Brexit៖ សភាអង់គ្លេសបរាជ័យជាលើកទី៤ មិនអាចរកសំឡេងគាំទ្រសំណើថ្មី
ដំណោះស្រាយBrexit បានធ្លាក់ទឹកសាជាថ្មី។ នៅល្ងាចថ្ងៃចន្ទម្សិលមិញ សភាអង់គ្លេសបោះឆ្នោតប្រឆាំងជាលើកទី៤ កិច្ចព្រមព្រៀង Brexit ដែលតាមពិតទៅ ត្រូវបានដាក់ស្នើឡើងដោយសភាខ្លួនឯង។ ស្ថិតនៅក្នុងដំណាក់កាលនេះ នាយករដ្ឋមន្រ្តីអង់គ្លេស លោកស្រី តេរ៉េហ្សា មេត្រូវកោះប្រជុំគណៈរដ្ឋមន្រ្តីបន្ទាន់មួយ នៅថ្ងៃ អង្គារនេះ ដើម្បីដករកច្រកចេញបន្ទាប់។ សម្រាប់ភាគីអឺរ៉ុប សេណារីយ៉ូ អង់គ្លេសដើរចេញពីសហភាពអឺរ៉ុប ដោយគ្មានកិច្ចព្រមព្រៀង មានរូបរាងកាន់តែច្បាស់ជាងមុន។
ចុះផ្សាយនៅថ្ងៃ៖
ស្តាប់ - ០១:៥៧
នៅក្នុងសំណុំរឿងBrexit កុំថាឡើយសំណើរបស់រដ្ឋាភិបាលរបស់លោកស្រីមេ ដែលសភាអង់គ្លេសបោះឆ្នោតប្រឆាំងទាត់ចោល។ សូម្បីតែសំណើដែលរៀបចំចងក្រងឡើងដោយសភាខ្លួនឯង ក៏សភាអង់គ្លេសបោះឆ្នោតប្រឆាំងមិនឲ្យចេញរួចដែរ។
បន្ទាប់ពីដកយកសំណុំរឿងBrexit ពីដៃលោកស្រីនាយករដ្ឋមន្រ្តី តេរ៉េហ្សា មេ មកចាត់ចែងដោយខ្លួនឯង សភាអង់គ្លេស នៅថ្ងៃចន្ទម្សិលមិញ បានលើកសំណើចំនួន៤ ឲ្យអង្គសភាបោះឆ្នោតអនុម័ត។ សំណើទាំងនោះ មាន ការរៀបចំបោះឆ្នោតប្រជាមតិ លើរាល់កិច្ចព្រមព្រៀងស្តីពីលែងលះ ជាមួយអឺរ៉ុប ការរក្សាអង់គ្លេស នៅក្នុងប្រព័ន្ធពន្ធគយអឺរ៉ុប រក្សាអង់គ្លេសឱ្យស្ថិតនៅក្នុងទីផ្សារអឺរ៉ុបរួម ដោយដើរតាមគំរូប្រទេសន័រវេស។ នៅក្នុងសំណើចុងក្រោយរបស់ខ្លួន សភាអង់គ្លេស បានទាមទារថា ក្នុងករណីសភា មិនអាចរកឃើញ គ្មានកិច្ចព្រមព្រៀង នៅ២ថ្ងៃមុន កាលបរិច្ឆេទ ដែលអង់គ្លេស ត្រូវ ដើរចេញពីសហភាពអឺរ៉ុប សមាជិកសភាត្រូវតែបោះឆ្នោត ផ្តល់សំឡេងចុងក្រោយលើ ការដើរចេញរបស់អង់គ្លេស ដោយគ្មានកិច្ចព្រមព្រៀងជាមួយ អឺរ៉ុប។ ហើយបើសិនសភាបោះឆ្នោតប្រឆាំង ពោល គឺមិនចង់ឲ្យអង់គ្លេសដើរចេញពីពីអឺរ៉ុប ដោយគ្មានរកឃើញកិច្ចព្រមព្រៀង នោះ អង់គ្លេសត្រូវតែបដិសេធមិនដើរចេញពីសហភាពអឺរ៉ុបវិញ។
នៅល្ងាចថ្ងៃចន្ទម្សិលមិញ បន្ទាប់ ពីជជែកតវ៉ា យ៉ាងតឹងសសៃក សមាជិកសភា អង់គ្លេស នៅទីបំផុត បោះឆ្នោត បដិសេធ មិនទទួលយក សំណើទាំង ៤។ ការបោះឆ្នោត ប្រឆាំងជាលើកទី៤ របស់សភា ធ្វើឲ្យការចរចា រកកិច្ចព្រមព្រៀងBrexit កាន់តែដើរទៅរកផ្លូវទាល់ច្រក។
នៅក្រោយ សភាអង់គ្លេសបរាជ័យ មិនអាចបោះឆ្នោត គាំទ្រ កិច្ចព្រមព្រៀងBrexit ជាលើកទី៤ ប្រធានក្រុមចរចារបស់សហភាពអឺរ៉ុប លោកMichel Barnier បានលើកឡើងពីលទ្ធភាព ដែលអង់គ្លេសដើរចេញពីអឺរ៉ុប ដោយគ្មានកិច្ចព្រមព្រៀង។ យ៉ាងណាក៏ដោយ សហភាពអឺរ៉ុបនៅតែចង់រក្សាអង់គ្លេស នៅក្នុងប្រព័ន្ធពន្ធគយអឺរ៉ុប បើទោះបីជាអង់គ្លេសត្រូវលែងលះ ដោយគ្មានកិច្ចព្រមព្រៀងជាមួយអឺរ៉ុប។
ដោយសារតែសភានៅតែបោះឆ្នោតបដិសេធ នាយករដ្ឋមន្រ្តី អង់គ្លេស គ្មានជម្រើសអ្វីក្រៅតែពីសុំឲ្យអឺរ៉ុប អូសបន្លាយពេលវេលានៃចាកចេញ ដែលត្រូវកំណត់ នៅថ្ងៃទី ១២មេសាខាងមុខ ប៉ុន្តែ ជាមួយគ្នានោះ អង់គ្លេស ត្រូវបង្ខំចិត្តរៀបចំការបោះឆ្នោតសភាអឺរ៉ុប ដែលត្រូវប្រព្រឹត្តទៅនៅថ្ងៃទី ២៦ ឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ