មានករណីផ្ទុះហ្កាសមរណៈ កណ្តាលរដ្ឋធានីប៉ារីស
មានស្លាប់យ៉ាងហោចណាស់អ្នកពន្លត់អគ្គីភ័យពីរនាក់ ជនស៊ីវិលម្នាក់ និងរបួសជាង៥០នាក់ ក្នុងនោះ៩នាក់ជារបួសធ្ងន់ខ្លាំង នៅក្នុងគ្រោះផ្ទុះហ្គាសក្នុងហាងលក់នំប៉័ងមួយ នៅទីក្រុងប៉ារីស។ សំឡេងផ្ទុះលាន់ឮខ្លាំងដូចផ្ទុះគ្រាប់ពេលសង្គ្រាម ! ប៉ុន្តែនេះជាឧប្បត្តិហេតុដែលកើតឡើងដោយចៃដន្យ ក្រោយមានករណីធ្លាយឧស្ម័នហ្កាស។ នេះបើតាមព័ត៌មានផ្តល់ដោយអាជ្ញាធរ។
ចុះផ្សាយនៅថ្ងៃ៖ កែប្រែថ្ងៃទី៖
គ្រោះថ្នាក់បានកើតឡើងនៅមុនម៉ោង៩ព្រឹក ! នៅពេលក្រុមពន្លត់អគ្គីភ័យបានចូលទៅធ្វើអន្តរាគមន៍ ដោះស្រាយបញ្ហាធ្លាយហ្កាស នៅក្នុងហាងនំប៉័ង និងភោជនីដ្ឋាន ស្រាប់តែស្នូរផ្ទុះបានឡើង និងបន្តដោយអគ្គីភ័យយ៉ាងសន្ធោសន្ធៅ។ ទ្វារ-បង្អួចកញ្ចក់ របស់ហាងរបស់អគារ និងអាគារនៅជុំវិញ នៅផ្ទាល់ដីនិងជាន់ទីមួយ ផ្ទុះបែកខ្ចាយខ្ទាតពេញថ្នល់។ សម្ពាធឧស្ម័នខ្លាំងក្រៃរហូតធ្វើឱ្យរថយន្តថតនៅតាមផ្លូវជាប់នោះ ប៉ើងក្រឡាប់ ឬឆេះខ្លោច ព្រមទាំងខាងមានការខូចខាតជាសម្ភារៈយ៉ាងដំណំ ស្ទើរមួយសង្កាត់។ បំបែកថ្ម កញ្ចក់ លម្អ ធូលី រាយប៉ាយ ក្រាលគ្របពេញដងផ្លូវ។
ចំណែកការបាត់បង់ជីវិតមនុស្សកាន់តែធ្ងន់ធ្ងរទៀត។ មានស្លាប់អ្នកពន្លត់អគ្គីភ័យពីរនាក់ ជនស៊ីវិលពីរនាក់ និងរបួសជាងច្រើននាក់ ក្នុងនោះ៩នាក់កំពុងប្រឈមនឹងសេចក្តីស្លាប់។ ជនរងគ្រោះបាត់បង់ជីវិតម្នាក់ជាទេសចរស្នាក់នៅក្នុងសណ្ឋាគារទល់មុខហាងនំប៉័ង។
រដ្ឋមន្ត្រីក្រសួងមហាផ្ទៃដែលបានចុះទៅត្រួតពិនិត្យដល់កន្លែងកើតហេតុ បានអះអាងថាមានក្រុមអ្នកពន្លត់ភ្លើងជាង២០០នាក់ និងប៉ូលិសជាងមួយរយនាក់ បានចេញធ្វើប្រតិបត្តិការសង្គ្រោះពលរដ្ឋជាច្រើនផ្សេងទៀត ដែលជាប់កុននៅក្នុងអាគារ និងអាគារជុំវិញនោះ និងដោយខ្លះត្រូវភ្ញាក់ពីដំណេកទាំងស្រឡាំងកាំង ផ្ទះលែងមានទ្វារបង្អួចផង។ ឧទ្ធម្ភាគចក្រមួយគ្រឿង ក៏ត្រូវបានបញ្ជូនមកកន្លែងកើតហេតុដើម្បីជួយជម្លៀសជនរងរបួស។ សន្ធឹកនៃកម្លាំងផ្ទុះបានបង្កឱ្យមានភាពប៉ះទង្កិចដល់ទៅ១០០ម៉ែត្រ ពីចំណុចផ្ទុះ។
ថ្វីបើប៉ូលិសយល់ថានេះជាគ្រោះថ្នាក់ ប៉ុន្តែតុលាការបានសម្រេចបើកអង្កេតភ្លាម ដើម្បីស្វែងរកមូលហេតុ និងកំណត់អត្តសញ្ញាណនៃការផ្ទុះឱ្យបានច្បាស់លាស់។ ហេតុការណ៍នេះបានកើតឡើងនៅចំថ្ងៃដែលអាជ្ញាធរដាក់ពង្រាយកម្លាំងប៉ូលិសនិងនគរបាលជាង៥ពាន់នាក់ ដើម្បីប្រឈមទប់នឹងបាតុកម្មរបស់ចលនាអាវកាក់លឿងផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ