នៅអាណត្តិបន្ទាប់។ ក៏ប៉ុន្តែ តើប្រធានាធិបតីដែលចង់កែប្រែសង្គមយ៉ាងស៊ីជម្រៅ តាំងពីអាណត្តិដំបូង ដូចលោកម៉ាក្រុង អាចនឹងជាប់ឆ្នោត ឬក៏អត់ នៅអាណត្តិទីពីរ?
យោងតាមអ្នកជំនាញខ្លះ ការធ្លាក់ចុះប្រជាប្រិយភាពរបស់លោកម៉ាក្រុង វាជារឿងល្អទៅវិញទេ ព្រោះវាបានបង្ហាញថា លោកម៉ាក្រុងបាននិងកំពុងជម្នះធ្វើកំណែទម្រង់វះកាត់សង្គម សម្រាប់រយៈពេលវែង ដោយមិនខ្លាច ការប្រឆាំងរបស់ពលរដ្ឋបារាំង។ នៅចុងក្រោយ បើគាត់អាចធ្វើបានមែន នោះសង្គមបារាំងនឹងមានភាពល្អប្រសើរឡើង។ ទោះជាយ៉ាងណា ការសាងទំនុកចិត្ត លើកំណែទម្រង់ណាមួយជារឿងចម្បង។ នៅពេលដែលអ្នកអាចគោរពការសន្យាលើកទីមួយបានហើយ នោះពលរដ្ឋនឹងផ្តល់ទំនុកចិត្តលើអ្នកកាន់តែស្រួលសម្រាប់ការសន្យាលើកទីពីរ និងជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ