Brexit៖សហភាពអឺរ៉ុបទុកសំណាងទី២ ឲ្យប្រទេសអង់គ្លេស និងព្រមានថា ជាសំណាងចុងក្រោយ
សហភាពអឺរ៉ុប និងប្រទេសអង់គ្លេសកំពុងបន្តត ថ្លៃ និងប្រទាញប្រទង់គ្នាជុំវិញរឿង Brexit។ នៅសល់តែជាង ២សប្តាហ៍ទៀតទេដែលសំណុំរឿងលែងលះរវាងសហភាពអឺរ៉ុប និងប្រទេសអង់គ្លេសឈានចូលជាផ្លូវការ ពោលនៅថ្ងៃទី២៩ មីនា។ នៅថ្ងៃចន្ទ ទី១១ មីនា លោកស្រីនាយករដ្ឋមន្រ្តីអង់គ្លេសតេរ៉េសា ម៉េបានជួបសន្ទនាជាមួយប្រធានគណៈកម្មការអឺរ៉ុបលោកហ្សង់ខ្លូត យុងក័រនៅទីស្នាក់ការសភាអឺរ៉ុបក្នុងទីក្រុងស្រ្តាស្បួរ ប្រទេសបារាំង។ នៅក្នុងជំនួបនោះ លោកស្រីម៉េបានទទួលការធានាបន្ថែមពីលោកយុងក័រពាក់ព័ន្ធនឹងភាពចម្រូងចម្រាសជុំវិញបញ្ហាសន្តិសុខនៅព្រំដែនរវាងដែនដីអៀរឡង់ខាងជើងរបស់អង់គ្លេស និងប្រទេសអៀរឡង់ជាសមាជិកអឺរ៉ុប។ ជាលទ្ធផល លោកយុងក័រ និងលោកស្រីម៉េបានព្រមព្រៀងសម្រេចឲ្យបាននូវដំណោះស្រាយកណ្តាលមួយពីពេលនេះដល់ឆ្នាំ ២០២០ ស្តីពីសហភាពពន្ធគយ និងរឿងព្រំដែនអៀរឡង់។ ដូច្នេះបាល់កំពុងស្ថិតក្នុងជើងរបស់ក្រុមអ្នកតំណាងរាស្រ្តអង់គ្លេសដែលត្រូវបោះឆ្នោតនៅយប់ថ្ងៃអង្គារ ទី១២ មីនានេះ។ តែលោកយុងក័របានព្រមានទុកជាមុនថា នេះជាសំណាងទី២ និងចុងក្រោយរបស់អឺរ៉ុបចំពោះអង់គ្លេស ហើយនឹងគ្មានកិច្ចព្រមព្រៀងណាផ្សេងទេ។
ចុះផ្សាយនៅថ្ងៃ៖
ស្តាប់ - ០១:២៣
« ពេលខ្លះក្នុងរឿងនយោបាយ យើងមានសំណាងទី២ ហើយគឺអ្វីដែលយើងបានធ្វើជាមួយនឹងសំណាងទី២ នេះ គឺសំខាន់ខ្លាំងណាស់ ព្រោះវានឹងគ្មានសំណាងទី៣ ទេ។ ប្រសិនបើសភាអង់គ្លេសមិនបោះឆ្នោតទទួលយក វានឹងគ្មានអ្វីដែលត្រូវលើកយកទៅបកស្រាយឡើងវិញលើអ្វីដែលយើងបានបកស្រាយរួចហើយ និងក៏គ្មានការធានាអ្វីបន្ថែមលើការធានាដែលយើងបានឯកភាពគ្នារួចហើយដែរ។
យើងត្រូវឲ្យច្បាស់ទាំងអស់គ្នាលើការពិតដែលយើងកំពុងប្រឈម។ ក្រុមអ្នកតំណាងរាស្រ្តអង់គ្លេសកំពុងប្រឈមនឹងការទទួលខុសត្រូវមួយយ៉ាងសំខាន់។ ពួកគេមានជម្រើសជាមូលដ្ឋានដើម្បីធ្វើ។ ខ្ញុំសង្ឃឹម និងជឿជាក់ថា ការធានាផ្លូវច្បាប់ដែលបានឯកភាពគ្នានៅទីនេះនឹងគ្រប់គ្រាន់ដើម្បីអាចឲ្យសភាអង់គ្លេសបោះឆ្នោតទទួលយកបាននូវកិច្ចព្រមព្រៀងដែលបានអនុម័ត។
យើងត្រូវតែអនុវត្តតាមកិច្ចព្រមព្រៀងដែលមានស្រាប់មួយនេះរហូតដល់ចុងបញ្ចប់រវាងវា។ យើងត្រូវតែទទួលខុសត្រូវនៅចំពោះមុខប្រវត្តិសាស្រ្ត។ យើងបានជួបពិភាក្សា និងចរចាគ្នាយ៉ាងយូរ ហើយខ្ញុំប្រាកដថា កិច្ចព្រមព្រៀងនេះជាកិច្ចព្រមព្រៀងតែមួយគត់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ