Brexit៖អឺរ៉ុបបានយល់ព្រមលើកពេលចេញរបស់អង់គ្លេសនៅថ្ងៃទី២២ ឧសភា ឬមួយនៅថ្ងៃទី១២ មេសា
នៅក្នុងកិច្ចប្រជុំនាថ្ងៃព្រហស្បតិ៍ ទី២១ មីនា ក្រុមប្រឹក្សាអឺរ៉ុបបានបដិសេធលើសំណើរបស់លោកស្រីនាយរដ្ឋមន្រ្តីអង់គ្លេសតេរ៉េហ្សា មេដែលបានសុំលើកពេល Brexit រហូតដល់ដំណាច់ខែមិថុនា។ ក្នុងពេលជាមួយគ្នានេះ អឺរ៉ុបក៏បានយល់ព្រមឲ្យមានការលើកពេលដែរ តែទុកជម្រើសតែពីរគត់ឲ្យអង់គ្លេសជ្រើសរើស ឬមួយលើកពេលនៅត្រឹមថ្ងៃទី២២ ឧសភា ឬមួយលើកពេលនៅត្រឹមថ្ងៃទី១២ មេសា។ ជម្រើសពីរនេះគឺអាស្រ័យលើការបោះឆ្នោតទទួលយក ឬមិនទទួលយកពីសភាអង់គ្លេសនៅសប្តាហ៍ក្រោយលើកិច្ចព្រមព្រៀងដែលលោកស្រីមេ និងអឺរ៉ុបបានចុះហត្ថលេខាក្នុងខែវិច្ឆិកា ឆ្នាំ ២០១៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ក្រុមប្រឹក្សាអឺរ៉ុបបានប្រើពេលជជែក ពិភាក្សាគ្នាអស់រយៈពេល ៦ម៉ោងទើបអាចនិយាយចុះសម្រុងគ្នាលើសេចក្តីប្រកាសព័ត៌មានរួមមួយ។ នៅក្នុងសេចក្តីប្រកាសព័ត៌មានរួមនោះ អឺរ៉ុបបានបដិសេធលើសំណើរបស់លោកស្រីនាយរដ្ឋមន្រ្តីអង់គ្លេសតេរ៉េហ្សា មេដែលសុំលើកពេល Brexit រហូតដល់ថ្ងៃទី៣០ មិថុនា។ តែដើម្បីបញ្ជៀសកុំឲ្យមានសេណារ៉យ៉ូចាកចេញដោយគ្មានកិច្ចព្រមព្រៀង អឺរ៉ុបបានយល់ព្រមលើកពេល Brexit ឲ្យអង់គ្លេសដោយដាក់ចេញនូវជម្រើសថ្ងៃចាកចេញចំនួនពីរ ឬមួយនៅថ្ងៃទី២២ ឧសភា ឬមួយនៅថ្ងៃទី១២ មេសា។ តែជម្រើសចាកចេញនៅថ្ងៃទី២២ ឧសភា ឬនៅថ្ងៃទី១២ មេសា គឺវាអាស្រ័យលើលទ្ធផលនៃការបោះឆ្នោតរបស់សភាអង់គ្លេសនៅសប្តាហ៍ក្រោយ។
បើនៅសប្តាហ៍ក្រោយ សភាអង់គ្លេសបោះឆ្នោតទទួលយកកិច្ចព្រមព្រៀងដែលលោកស្រីតេរ៉េហ្សា មេ និងអឺរ៉ុបបានចុះហត្ថលេខាក្នុងខែវិច្ឆិកា ឆ្នាំ ២០១៨ នោះថ្ងៃចាកចេញជាផ្លូវការនឹងត្រូវពន្យារពេលដល់ថ្ងៃទី២២ ឧសភា។ ផ្ទុយទៅវិញ បើសភាអង់គ្លេសបោះឆ្នោតច្រានចោលជាថ្មីដែលជាលើកទី៣ អង់គ្លេសត្រូវសម្រេចចិត្តពីពេលនេះដល់ថ្ងៃទី១២ មេសាថា តើនឹងត្រូវចូលរួមបោះឆ្នោតសភាអឺរ៉ុបដែលគ្រោងរៀបចំនៅថ្ងៃទី២៦ ឧសភាឬអត់។ មានសេណារីយ៉ូចំនួនពីរនៅក្នុងករណីនេះ ទី១ បើអង់គ្លេសសម្រេចមិនចូលរួមបោះឆ្នោតសភាអឺរ៉ុបទេ អង់គ្លេសត្រូវចេញពីអឺរ៉ុបនៅថ្ងៃទី១២ មេសា និងទី២ បើអង់គ្លេសសម្រេចចូលរួមបោះឆ្នោតសភាអឺរ៉ុបនៅថ្ងៃទី២៦ ឧសភា នោះអង់គ្លេសអាចនឹងទទួលបានថ្ងៃពន្យារពេលចេញពីអឺរ៉ុបថ្មីមួយទៀត។
តែលោកស្រីតេរ៉េហ្សា មេធ្លាប់ប្រកាសថា ការចូលរួមបោះឆ្នោតសភាអឺរ៉ុបជាកំហុសឆ្គងមួយ។ យ៉ាងណាក៏ដោយ និងបើតាមប្រធានក្រុមប្រឹក្សាអឺរ៉ុបលោកដូណាល់ ទូស្កិ៍ លោកស្រីមេបានយល់ព្រមតាមសំណើទាំងនេះរបស់ក្រុមប្រឹក្សាអឺរ៉ុប។ លោកទូស្កិ៍បានបន្ថែមថាចាប់ពីពេលនេះដល់ថ្ងៃទី១២ មេសា អង់គ្លេសមានសេណារីយ៉ូច្រើនដែលអាចជ្រើសរើសបាន។ គួររម្លឹកថា តាមកិច្ចព្រមព្រៀងរវាងអង់គ្លេស និងអឺរ៉ុបចុះហត្ថលេខាក្នុងខែវិច្ឆិកា ឆ្នាំ ២០១៨ អង់គ្លេសត្រូវចេញពីអឺរ៉ុបជាផ្លូវការនៅថ្ងៃទី២៩ មីនា។ អឺរ៉ុបធ្លាប់បាននិយាយច្រើនដងថា អង់គ្លេសត្រូវចេញជាមួយកិច្ចព្រមព្រៀងនេះ ឬមួយចេញដោយដៃទទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ