WTO បញ្ចុះការព្យាករអត្រាកំណើនពាណិជ្ជកម្មពិភពលោក និងអំពាវនាវឲ្យដោះស្រាយជាបន្ទាន់នូវជម្លោះពាណិជ្ជកម្មក្នុងលោក
នៅថ្ងៃអង្គារ ទី២ មេសា អង្គការពាណិជ្ជកម្មពិភពលោកហៅកាត់ជាភាសាអង់គ្លេស WTO បានអំពាវនាវឲ្យដោះស្រាយជាបន្ទាន់នូវជម្លោះពាណិជ្ជកម្មក្នុងលោក និងបានបញ្ចុះអត្រានៃការដោះដូរពាណិជ្ជកម្មក្នុងលោកសម្រាប់ឆ្នាំ ២០១៩។ ថ្លែងនាឱកាសធ្វើសន្និសីទកាសែតក្នុងទីក្រុងហ្សឺណែវ ប្រទេសស្វ៊ីស នាយកអង្គការ WTO លោក Roberto Azevedo បានព្រមានទុកជាមុនពីកំណើនផលវិបាកជះលើសេដ្ឋកិច្ច ប្រសិនបើជម្លោះពាណិជ្ជកម្មនៅបន្តមានដូចសព្វថ្ងៃ ពិសេសសង្រ្គាមពាណិជ្ជកម្មរវាងចិន និងអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
តាមអង្គការពាណិជ្ជកម្មពិភពលោក WTO អត្រានៃការដោះដូរពាណិជ្ជកម្មក្នុងលោកសម្រាប់ឆ្នាំ ២០១៩ នឹងត្រូវកើនត្រឹម ២,៦% ប៉ុណ្ណោះ ពោលតិចជាងការប្រមើលទុកកាលពីខែកញ្ញាកន្លងទៅដែលមានកម្រិត ៣,៧%។ នេះជាឆ្នាំទី២ ដែល WTO បានប្រមើលមើលខុស ព្រោះក្នុងឆ្នាំ ២០១៨ តួលេខជាក់ស្តែងនៃការដោះដូរពាណិជ្ជកម្មក្នុងលោកមានត្រឹម ៣% ពោលតិចជាងការប្រមើលទុកដែលមាន ៣,៩%។ តាមនាយក WTO លោក Roberto Azevedo ជម្លោះពាណិជ្ជកម្មជាដើមចមដែលបានធ្វើឲ្យអត្រាដោះដូរពាណិជ្ចកម្មក្នុងលោកធ្លាក់ចុះ ហើយវានឹងធ្លាក់ចុះកាន់តែខ្លាំងថែមទៀត ប្រសិនបើគេមិនរួសរាន់នាំគ្នាដោះស្រាយទេនោះ។
ដោយឡែក សំណុំរឿង Brexit ដែលប្រទេសអង់គ្លេស និងសហភាពអឺរ៉ុបកំពុងបន្តប្រទាញប្រទង់គ្នាសព្វថ្ងៃត្រូវបានលោក Roberto យល់ថា វាអាចប៉ះពាល់ខ្លាំងតែលើសេដ្ឋកិច្ចរវាងភាគីទាំងពីរនេះ ហើយផលវិបាកក្នុងកម្រិតណានោះវាអាស្រ័យទាំងស្រុងលើកិច្ចព្រមព្រៀងដែលភាគីទាំងពីរអាចនិយាយចុះសម្រុងគ្នាបាន។ សម្រាប់អត្រានៃការដោះដូរពាណិជ្ជកម្មក្នុងលោកនៅឆ្នាំ ២០២០ ត្រូវបាន WTO ប្រមើលមើល និងព្រមានថា នឹងអាចមានកម្រិត ៣% ប្រសិនបើភាពតានតឹងពាណិជ្ជកម្មថយចុះ។ តាមលោក Roberto ពាណិជ្ជកម្មមិនអាចដើរតួនាទីពេញលេញជាក្បាលម៉ាស៊ីនកំណើនសេដ្ឋកិច្ចបានឡើយ ដរាបណាភាពមិនប្រាកដនិយមនៅតែមានកម្រិតខ្ពស់នោះ។
ការអំពាវនាវ និងការព្រមានរបស់អង្គការពាណិជ្ជកម្មពិភពលោកពេលនេះបានធ្លាក់មក ចំពេលដែលអាមេរិក និងចិននៅមិនទាន់អាចនិយាយចុះសម្រុងគ្នាក្នុងសង្រ្គាមពាណិជ្ជកម្ម។ ក្នុងករណីដែលមានសង្រ្គាមពាណិជ្ជកម្ម ពិភពលោកទាំងមូលជាអ្នកខាតបង់ ព្រោះអត្រាកំណើនសេដ្ឋកិច្ចថយចុះ។ ជាថ្មីម្តងទៀត នាយកអង្គការ WTO លោក Roberto បានអំពាវនាវដល់គ្រប់ប្រទេសទាំងអស់ឲ្យគោរពច្បាប់ពាណិជ្ជកម្មអន្តរជាតិ។ «ការមិនអើពើនឹងសារៈសំខាន់ជាមូលដ្ឋាននៃប្រព័ន្ធពាណិជ្ជកម្មដែលផ្អែកលើច្បាប់ ជាកំហុសប្រវត្តិសាស្រ្តដែលនឹងជះឥទ្ធិពលអាក្រក់លើការងារ លើកំណើនសេដ្ឋកិច្ច និងលើស្ថិរភាពក្នុងលោក» នេះជាការបញ្ជាក់របស់លោក Roberto៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ