លក់អាវុធទៅឲ្យអារ៉ាប៊ី សាអូឌីត៖ ប្រទេសអឺរ៉ុបមួយចំនួនទើសទាល់ដោយសារជំហររបស់អាល្លឺម៉ង់
រដ្ឋាភិបាលអាល្លឺម៉ង់បានប្រកាសនៅថ្ងៃព្រហស្បតិ៍ថា ខ្លួននឹងបន្តផ្អាក ការនាំចេញគ្រឿងបរិក្ខាយោធា ទៅ អារ៉ាប៊ី សាអូឌីត ៦ខែទៀត។ ទីក្រុងប៊ែរឡាំងបានសម្រេចព្យួរ ការនាំចេញសព្វាវុធទៅអារ៉ាប៊ី សាអូឌីត ចាប់តាំងពីមានករណីឃាតកម្មទៅលើរូបលោកខាស្ហូជី អ្នកកាសែត រិះគន់រដ្ឋាភិបាលក្រុងរីយ៉ាដ។ ការសម្រេចចិត្តរបស់រដ្ឋាភិបាលអាល្លឺម៉ង់ នឹងអាចបង្កភាពតានតឹង ជាមួយប្រទេសអឺរ៉ុបផ្សេងទៀត ដែលជាដៃគូរបស់អាល្លឺម៉ង់ ក្នុងវិស័យលក់នាំចេញអាវុធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
តាមអ្នកនាំពាក្យរបស់រដ្ឋាភិបាលអាល្លឺម៉ង់ វិធានការ ព្យួរការនាំចេញគ្រឿងបរិក្ខាយោធា ទៅអារ៉ាប៊ីសាអូឌីត នឹងបន្តរហូតដល់ខែកញ្ញាខាងមុខ។ ការសម្រេចចិត្តរបស់ភាគីអាល្លឺម៉ង់ នឹងធ្វើឲ្យប្រទេសដៃគូអឺរ៉ុបផ្សេងមិនសប្បាយចិត្ត។ សូមបញ្ជាក់ថា នៅពេលអាល្លឺម៉ង់ សម្រេចផ្អាកការនាំចេញអាវុធទៅអារ៉ាប៊ី សាអូឌីត នៅក្រោយឃាតកម្មទៅលើអ្នកកាសែត ខាស្ហូហ្ស៊ី នៅប្រទេសតួកគី ប្រទេសសម្ព័ន្ធមិត្តអឺរ៉ុបផ្សេងទៀត បានដំឡើងសំលេងរិះគន់ខ្លាំងៗ ព្រោះថា ការសម្រេចចិត្តរបស់ អាល្លឺម៉ង់នឹងអាចធ្វើឲ្យកិច្ចសន្យាលក់សព្វាវុធ ទៅឲ្យអារ៉ាប៊ី សាអូឌីត ក្នុងតម្លៃរាប់ពាន់លានអឺរ៉ូ ស្ថិតក្នុងភាពមិនប្រាកដប្រជា។
ទៅតាមការសម្រេច នៅថ្ងៃព្រហស្បតិ៍ម្សិលមិញ រដ្ឋាភិបាលអាល្លឺម៉ង់នឹងលែងផ្តល់អាជ្ញាបណ្ណដល់ការនាំចេញ មីស៊ីល បាញ់បានចម្ងាយឆ្ងាយ ឈ្មោះ Meteor ដែលគេបំពាក់នៅលើយន្តហោះចម្បាំង ដែលកងទ័ពអារ៉ាប៊ី សាអូឌីត បានទិញ ពីក្រុមហ៊ុនអឺរ៉ុប។ តួមីស៊ីល Meteor ត្រូវផលិតដំឡើង ដោយក្រុមហ៊ុនMBDA ដែលជាសាខារបស់ក្រុមហ៊ុនអឺរ៉ុប អ៊ែរប៊ូស ប៉ុន្តែ ក្បាលគ្រាប់បំពាក់នៅលើមីស៊ីល ផលិតផ្គត់ផ្គង់ដោយក្រុមហ៊ុនអាល្លឺម៉ង់។
នៅក្នុងលិខិតផ្ញើទៅកាន់សមភាគីអាល្លឺម៉ង់ ប្រមុខការបរទេសអង់គ្លេស បានលើកឡើងថា អាល្លឺម៉ង់ខ្វះភាពស្មោះត្រង់ ចំណែករដ្ឋមន្រ្តីការបទេសបារាំងបានរិះគន់នយោបាយនាំចេញអាវុធរបស់អាល្លឺម៉ង់ ដែលផ្លាស់ប្តូរ មិនឈប់។
ដើម្បីកាត់បន្ថយភាពតានតឹង និងការព្រួយបារម្ភរបស់ប្រទេសអឺរ៉ុបផ្សេងទៀត ដូចជាបារាំង និងអង់គ្លេសជាដើម ដែលអាចរងប៉ះពាល់ ដោយសារវិធានការថ្មី របស់អាល្លឺម៉ង់ រដ្ឋាភិបាលក្រុងប៊ែរឡាំងបានយល់ព្រមពន្យារពេលអាជ្ញាបណ្ណនាំចេញអាវុធ ដែលរដ្ឋាភិបាលធ្លាប់បានផ្តល់ឲ្យ នៅមុនខែតុលា ពោលគឺនៅមុនឃាតកម្មទៅលើអ្នកកាសែត ខាស្ហូហ្ស៊ី។
ជាមួយគ្នានេះ អាល្លឺម៉ង់បានក្រើនរំលឹកផងដែរ ដល់រដ្ឋាភិបាល បារាំង និងអង់គ្លេស ឲ្យចេញមុខធានា ថា សព្វាវុធដែលលក់ទៅឲ្យអារ៉ាប៊ី សាអូឌីត ឬអេមីរ៉ា អារ៉ាប់រួម នឹងមិនត្រូវគេយកទៅប្រើ នៅក្នុងសង្រ្គាមយេម៉ែន ដែលបានសម្លាប់មនុស្សជាង ១ម៉ឺននាក់ តាំងពីឆ្នាំ ២០១៥មក។
សម្ព័ន្ធមិត្តអារ៉ាប់ ដឹកនាំដោយអារ៉ាប៊ី សាអូឌីត ដែលកំពុងធ្វើប្រតិបត្តិការ ទ័ពអាកាស វាយប្រហារទៅលើក្រុមប្រឆាំងនៅយេម៉ែន បានរងចោទប្រកាន់ថា បានបាញ់មីស៊ីល សម្លាប់ប្រជាជនស៊ីវិល នៅយេម៉ែន។ ទីក្រុងវ៉ាស៊ីនតោន ដែលជាសម្ព័ន្ធមិត្តរបស់អារ៉ាប៊ី សាអូឌីត នៅថ្ងៃម្សិលមិញ បានទាមទារឲ្យមានការស៊ើបអង្កេត លើប្រតិបត្តិការទ័ពអាកាសរបស់អារ៉ាប៊ី សាអូឌីត ដែលបានសម្លាប់មនុស្ស ៨នាក់ ដែលនៅក្នុងមានកុមារ យេម៉ែន ៥នាក់។
នៅក្រោយឃាតកម្មទៅលើអ្នកកាសែត រិះគន់ អារ៉ាប៊ី សាអូឌីត ដែលសមាជិកព្រឹទ្ធសភាទម្លាក់កំហុសទៅលើព្រះរាជបុត្រស្នងរាជ្យ ព្រឹទ្ធសភា អាមេរិកបានបោះឆ្នោត ទាមទារឲ្យរដ្ឋបាលលោកដូណាល់ ត្រាំ ឈប់ផ្គត់ផ្គង់សម្ភារៈយោធា ហើយនិងដកទ័ពអាមេរិក ពីសម្ព័ន្ធអារ៉ាប់ ដែលកំពុងធ្វើប្រតិបត្តិការយោធា នៅយេម៉ែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ