បារាំង៖វិមានអេលីហ្សេជាផ្ទាំងស៊ីបរបស់ចលនា « អាវកាក់លឿង » ក្នុងថ្ងៃសៅរ៍ ទី៨ ធ្នូ?
នៅក្នុងប្រទេសបារាំង ក្តីបារម្ភកំពុងកើតមានយ៉ាងផុសផុលជុំវិញគម្រោងបាតុកម្មជាថ្មីរបស់ចលនាអាវកាក់លឿងនៅថ្ងៃសៅរ៍ ទី៨ ធ្នូក្នុងទីក្រុងប៉ារីស។ អ្វីដែលវិមានប្រធានាធិបតី និងរដ្ឋាភិបាលបារម្ភខ្លាំងជាងគេ គឺការចូលរួមរបស់ក្រុមជ្រុលនិយមជាច្រើនពាន់នាក់នៅក្នុងក្បួនបាតុកម្មដើម្បីកម្ទេចបំផ្លាញ និងសម្លាប់។ ទន្ទឹមគ្នានេះ ការអំពាវនាវឲ្យមានភាពស្ងប់ស្ងាត់ និងការទទួលខុសត្រូវកំពុងបន្តកើតមានពីគ្រប់មជ្ឈដ្ឋាន ពិសេសពីមជ្ឈដ្ឋានអ្នកនយោបាយគ្រប់ជាន់ថ្នាក់។
ចុះផ្សាយនៅថ្ងៃ៖
ស្តាប់ - ០២:៣៧
គេនៅមិនទាន់ដឹងថា តើគម្រោងបាតុកម្មរបស់ចលនាអាវកាក់លឿងក្នុងថ្ងៃសៅរ៍ ទី៨ ធ្នូនឹងមានទំហំប៉ុនណា និងមានដំណើរការទៅយ៉ាងដូចម្តេចទេ តែលោករដ្ឋមន្រ្តីក្រសួងមហាផ្ទៃ Christophe Castaner បានប្រាប់ឲ្យដឹងថា រដ្ឋាភិបាលនឹងកែនប្រមូលកម្លាំងប៉ូលិស និងកម្លាំងប៉េអឹមទាំងអស់ដែលមានក្នុងដៃ និងព្រមានទុកជាមុនពីការចាប់ខ្លួនជនប្រើអំពើហិង្សា ឬជនបំផ្លិចបំផ្លាញ។ ទន្ទឹមគ្នានេះ ប្រភពពីកម្លាំងរក្សាសណ្តាប់ធ្នាប់បានទម្លាយឲ្យដឹងពីគម្រោងប្រើកម្លាំងទាហានជាជំនួយបន្ថែមដើម្បីការពារទីតាំងរដ្ឋបាល និងស្ថាប័នរដ្ឋ ពិសេសកម្លាំងទាហានសង់ទីនែលដែលធ្លាប់ប្រើដើម្បីប្រឆាំងភេរវនិយមក្នុងពេលប្រទេសស្ថិតក្នុងភាពអាសន្ន។
វិមានអេលីហ្សេដែលបានស្រង់ព័ត៌មានពីក្រសួងស៊ើបការសម្ងាត់ឲ្យដឹងថា ក្រៅពីបាតុករអាវកាក់លឿង អាចនឹងមានមនុស្សជាច្រើនពាន់នាក់ផ្សេងទៀតចូលក្រុងប៉ារីសក្នុងថ្ងៃសៅរ៍ ទី៨ ធ្នូដើម្បីកម្ទេចបំផ្លាញ និងសម្លាប់។ មានទីតាំងសំខាន់ចំនួន ៣ ដែលត្រូវការពារខ្លាំងជាងគេសម្រាប់ថ្ងៃបាតុកម្ម គឺវិមានប្រធានាធិបតីអេលីហ្សេ រដ្ឋសភា និងក្រសួងមហាផ្ទៃ។ នៅក្នុងកម្មវិធីតស៊ូមតិរៀបចំដោយកាណាល់ទូរទស្សន៍មួយនាយប់ថ្ងៃពុធ ទី៥ ធ្នូ អ្នកតំណាងអាវកាក់លឿងម្នាក់លោក Eric Drouet បានបញ្ជាក់ពីបំណងចង់ជ្រៀតចូលក្នុងវិមានអេលីហ្សេនៅថ្ងៃបាតុកម្មក្នុងថ្ងៃសោរ៍ ទី៨ធ្នូ។
សញ្ញានៃក្តីបារម្ភបានកើតមានដល់ថ្នាក់ដឹកនាំកំពូលដោយលោកប្រធានាធិបតីម៉ាក្រុងបានសំណូមពរដល់កម្លាំងនយោបាយគ្រប់និន្នាការ ក្រុមសហជីព និងក្រុមនិយោជកទាំងអស់ចូលរួមអំពាវនាវឲ្យមានភាពស្ងប់ស្ងាត់។ សម្រាប់លោកម៉ាក្រុង ការបិតមាត់នៅស្ងៀមប្រៀបដូចជាការយុបឃិតជាមួយក្រុមដែលស្វែករកការវាយប្រហារលើសាធារណរដ្ឋ។ តើលោកម៉ាក្រុងកំពុងច្រាសច្រាលឬ?។ អត់ទេ តែលោកបារម្ភ នេះជាប្រតិកម្មរបស់រដ្ឋមន្រ្តីក្រសួងកសិកម្មលោក Didier Guillaume តាមវិទ្យុមួយក្នុងស្រុក។
លោក Alain Juppé អតីតនាយករដ្ឋមន្រ្តី និងជាចៅហ្វាយខេត្ត Bordeaux បានមើលឃើញថា អំពើហិង្សាកំពុងមាននៅក្នុងសម្តី និងគ្រប់ទង្វើទាំងអស់ ហើយការអំពាវនាវឲ្យធ្វើបាតុកម្មក្នុងកាលៈទេសៈបច្ចុប្បន្ននឹងបង្កឲ្យមានហានិភ័យគ្រប់គ្នា។ សម្រាប់លោក Juppé ភាគីនីមួយៗគួរនិយាយគ្នា ពោលមិនត្រូវជេរប្រមាថដាក់គ្នាឡើយ។ ចំណែកអតីតប្រធានាធិបតីលោកហ្រ្វង់ស័រ ហូឡង់បានអំពាវនាវឲ្យមានការថ្លឹងថ្លែង និងឲ្យបដិសេធរាល់អំពើហិង្សាគ្រប់រូបភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ