អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

Brexit៖​ច្រកចេញ​របស់​អង់គ្លេស​ពី​សហភាពអឺរ៉ុប​កំពុង​បន្ត​ស្រពិចស្រពិល​កាន់​តែ​ខ្លាំង

ចុះផ្សាយ​នៅ​ថ្ងៃ៖

នៅ​យប់​ថ្ងៃ​អង្គារ ទី១២ មីនា សភា​អង់គ្លេស​បាន​បោះឆ្នោត​ច្រាន​ចោល​កិច្ចព្រមព្រៀង​ផ្តាច់ខ្លួន​ចេញ​ពី​សហភាព​អឺរ៉ុប​ដែល​ហៅ​ថា Brexit។ នេះ​ជា​លើកទី២ ក្នុង​រយៈពេល ២ខែ​ដែល​ក្រុមអ្នកតំណាងរាស្រ្ត​អង់គ្លេស​ភាគច្រើន​បាន​បោះឆ្នោត​មិន​ទទួល​យក​កិច្ចព្រមព្រៀង Brexit ដែល​លោកស្រី​នាយករដ្ឋមន្រ្តី​អង់គ្លេស​ទែរ៉េហ្សា ម៉េ​បាន​ចុះ​ហត្ថលេខា​ជាមួយ​សហភាពអឺរ៉ុប​ក្នុង​ខែ​វិច្ឆិកា ឆ្នាំ ២០១៨។ ជា​ថ្មី​ម្តង​ទៀត និង​ជាមួយ​សម្លេង​ស្អកៗ​អស់​កម្លាំង លោកស្រី​ម៉េ​បាន​ត្រឹម​សម្តែង​ការ​ខក​ចិត្ត​យ៉ាង​ខ្លាំង និង​បាន​រម្លឹក​ប្រាប់​ក្រុមតំណាងរាស្រ្ត​ទាំង​អស់​ជា​ថ្មី​ថា ការ​ដែល​អង់គ្លេស​បាន​សម្រេចចិត្ត​ដក​ខ្លួន​ចេញ​ពី​គ្រួសារអឺរ៉ុប​ជា​ឆន្ទៈ និង​បំណង​ប្រាថ្នា​របស់​ប្រជារាស្រ្ត​អង់គ្លេស។

លោកស្រីនាយករដ្ឋមន្រ្តីអង់គ្លេសទែរ៉េហ្សា ម៉េ
លោកស្រីនាយករដ្ឋមន្រ្តីអង់គ្លេសទែរ៉េហ្សា ម៉េ UK Parliament/Jessica Taylor/Handout via REUTERS
ផ្សាយពាណិជ្ជកម្ម

ក្នុង​រយៈពេល ២ខែ សភា​អង់គ្លេស​បាន​បោះឆ្នោត​ច្រានចោល​កិច្ចព្រមព្រៀង Brexit ដែល​លោកស្រី​នាយករដ្ឋមន្រ្តី​អង់គ្លេស​ទែរ៉េហ្សា ម៉េ​បាន​ចុះ​ហត្ថលេខា​ជាមួយ​សហភាពអឺរ៉ុប​ក្នុង​ខែ​វិច្ឆិកា ឆ្នាំ ២០១៨។ បន្ទាប់​ពី​បាន​បោះឆ្នោត​ច្រាន​ចោល​លើក​ទី១ កាល​ពី​ថ្ងៃទី១៥ មករា​កន្លង​ទៅ សភា​អង់គ្លេស​បាន​បោះឆ្នោត​ច្រានចោល​លើកទី២ នា​ថ្ងៃ​អង្គារ ទី១២ មីនា ទោះ​បី​ជា​លោកស្រី​ម៉េ​ទទួល​បាន​ការ​ធានា​មួយ​ចំនួន​បន្ថែម​ពី​ប្រធាន​គណៈកម្មការ​អឺរ៉ុប​លោក​ហ្សង់ខ្លូត យុងក័រ​នៅ​សភា​អឺរ៉ុប​ក្នុង​ទីក្រុង​ស្រ្តាស្បួរ ប្រទេស​បារាំង​នា​ថ្ងៃ​ចន្ទ ទី១១ មីនា​ក៏​ដោយ។

ក្រុម​អ្នកវិភាគ​បាន​មើល​ឃើញ​ថា ទោះ​បី​ជា​លោកស្រី​ម៉េ​យក​កិច្ចព្រមព្រៀង​ដដែល​នេះ​ទៅ​ដាក់​ឲ្យ​សភា​បោះឆ្នោត​លើកទី៣ ឬ​លើកទី៤ ទៀត​ក៏​ដោយ ក៏​ក្រុមអ្នកតំណាងរាស្រ្ត​អង់គ្លេស​នៅ​តែ​បោះឆ្នោត​ប្រឆាំង​ដដែល។ ហេតុអី? ហេតុផល​អាច​មាន​ច្រើន តែ​សំខាន់​មាន​ពីរ ទី១ ដើមចម​នៃ​បញ្ហា​នៅ​ក្នុង​កិច្ចព្រមព្រៀង​នៅ​មិន​ទាន់​បាន​ដោះស្រាយ ពោល​ទាក់ទង​នឹង​រឿង​ព្រំដែន​អៀរឡង់​រវាង​ដែនដី​អៀរឡង់ខាងជើង និង​ប្រទេស​អៀរឡង់។ ចំណែក​ហេតុផល​សំខាន់ទី២ គឺ​រឿង​នយោបាយផ្ទៃក្នុង​នៅ​អង់គ្លេស​ដែល​ក្រុម​ប្រឆាំង​ចង់​ដាក់​គំនាប និង​ចង់​បំបាក់មុខ បំបាក់មាត់​លោកស្រី​ម៉េ។

ហេតុអ្វី​បាន​ជា​ព្រំដែនអៀរឡង់​បន្ត​ចោទ​ជា​បញ្ហា​ខ្លាំង​ម្ល៉េះ?

បច្ចុប្បន្ន ទឹកដី​អៀរឡង់​ត្រូវ​បាន​ពុះ​ចែក​ជា​ពីរ គឺ​អៀរឡង់ខាងជើង​ដែល​ស្ថិត​ក្រោម​ការ​កាន់កាប់​របស់​ប្រទេស​អង់គ្លេស និង​អៀរឡង់ខាងត្បូង​ដែល​ជា​សាធារណរដ្ឋ​ឯករាជ្យ​មួយ​ស្ថិត​ក្នុង​សមាជិក​របស់​សហភាពអឺរ៉ុប។ បើ​អង់គ្លេស​បាន​សម្រេចចិត្ត​ឈប់​រួមសុខ រួមទុក្ខ​ជាមួយ​អឺរ៉ុប និង​បើ​ជា​ការ​ចាកចេញ​ដោយ​គ្មាន​កិច្ចព្រមព្រៀង​ទៀត​នោះ ខ្សែព្រំដែន​ខណ្ឌ​ចែក​រវាង​អៀរឡង់ខាងជើង និង​សាធារណរដ្ឋ​អៀរឡង់​ប្រវែង ៥០០គីឡូម៉ែត្រ​នឹង​ត្រូវ​មាន​ឡើង​វិញ។ នៅ​ក្នុង​កិច្ចព្រមព្រៀង Brexit រវាង​អង់គ្លេស និង​អឺរ៉ុប​ក្នុង​ខែ​វិច្ឆិកា ឆ្នាំ ២០១៨ ហើយ​ដើម្បី​បញ្ចៀស​កុំ​ឲ្យ​មាន​ជម្លោះ​បែងចែក​ទឹកដី​នៅ​អៀរឡង់​កម្រើក​ជា​ថ្មី សហភាពអឺរ៉ុប និង​រដ្ឋាភិបាល​អង់គ្លេស​បាន​ឯកភាព​គ្នា​បង្កើត​ឲ្យ​មាន​យន្តការណ៍​បណ្តោះអាសន្ន និង​លក្ខខណ្ឌពិសេស​ស្តីពី​ចរាចរមនុស្ស និង​ទំនិញ​រវាង​ដែនដី​អៀរឡង់ខាងជើង និង​ប្រទេស​អៀរឡង់​រហូត​ដល់​ខែ​កក្កដា ឆ្នាំ ២០២០។

បើ​ពី​ពេល​នេះ​ដល់​ខែ​កក្កដា ឆ្នាំ ២០២០ គេ​មិន​អាច​រក​បាន​ដំណោះស្រាយ​ណា​មួយ​ដើម្បី​បញ្ជៀស​ការ​បង្កើត​ព្រំដែន​ឡើង​វិញ​នៅ​ទឹកដី​អៀរឡង់​ទេ នោះ​ខ្សែព្រំដែន​ខណ្ឌចែក​ទឹកដី​អៀរឡង់​ជា​ពីរ​នឹង​ចូល​ធរមាន​ជា​ស្វ័យប្រវត្តិ។ ក្រុម​អ្នកតំណាងរាស្រ្ត​អង់គ្លេស​ដែល​ជំទាស់​នឹង​រឿង​ព្រំដែន​អៀរឡង់​បាន​ពន្យល់​ហេតុផល​នយោបាយផ្ទៃក្នុង និង​អន្តរជាតិ។ នៅ​ម្ខាង​មាន​ការ​យល់​ឃើញ​ថា គេ​មិន​អាច​ចាត់​ទុក​ដែនដី​អៀរឡង់ខាងជើង​ជា​ដែនដី​ពិសេស​ដាច់ដោយ​ឡែក​បាន​ទេ ពោល​គេ​មិន​អាច​បែងចែក​ដាច់​ពី​គ្នា​រវាង​ទឹកដី​អង់គ្លេស និង​ដែនដី​អៀរឡង់ខាងជើង​បាន​ឡើយ។ ចំណែក​នៅ​ម្ខាង​ទៀត ពិសេស​ក្រុម​សកម្មជន Brexit មាន​ជំហរ​តឹងតែង​យល់​ថា ការ​ផ្តល់​លក្ខន្តិកពិសេស​ឲ្យ​ដែនដី​អៀរឡង់ខាងជើង​ជា​ការ​លូកដៃ​ចូល​ជ្រៀតជ្រែក​កិច្ចការ​ផ្ទៃក្នុង​អង់គ្លេស​ពី​សហភាព​អឺរ៉ុប។

បាល់​កំពុង​ស្ថិត​ក្នុង​ជើង​អង់គ្លេស​តែ​ម្នាក់​ឯង

ក្រោយ​ការ​បោះឆ្នោត​ច្រានចោល​ចំនួន​ពីរ​លើក​របស់​សភា​អង់គ្លេស​មក ក្រុមអ្នកតំណាងរាស្រ្ត​អង់គ្លេស​ត្រូវ​ចូលរួម​បោះឆ្នោត​ជា​ថ្មី​នៅ​ថ្ងៃ​ពុធ ទី១៣ និង​អាច​នៅ​ថ្ងៃ​ព្រហស្បតិ៍ ទី១៤ មីនា​ទៀត។ សម្រាប់​ការ​បោះឆ្នោត​ក្នុង​ថ្ងៃទី១៣ មីនា សភា​អង់គ្លេស​ត្រូវ​បោះឆ្នោត​យល់ព្រម ឬ​មិន​យល់ព្រម​ចាកចេញ​ពី​អឺរ៉ុប​ដោយ​គ្មាន​កិច្ចព្រមព្រៀង​ដែល​ភាសា​អង់គ្លេស​ហៅ​ថា no deal។ បើ​សម្លេង​ភាគ​ច្រើន​គាំទ្រ​ឲ្យ​អង់គ្លេស​ចាកចេញ​ដោយ​គ្មាន​កិច្ចព្រមព្រៀង អង់គ្លេស​នឹង​ចេញ​ពី​អឺរ៉ុប​នៅ​ថ្ងៃទី២៩ មីនា​ដោយ​ដៃ​ទទេ។ ផ្ទុយ​ទៅ​វិញ បើ​សភា​អង់គ្លេស​បោះឆ្នោត​មិន​ព្រម​ចេញ​ដោយ​គ្មាន​កិច្ចព្រមព្រៀង ក្រុមអ្នកតំណាងរាស្រ្ត​អង់គ្លេស​ត្រូវ​វិល​ចូល​សភា​នៅ​ថ្ងៃទី១៤ មីនា​ដើម្បី​បោះឆ្នោត​សុំ ឬ​មិន​សុំ​ពន្យារ​ពេល​ចាកចេញ​ពី​អឺរ៉ុប​នៅ​ក្រោយ​ថ្ងៃទី២៩ មីនា។

ក្នុង​ករណី​ដែល​សភា​អង់គ្លេស​សុំ​ពន្យារ​ពេល គឺ​ត្រូវ​មាន​ការ​យល់ព្រម​ពី​សមាជិក​អឺរ៉ុប​ទាំង ២៧ប្រទេស​ជា​មុន​សិន។ តែ​បើ​តាម​មើល​ទៅ និង​ជា​គោលការណ៍ អឺរ៉ុប​ដែល​មិន​ចង់​ឃើញ​ការ​លែងលះ​ដោយ​គ្មាន​កិច្ចព្រមព្រៀង​អាច​នឹង​យល់ព្រម​ទុក​ពេល​បន្ថែម​ឲ្យ​អង់គ្លេស។ ក្នុង​ករណី​នេះ អឺរ៉ុប​អាច​ដាក់​ល័ក្ខខ័ណ្ឌ​ជា​៣ សំណួរ​ទៅ​អង់គ្លេស ទី១ តើ​ចង់​សុំ​ពន្យារ​ប៉ុន្មាន​ខែ ឬ​ប៉ុន្មាន​ឆ្នាំ ទី២ សុំ​ពន្យារ​ពេល​ដើម្បី​អ្វី និង​ទី៣ តើ​ក្នុង​រយៈពេល​ពន្យារ​ពេល​ហ្នឹង​អាច​សង្ឃឹម​នឹង​ដោះស្រាយ​បញ្ហា​បាន ឬ​អត់ ហើយ​បើ​បាន តើ​មាន​សំណាង​ប៉ុន្មាន​ភាគរយ​ដែរ?។ ទោះ​ជា​យ៉ាង​ណា​ក្តី អឺរ៉ុប​បាន​បញ្ជាក់​ជា​ថ្មី​ថា ទ្វារ​ចរចា​ឡើង​វិញ​បាន​បិទ និង​លែង​ធ្វើ​សម្បទាន​អ្វី​បន្ថែម​ទៀត​ឡើយ។ ឃើញ​ថា បាល់​កំពុង​ស្ថិត​ក្នុង​ជើង​អង់គ្លេស​តែ​ម្នាក់​ឯង​គត់ ឬ​មួយ​ទទួល​យក​កិច្ចព្រមព្រៀង​ដែល​មាន​ស្រាប់ ឬ​មួយ​ចេញ​ដោយ​ដៃ​ទទេ ឬ​មួយ​ក៏​វិល​ត្រឡប់​ចូល​រួមរស់​ជា​គ្រួសារ​អឺរ៉ុប​ឡើង​វិញ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

មើលវគ្គផ្សេងទៀត
រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ