បារាំងទទួលស្គាល់លោកហ្កាយដូជាប្រធានាធិបតីស្តីទីវ៉េណេស៊ុយអេឡា និងអំពាវនាវឲ្យលោករៀបចំបោះឆ្នោត
នៅថ្ងៃចន្ទ ទី៤ កុម្ភៈ ប្រទេសបារាំង តាមរយៈប្រមុខការទូតលោកហ្សង់ អ៊ីវឡឺឌ្រីយ៉ង់ (Jean-Yves Le Drian) បានប្រកាសទទួលស្គាល់លោកហ័ន ហ្កាយដូជាប្រធានាធិបតីស្តីទីវ៉េណេស៊ុយអេឡា និងមានសិទ្ធិស្របច្បាប់ក្នុងការរៀបចំបោះឆ្នោតប្រធានាធិបតី។ ជំហរជាផ្លូវការរបស់ទីក្រុងប៉ារីសបានធ្វើឡើង ក្រោយពីលោកប្រធានាធិបតីវ៉េណេស៊ុយអេឡានីកូឡា ម៉ាឌូរ៉ូបានច្រានចោលឱសានវាទរបស់សហភាពអឺរ៉ុបដែលទុកពេលឲ្យលោកត្រឹមយប់ថ្ងៃអាទិត្យឆ្លងចូលថ្ងៃចន្ទ ទី៤ កុម្ភៈដើម្បីប្រកាសរៀបចំបោះឆ្នោតប្រធានាធិបតីឡើងវិញ។ បន្ទាប់ពីបារាំង អេស្ប៉ញា អង់គ្លេស និងស៊ុយអែតក៏បានប្រកាសជំហរគាំទ្រលោកហ្កាយដូដែរ។ លោកហ្សង់ អ៊ីវឡឺឌ្រីយ៉ង់បានបញ្ជាក់ថា ជំហររបស់បារាំងក៏ដូចជាបណ្តាប្រទេសមួយចំនួនដែលចង់ឲ្យរៀបចំបោះឆ្នោតប្រធានាធិបតីឡើងវិញមិនមែនជាការជ្រៀតជ្រែកកិច្ចការផ្ទៃក្នុងវ៉េណេស៊ុយអេឡាទេ តែមានគោលដៅដោះស្រាយវិបត្តិដោយសន្តិវិធី។ តាមប្រមុខការទូតបារាំងដដែល ពលរដ្ឋវ៉េណេស៊ុយអេឡាបាននាំគ្នាធ្វើបាតុកម្ម និងចង់បានការផ្លាស់ប្តូរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
« គេត្រូវហ៊ានទទួលស្គាល់ថាសព្វថ្ងៃនេះ វ៉េណេស៊ុយអេឡាជាប្រទេសដែលកំពុងមានស្ថានភាពសុខភាពសេដ្ឋកិច្ចត្រដរខ្យល់។ មានជនភៀសខ្លួនយ៉ាងច្រើនសម្បើម មានការគាបសង្កត់ និងមានអត្រាអតិផរណាខ្ពស់។ នៅម្ខាងទៀត គេឃើញពលរដ្ឋចុះផ្លូវធ្វើបាតុកម្ម ពលរដ្ឋចង់ឲ្យមានការផ្លាស់ប្តូរ ហើយគេត្រូវចៀសវាងកុំឲ្យកើតមានសង្រ្គាមស៊ីវិល និងការប៉ះទង្គិចគ្នា។
បន្ទាប់មក គេឃើញមានប្រធានាធិបតីម្នាក់គឺលោកនីកូឡា ម៉ាឌូរ៉ូដែលការបោះឆ្នោតក្នុងខែឧសភា ឆ្នាំ ២០១៨បានទទួលរងការប្រឆាំងយ៉ាងខ្លាំងនៅក្នុងស្រុក និងនៅបរទេសដោយមានប្រទេសសមាជិកអឺរ៉ុបផង។ បន្ទាប់មកទៀត គេឃើញមានប្រធានរដ្ឋសភាម្នាក់គឺលោកហ័ន ហ្កាយដូដែលការបោះឆ្នោតក្នុងឆ្នាំ ២០១៥ មិនបានទទួលរងការប្រឆាំងទេ។
តែប្រធានាធិបតីម៉ាឌូរ៉ូបែរជាយល់ឃើញថា វាចាំបាច់ដែលត្រូវរៀបចំបោះឆ្នោតសភាឡើងវិញទៅវិញ។ តាមពិតទៅ គឺការបោះឆ្នោតប្រធានាធិបតីរបស់គាត់ទេតើដែលគ្រប់គ្នាប្រឆាំង និងដែលត្រូវរៀបចំបោះឆ្នោតឡើងវិញ។ វាហាក់គ្មានអ្វីស្រពិចស្រពិលទៀតឡើយដែលគ្រប់គ្នា រួមទាំងប្រទេសអឺរ៉ុបទាំងអស់ផងបានយល់ឃើញថា វាចាំបាច់ដែលត្រូវដោះស្រាយវិបត្តិមួយនេះតាមរយៈការបោះឆ្នោតសេរី យុត្តិធម៌ និងតម្លាភាព គឺបោះឆ្នោតប្រធានាធិបតី ព្រោះវ៉េណេស៊ុយអេឡាជាប្រទេសប្រកាន់យករបបប្រធានាធិបតី។
នេះហើយជាដំណោះស្រាយដែលយើងបានស្នើឡើង ហើយចាប់ពីពេលនេះតទៅ យើងនឹងផ្តើមគិតគូរលើវិធានការចាំបាច់មួយចំនួនតបនឹងការបដិសេធរបស់លោកម៉ាឌូរ៉ូដើម្បីធ្វើយ៉ាងណា ឲ្យវិបត្តិវ៉េណេស៊ុយអេឡាអាចដោះស្រាយដោយសន្តិវិធី និងក្នុងភាពស្ងប់បំផុត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ